Ձեր վստահելի աղբյուրը

Անիի նախկին ոստիկանապետի որդու` Հարություն Սարգսյանի նկատմամբ Շիրակի մարզի առաջին ատյանի դատարանի կայացրած դատավճիռը, որն ամփոփոխ է թողել նաև Վերաքննիչ դատարանը, բողոքարկվում է Վճռաբեկ դատարանում:

«Ակնհայտ է, որ Հայաստանի դատական համակարգը չի փոխվել, ինչքան էլ փորձեն ներկայացնել, որ արդար դատավարություններ են լինում, չենք հավատում, որովհետև ակնհայտ անմեղ անձը նման դեպքում չէր կարող գտնվել անազատության մեջ»,- լրագրողների հետ հանդիպման ժամանակ ասաց Հարություն Սարգսյանի շահերի պաշտպան Լուսինե Սահակյանը:

Նշենք, որ ՀՀ վերաքննիչ քրեական դատարանն անփոփոխ է թողել Շիրակի մարզի առաջին ատյանի դատարանի կայացրած դատավճիռը, որով Հարություն Սարգսյանը մեղավոր էր ճանաչվել Գյումրիի նախկին քաղաքապետ Վարդան Ղուկասյանի դստեր փեսացուին` Կարեն Եսայանին խանդի հողի վրա սպանելու մեջ և դատապարտվել 15 տարվա ազատազրկման` քրեական օրենսգրքի 104 հոդվածի 1-ին մասով (սպանություն) և 188 հոդվածի 1-ին մասի (ապօրինի ձեռնարկատիրություն) հատկանիշներով:
Ըստ մեղադրական եզրակացության, Հարություն Սարգսյանը դիտավորյալ սպանել է Կարեն Եսայանին խանդի հողի վրա. նա համակրել է Գյումրու քաղաքապետ Վարդան Ղուկասյանի դուստր Մանյա Ղուկասյանին և ցանկացել է ամուսնանալ նրա հետ, սակայն այդ նպատակով 2012թ փետրվարին Վարդան Ղուկասյանի մոտ գնացած հորը` Սամվել Սարգսյանին, աղջկա հարազատները մերժել են և աշխատասենյակից դուրս արել: Ըստ մեղադրանքի, 2012թ մարտի վերջերին Հարություն Սարգսյանը տեղեկացել է, որ Մանյա Ղուկասյանը 2012թ ապրիլի 12-ին նշանադրվելու է Կարեն Եսայանի հետ: Խանդի հողի վրա` նրանց նշանադրությունը խափանելու, միաժամանակ աղջկա հորից վրեժխնդիր լինելու նպատակով, Հարություն Սարգսյանը պլանավորել է սպանել Կարեն Եսայանին:

«Վճռաբեկ դատարանը ցույց է տալիս, թե իբր նորմալ դատական ակտեր է կայացնում: Այս գործն այն գործն է, որ Վճռաբեկ դատարանը պետք է ընդունի վարույթ, քննի, տեսնի՝ կան բազմաթիվ ապացույցներ,  որ Հարություն Սարգսյանը չէր կարող որևէ առնչություն ունենալ այդ սպանության հետ, արդարացման դատական ակտ կայացնի՝ ցույց տալով, որ կա արդարադատության: Դա կլինի իրենց համար ամենալավ PR-ը»,- ասաց փաստաբանը:

Այնուհետև փաստաբանը ներկայացրեց դեպքի հետ կապված մանրամասներ, նախաքննության ու դատաքննության ընթացքը:

«Վարդան Ղուկասյանը սկզբում դեմ է եղել, որ իր աղջիկն ամուսնանա Կարեն Եսայանի հետ, սակայն հետո համաձայնություն է տվել: Ապրիլի 12-ին նշանակված է լինում նշանադրությունը: Մինչ այդ Կարեն Եսայանին սկսում են հետապնդել: Սակայն նախաքննության ընթացքում ոչ ոք չփորձեց պարզել, թե ով է վարել այն մեքենան, որն անընդհատ հետապնդում էր Կարեն Եսայանին, թեև մենք բազմաթիվ անգամներ պահանջել ենք: Համարը հայտնի է եղել բոլորին: Նշանադրության նախորդ օրը նա մեքենան տանում է ավտոլվացման կետ, որից հետո, ըստ նախաքննության, իբր գնում է տուն: Դատարանում պարզվում է, որ այդպես չի եղել: Վկա գտնվեց, ով ցուցմուքն տվեց, որ նա ոչ թե տուն է գնացել, այլ մի կիսաքանդ տարածք, որտեղ հանդիպել է իր ընկերներին ու Վարդան Ղուկասյանի որդուն՝ Սպարտակ Ղուկասյանին իր ընկերների հետ: Երկար խոսակցություն է տեղի ունեցել նրանց մեջ, նաև վիճաբանություն: Սպարտակը պահանջել էր, որ Կարենը հաջորդ օրն իրենց տուն չգա: Նույնիսկ վկան խոսակցությունից մեջբերում է կատարել, որ Սպարտակն ասել է Կարենին՝ կքոռանաս, բայց քրոջս չես տեսնելու: Սպարտակը դեմ է եղել, որ քույրն ամուսնանա Կարեն Եսայանի հետ: Սակայն հայրը նրան հիշեցրել է իր եղբոր դստեր հետ կապված պատմությունը: Վարդան Ղուկասյանի եղբոր դստեր ընկերը նախքան նշանադրությունը սպանվում է: Սպարտակ Ղուկասյանը կրկին դեմ է եղել այս ամուսնությանը: Սպանվելուց հետո այդ աղջիկն ինքնասպանություն է գործում հենց Վարդան Ղուկասյանի տանը: Կիսաքանդ այդ վայրից հեռանալիս Կարեն Եսայանը շատ անտրամադիր է լինում: Այնուհետև նա 40 րոպե զրուցում է մի անձնավորության հետ: Նախաքննական մարմինը չի պարզել, թե ով է եղել այդ անձնավորությունը: Դրանից հետո Կարեն Եսայանն անհետ կորում է: Այնուհետև գտնում են նրա դիակը»,- պատմում է Լ. Սահակյանը:

