Ձեր վստահելի աղբյուրը

Ֆրանսիայի նախագահ Ֆրանսուա Օլանդի հրավերով մոտակա օրերին Հայաստանի ու Ադրբեջանի նախագահների հանդիպումը Փարիզում նպատակ ունի նոր լիցք հաղորդել ղարաբաղյան հակամարտության կարգավորման գործընթացին: Լրագրողների հետ հանդիպման ժամանակ ասաց ՀՀ-ում Ֆրանսիայի արտակարգ և լիազոր դեսպան Անրի Ռենոն:

«Առանց մանրամասներ հաղորդելու՝ դիվանագիտական նպատակներից ելնելով նշեմ, որ Ֆրանսիայի նախագահը ցանկանում է նոր լիցք հաղորդել բանակցություններին բովանդակային իմաստով և գտնել հակամարտության կարգավորման լուծում»,- ասաց դեսպանը:

Երկրորդ նպատակը, ըստ նրա, երկու կողմերը կարողանան ստեղծել վստահության մթնոլորտ, որով պայմանավորված կլինի իրավիճակի փոփոխություն շփման գծի վրա կամ հայ-ադրբեջանական սահմանին:

Ա. Ռենոն ընդգծեց, որ ղարաբաղյան հակամարտություն կարգավորման միակ ճանապարահը բանակցային տարբերակն է, այլ ճանապարհ չկա: Նա նաև նշեց, որ ղարաբաղյան կարգավորման գործընթացը հանձնարարված է ԵԱՀԿ Մինսկի խմբին, այն Մինսկի խմբի բացառիկ իրավասությունների մաս է կազմում:

Պատասխանելով հարցին, թե արդյո՞ք ԵԱՀԿ Մինսկի խմբի ձևաչափի հեռանկար տեսնում եք, հաշվի առնելով օգոստոսին Սոչիում կայացած ՌԴ, ՀՀ ու Ադրբեջանի նախագահների հանդիպումից հետո հնչող այն խոսակցությունները, թե ՌԴ-ն ցանկանում է ձևաչափից դուրս գործընթաց ծավալել, Ադրբեջանն էլ իր հերթին է դժգոհում այս ձևաչափից, դեսպանը կրկնեց, որ ղարաբաղյան հակամարտության կարգավորումը գտնվում է ԵԱՀԿ Մինսկի խմբի բացառիկ իրավասության տակ և հենց այդ իրողությունից ելնելով էլ առաջիկայում Փարիզում կկայանա նախագահների հանդիպում: Դեսպանը խորհուրդ տվեց հնչող կարծիքներին, խոսակցություններին չհավատալ, դրանց մեծ մասը կեղծ են լինում: