Ձեր վստահելի աղբյուրը

Օստեոպորոզի դեմ պայքարի հիմնախնդիրները քննարկելու նպատակով այսօր Երևանում հրավիրվել էր Կլոր սեղան, որին մասնակցեցին հանրապետության հասարակական, կրթական, առողջապահական ոլորտների ականավոր գործիչներ, հյուրեր արտերկրից, ոլորտի անվանի մասնագետներ: Կլոր սեղանը իր մասնակցությամբ պատվեց ՀՀ առաջին տիկին Ռիտա Սարգսյանը:

Լրագրողների հետ ճեպազրույցում Առողջապահության փոխնախարար Սերգեյ Խաչատրյանը տեղեկացրեց, որ կլոր սեղանը նպատակ ունի բարձրաձայնելու խնդրի դեմ պայքարի կարևորությունը, քանի որ հարկավոր է հասկանալ, որ այս խնդրի դեմ պայքարելու համար անհրաժեշտ են միասնական ջանքեր և քայլեր:

«Դա կարող է լինել ազգային ծրագրի տեսքով, որոշակի միջոցառումների տեսքով, որոնք կարող են տալ իրենց դրական ադրյունքները: Հայաստանը դեռ չունի ազգային ծրագիր այս հարցով, և մեր առաջարկներից մեկն այսօր այստեղ հենց դա է լինելու, որպեսզի այդ ծրագիրը մշակվի, ընդգրկելով բնակչության թիրախային խմբերը: Ամենակարևորն այն է, որ այս հիվանդությունը կարելի է կանխարգելել»,- շեշտեղ փոխնախարարը:

Պաշտոնյան հիշեցրեց, որ օստեոպորզի չբուժելը բերում է հաշմանդամության և այդ իմաստով է շատ կարևոր հասկանալ, որ հիվանդությունը հնարավոր է կանխարգելել:

«Հաշմանդամությունը առաջանում է կոտրվածքների պատճառով, բայց խնդիրը նրանում է, որ մինչև այդ կոտրվածքների ի հայտ գալը կան բազմաթիվ մեթոդներ, որոնք հնարավորություն են տալիս վաղ ախտորոշել հիվանդությունը և կանխարգելել այն` դեղորայքի, սննդակարգի միջոցով և այլն»:

Սերգեյ Խաչատրյանը տեղեկացրեց նաև, որ այս տարվա հունիսից սկսած Հայաստանում ոսկորների խտությունը որոշող հետազոտությունը ներառվել է հետազոտությունների ցանկի մեջ և երկու բուժհաստատություններում, որոնք տեղակայված են Երևանում, այդ հետազոտությունն արվում է անվճար հիմունքներով.

«Սա առաջին անգամն է ու առաջին քայլն է և կարծում եմ, որ հաջորդ տարիների ընթացքում կընդլայնվի հայաստանյան հաստատությունների ցանկը, որոնք կարող են այդ հետազոտությունն իրականացնել: Մանավանդ, որ բարերար Ջոն Բիլեզիկյանի կողմից նվիրաբերվել և Հայաստան են բերվել յոթ դենսիտոմետրեր` սարքեր, որոնք էլ որոշում են ոսկորների խտությունը: Եվ սարքավորումների քանակով, և դրանց բաշխվածության առումով մենք համարվում ենք բավականաչափ հագեցած երկիր և ունենք բոլոր նախապայմանները հիվանդությունը կանխարգելելու համար»,- հավելեց ՀՀ առողջապահության փոխնախարարը:

Նշենք, որ քննարկման ժամանակ առաջարկվեց, որպեսզի օստեոպորոզի կանխարգելման և բուժման հիմնահարցերը ընդգրկվեն պետական առողջապահական գերակա ծրագրերում և օստեոպորոզը պետք է ընդունվի որպես սոցիալապես նշանակալի հիվանդություն: Կստեղծվեն կրթական ծրագրեր` ուղղված օստեոպորոզի կանխարգելմանը և բուժմանը, որոնք կնպաստեն առողջ ոսկրային համակարգ ունենալուն, ինչպես նաև կկանխարգելեն հաշմանդամության բերող ծանր բարդությունները: