Ձեր վստահելի աղբյուրը

ԱԺ նախորդ քառօրյա նիստի ընթացքում ԱԺ-կառավարություն հարց ու պատասխանի ընթացքում պատգամավոր Աղվան Վարդանյանը բարձրաձայնել էր ««Առևտրի և ծառայությունների մասին» ՀՀ օրենքում լրացում կատարելու մասին» ՀՀ օրենքի պահանջով նոյեմբերի 1-ից դեղերի պարտադիր դրոշմապիտակավորման նորմի կիրարկման հետ կապված ներկրողների մտահոգությունների մասին։ Մասնավորապես` «Վագա ֆարմ» դեղ ներկրող կազմակերպությունը Ազգային ժողովում հարց էր բարձրացրել այն մասին, որ դեղերի դրոշմապիտակավորումը լրացուցիչ, դժվարին աշխատանք է, ինչը կանդրադառնա դեղերի գնի վրա։ Ազգային ժողովում առաջարկ էր եղել ևս մեկ անգամ քննարկել խնդիրը։

Առողջապահության նախարարությունից տեղեկացնում են, որ նախարար Արմեն Մուրադյանի հանձնարարությամբ ևս մեկ անգամ տեղի է ունեցել հարցի քննարկում գերատեսչության պատասխանատուների և ՀՀ ԱՆ Դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանի, ինչպես նաև «Վագա ֆարմ» դեղ ներկրող կազմակերպության հիմնադիր Վահե Վարսանյանի և այլոց մասնակցությամբ։

Առողջապահության փոխնախարար Սերգեյ Խաչատրյանն առաջարկել է առարկայական քննարկում կատարել` հասկանալու համար, թե ինչի արդյունքում են դժգոհությունները և ինչ քայլեր կարելի է իրականացնել։ Առողջապահության և ֆինանսների նախարարությունների ներկայացուցիչները միակարծիք էին, որ դրոշմապիտակավորումը կնպաստի դեղերի որակի ապահովմանը և ստվերային շրջանառության նվազեցմանը, ինչպես նաև տեղական արտադրանքի ծավալների վերահսկմանը։

«Վագա ֆարմի» ղեկավարը պնդում էր, որ դա դեղերի ստվերային շրջանառությունը կանխելու լավագույն գործիքը չէ։ Նրա մտահոգությունները հիմնականում ուղղված էին պարտադիր դրոշմապիտակավորման նպատակահարմարությանը և կիրարկման դժվարություններին, հատկապես` ցածր գներով դեղերի պիտակավորման պահանջը, քանզի դրանց ստվերային շրջանառությունն անարդյունավետ և իմաստազուրկ է։ Առողջապահության փոխնախարարը դրան հակադարձել է, որ անգամ ամենափոքր ստվերային շրջանառությունն անընդունելի է և ենթակա ստվերից դուրս բերման։

Հակոբ Թոփչյանը ներկայացրել է, որ 2013թ.-ին երկիր է ներմուծվել 95 մլն դոլարի տարբեր դեղերի 42 մլն փաթեթ։ Դրանց մի մասում 50 և ավելի սրվակներ, բլիստեռներ կամ տուփեր կան, որոնք կոչվում են հիվանդանոցային փաթեթներ։ Դրանք ևս ներառելով ստացվում է, որ ներմուծված դեղերի ընդհանուր թիվը կազմել է 55 մլն։

Գործարարը նաև դժգոհել է, որ պահանջվող հաշվետվությունները ծավալուն են և նոր աշխատուժ են պահանջում` ավելացնելով, որ հաշիվ-ապրանքագրերով արդեն իսկ իրականացվում է դեղերի ներկրման նկատմամբ հսկողությունը։ Ի պատասխան` ֆինանսների նախարարության ներկայացուցիչ Անդրանիկ Մուրադյանը ճշգրտել է, որ պահանջվող հաշվետվություններն էլեկտրոնային գրանցում են և չեն կարող փոխարինվել այժմ ներկայացվող հաշիվ-ապրանքագրերով։

Փոխարենը տեղում ստուգվել է ««Առևտրի և ծառայությունների մասին» ՀՀ օրենքում լրացում կատարելու մասին» ՀՀ օրենքի դրույթների և օրենքից բխող կարգի համապատասխանությունը, որի արդյունքում ֆինանսների նախարարության ներկայացուցիչները խոստացան արագ խմբագրում կատարել և հանել դեղերի պիտանիության ժամկետրների նշման պահանջը։

Առողջապահության նախարարության աշխատակազմի ղեկավար Արմեն Կարապետյանն էլ նշել է, որ օրենքն արդեն ընդունված է, և բոլոր գործարարները պարտավոր են այն կատարել։

Երկու նախարարության ներկայացուցիչները պատրաստակամություն են հայտնել ընթացքում առաջացող դժվարությունների դեպքում շարունակել քննարկումները և հնարավորինս սեղմ ժամկետում արձագանքել դեղ արտադրողների և ներմուծողների խնդիրներին։