Ձեր վստահելի աղբյուրը

Հունական Mignatiou կայքը հրապարակել է հոդված՝ Եվրոպայի խորհրդի խորհրդարանական վեհաժողովում հույն պատգամավոր, Հունաստանի արտաքին գործերի նախկին նախարար Դորա Բակոյանիսի գործունեության վերաբերյալ։ Հոդվածը վերնագրվել է «Ինչպես Դորան զայրացրեց հայերին»։

Հոդվածում ասվում է, որ Դորա Բակոյանիսը հարված հասցրեց հայ-հունական հարաբերություններին, ով ԵԽԽՎ-ում հանդես եկավ հօգուտ Ադրբեջանի բանաձևի նախաձեռնության՝ կապված Լեռնային Ղարաբաղի հակամարտության հետ։

Հայտնի է դարձել, որ ԵԽԽՎ-ում քաղաքական բախում է տեղի ունեցել Դորա Բակոյանիսի և շվեյցարացի պատգամավոր, ԵԽԽՎ վետերան Անդրեա Գրոսի միջև, երբ վերջինս հարց է բարձրացրել Դորա Բակոյանիսի ազնվության և էթիկայի մասին՝ նշելով, որ Բակոյանիսը մտերիմ հարաբերություններ ունի Ադրբեջանի նախագահ Իլհամ Ալիևի հետ և նրա պատվին ճաշ է կազմակերպել։

Բակոյանիսն արդարացել է, թե Ալիևին ճաշի հրավերն ինքն արել է որպես Հունաստանի Օլիմպիական կոմիտեի նախագահ։

Mignatiou կայքն իր հոդվածում հղում է կատարում Panorama.am-ում հրապարակված հոդվածին՝ գրելով. «Դորա Բակոյանիսի և Ադրբեջանի նախագահ Ալիևի հարաբերություններն ունեն օլիգարխիկ հետաքրքրություններ, և հայկական Panorama.am կայքը պնդում է, որ Բակոյանիսի կողմից Լեռնային Ղարաբաղի վերաբերյալ բանաձևի նախաձեռնության պատճառներից մեկն էլ այն էր, որ Բակոյանիսը ցանկանում էր ստանալ Ալիևի աջակցությունը՝ ԵՄ-ում էներգետիկ հարցերով հանձնակատարի պաշտոնը զբաղեցնելու համար»։

Դորա Բակոյանիսի հարցը, ըստ հոդվածի, քննարկվել է անգամ ամենաբարձր մակարդակով, երբ Երևան էր այցելել Հունաստանի Հանրապետության նախագահ Կարոլոս Պապուլիասը։ Հայկական կողմի՝ Բակոյանիսի հետ կապված մտահոգություններին ի պատասխան, ըստ հոդվածի, նախագահ Պապուլիասն ասել է, որ Լեռնային Ղարաբաղի հարցում Հունաստանի դիրքորոշումը պարզ է և տիկին Բակոյանիսի մոտեցումը չի արտացոլում Հունաստանի կառավարության դիրքորոշումը։

Հիշեցնենք, որ ԵԽԽՎ ամառային նստաշրջանում Լեռնային Ղարաբաղի հակամարտության վերաբերյալ ներկայացված 2 բանաձևերի նախագծերը միացվեցին և Բյուրոն որոշում կայացրեց բանաձևերի նախագծերն ուղարկել ԵԽԽՎ քաղաքական կոմիտե՝ զեկույցի պատրաստման՝ «Լեռնային Ղարաբաղում և Ադրբեջանի մյուս գրավյալ տարածքներում բռնությունների աճ» վերնագրով։ ԵԽԽՎ աշնանային նստաշրջանում Վեհաժողովը հաստատեց Բյուրոյի որոշումը և զեկուցող նշանակվեց բրիտանացի Ռոբերտ Ուոլթերը։

Նախորդող հրապարակումներ`
ԵԽԽՎ հերթական ամոթը. Ադրբեջանական լոբբիստը նշանակվեց ԼՂ զեկուցող
Բացառիկ. ՀՀ պատվիրակությունը բոյկոտում է ԵԽԽՎ-ում ԼՂ զեկույցի պատրաստման գործընթացը
Ադրբեջանական խավիարը գրավել է ԵԽԽՎ-ն. կառույցը զեկույց է պատրաստելու ԼՂ վերաբերյալ