Ըստ նրա, ոստիկանությունը սկսում է ամեն ինչ անել, որ գործով մեղադրվի Հարություն Սարգսյանը: Նա ոստիկանության բարձրաստիճան պաշտոնյաների կողմից դաժան ծեծի է ենթարկվում: Նրանց պահանջն է լինում Հարությունից ընդունել, որ ինքն է կատարել սպանությունը: Հարությունը չի ընդունում, իսկ ոստիկանությունը հայտարարում է, որ նա ընդունել է իր մեղքը, նույնիսկ ցույց է տվել այն վայրը, որտեղ գցել է զենքը, որով իբր սպանել է:

«Դեպքից երկու օր անց Բավրայի շրջանում հայտնաբերում են զենքը: Այդ եղանակին այնտեղ հաճախ են լինում տեղումներ՝ ձյան տեսքով: Իսկ զենքը հայտնաբերում ենք ձյան վրա: Ուղղակի գցել են ձյան վրա, գոնե ձյուն լցնեին վրան՝ իմիտացիա ստեղծելու համար: Այդ զենքը քննության ընթացքում չօգտագործվեց, որովհետև իրենք էլ շատ լավ գիտեին, որ մենք տեղյակ ենք, թե ինչպես են տարել, ինչպես են դրել այդ զենքն այդ հատվածում»,- ասում է Լուսինե Սահակյանը:

Նրա խոսքով, դեպքից անմիջապես հետո փորձաքննություն են նշանակում, Հարություն Սարգսյանի քթանցքներից, ականջախոռչներից, եղունգներից նմուշներ են վերցնում: Կրակոցի արգասիք չեն հայտնաբերում, մինչդեռ եթե մարդը կրակած է լինում, նրա մարմնի հիմնականում այդ հատվածներում կրակոցի արգասիքներ են հայտնաբերվում: Նաև արյան հետքեր չեն լինում նրա վրա: Մեքենայի վրա հայտնաբերում են մատնահետքերը, որոնք Հարությունինը չեն լինում:

«Կան անհերքելի ապացույցներ, որոնք ընդգրկված են քրեական գործում, սակայն դրանք ոչ նախաքննական մարմնին, ոչ էլ դատարանին չկանգնեցրեցին ու առանց որևէ ապացույցի Հարություն Սարգսյանին դատապարտեցին 15 տարվա ազատազրկման»,- ասաց փաստաբանը:

Իսկ ինչո՞ւ հենց Հարություն Սարգսյանը: «Ըստ մեղադրանքի, իբր նա ցանկացել է ամուսնանալ Վարդան Ղուկասյանի դստեր հետ, մերժում է ստացել: Սպանել է խանդի հողի վրա: Մինչդեռ Հարությունի բարեկամները, Վարդան Ղուկասյանի կողմնակիցները բազմաթիվ անգաներ նշել են, որ Հարություն Սարգսյանն ու Վարդան Ղուկասյանի դուստրը երբեք իրար չեն տեսել, իրար չեն ճանաչել, իրար հետ չեն շփվել: Հարությունն ունեցել է ընկերուհի, որի հետ պատրաստվել է ամուսնանալ հենց այդ տարվա աշնանը»,- ասաց Լ. Սահակյանը:

Նա նշեց, որ պահանջել է քննություն իրականացել այն ուղղությամբ, որ գործի հետ հնարավոր է առնչություն ունենա Սպարտակ Ղուկասյանը: Սակայն այդ ուղղությամբ որևէ քննություն չի կատարվել:

Նախորդող հրապարակումներ՝
Ակնհայտ ապօրինի դատական ակտ է կայացվել՝ Անիի նախկին ոստիկանապետի որդու նկատմամբ. փաստաբան
Վերաքննիչ դատարանում մեկնարկել է Անիի նախկին ոստիկանապետի որդու բողոքի քննությունը
Շիրակի մարզի դատավորը գնացել է ՔԿՀ և ամբաստանյալին տեղեկացրել պատժաչափի մասին