Ձեր վստահելի աղբյուրը

ՀՀ վարչապետ Հովիկ Աբրահամյանն այսօր Ազգային ժողովում լրագրողների հետ ճեպազրույցում անդրադառնալով փոխվարչապետի թափուր պաշտոնի հարցին՝ հայտնեց, որ այդ հարցը դեռևս որևէ մեկի հետ չի քննարկել: Դիտարկմանը, թե շրջանառվում են  Գագիկ Բեգլարյանի, Վարդան Այվազյանի անունները, վարչապետը պատասխանեց. «Դո՞ւք եք որոշում: Անկեղծ ասած, ոչ մեկի հետ ոչ մի հարց չենք քննարկել: Կքննարկենք»:

Հարցին, թե տեսակետ կա, որ ՀՅԴ-ին հրավիրում են կոալիցիա, գուցե ՀՅԴ-ին տա՞ն այդ պաշտոնը, Հ.Աբրահամյանը նկատեց, որ նորություն է լսում, մամուլը շատ բան է քննարկել:

Անդրադառնալով ընդդիմության այն պնդմանը, թե Հայաստանում կառավարման ճգնաժամ կա, Հ.Աբրահամյանն ասաց, որ նման բան չկա:

Նրա խոսքերով` բոլոր այն ծրագրերը, որոնք ներկայացնում են և Ազգային ժողովի հավանությանը որ կարժանանա, իրատեսական են, և կյանքի կկոչվեն 2015 թվականին:

«Ամեն դեպքում այսօր մեր հանդիպումները, մեր կառավարության ակտիվությունը, մեր այցելությունները փորձում են հիմքեր ստեղծել, որպեսզի մեր տնտեսության զարգացումն ապահովենք: Դուք բոլորդ գիտեք, որ այս արագ փոփոխվող աշխարհում մեծ խնդիրներ կան՝ տարածաշրջանային, Արևմուտք-Ռուսաստան հարաբերություններ, որոնք ուղղակի իրենց բացասական ազդեցությունը կարող են ունենալ Հայաստանի տնտեսության վրա: Բայց դրա համար մենք լրացուցիչ միջոցներ ենք փորձում փնտրել, քայլեր, նախաձեռնություններ, որպեսզի կարողանանք ապահովել 4 տոկոս տնտեսական աճը, որ մենք նախատեսում ենք 2015 թվականի բյուջեում»,- ասաց Հ.Աբրահամյանը:

Ամեն դեպքում, ըստ վարչապետի, իրենք այսօր հակված են առկա խնդիրներին տալ լուծում, քանի որ բազմաթիվ խնդիրներ կան, որոնց բոլորն էլ ականատես են լինում:

«Կառավարության առջև հավաքվում են բնակիչներ, որոնք ունեն տարիներով կուտակցված խնդիրներ: Դրանք պետք է մենք կամաց-կամաց լուծելով գնանք: Ունենք լուծելու նաև մեր սոցիալական խնդիրները, որ այսօր առկա են, որից որ այսօր ածանցվում է արտագաղթ, աղքատություն: Մենք պետք է ձեռնամուխ լինենք աղքատության նվազեցմանը և նաև արտագաղթի նվազեցմանը: Մենք հայտարարել ենք, դուք բոլորդ գիտեք, որ մեզ համար գերական մեր քաղաքացիներն են, մեր քաղացիների սոցիալական խնդիրներն են»,- նշեց վարչապետը:

Վարչապետ Հովիկ Աբրահամյանն անդրադառնալով եռյակի հանրահավաքին, մասնավորապես պատասխանելով հարցին, թե եռյակն ասում է՝ իշխանափոխություն է անում, արդյոք անհանգստացած չե՞ք, նշեց. «Ինչի՞, հանրահավաքի համա՞ր, բա ժողովրդավար երկիր ենք, պիտի հանրահավաք արվի: Իշխանափոխության մասին ես կոնկրետ որևէ հիմք չեմ տեսնում: Պահանջը 12 պլուս մեկ կետերի մասին է: Մենք գրավոր պատասխանել ենք»:

Հարցին, թե եռյակն ասում է, որ պահանջը իշխանափոխությունն է, վարչապետը նշեց, որ իշխանափոխություն ասելով չէ, պետք է հիմքեր լինեն: