Ձեր վստահելի աղբյուրը

«Ես գիտեմ ձեր դարդն ու ցավը ու գիտեմ դրանց լուծման ձևը: Ես ձեզնից մեկն եմ ոչ թե խոսքերով, այլ ամեն օր ձեր կողքին լինելով ու տեսնելով ժողովրդի կյանքն ու ապրելակերպը»,- Ազատության հրապարակում հայտարարեց ԲՀԿ առաջնորդ Գագիկ Ծառուկյանը իր` սպասված ելույթը սկսելով:

Թվարկելով բոլոր խնդիրները, որ այսօր առկա են` արտագաղթ, սոցիալական ճգնաժամ, նաև այն, որ ժողովրդի 90-95 տոկոսը բանկերի տոկոսների տակ են նա հայտարարեց, որ « Ծառուկյանին ոչ մի դժվարագույն խնդիրով չեն կարող վախեցնել»:

«Ծառուկյանը ամեն խնդիր ու դժվարություն տեսել է, բայց չի կոտրվել: 8-ը տարի է ասում են` Ծառուկյանը չի անի, Ծառուկյանը չի գնա, Ծառուկյանի ինչին է պե՞տք: Բայց պետք է մեկը լինի, որովհետև ազգովի պետք է լավ լինենք, ոչ թե մեկ մարդ լավ լինի և այսօր չկա մի բան, որ Ծառուկյանը ասած լինի ու չանի: Ինչ խոսք եմ տվել` ժամանակից շուտ արել եմ»,- հայտարարեց նա:

Նրա խոսքով` որոշողը ժողովուրդն է և եթե ժողովուրդը միասնական լինի մեկ մարդու պես, ապա անմիջապես ինչ քայլ կատարեն` դա լուծելի է լինելու:

«Ինչ սկսել ենք, պետք է ավարտենք, ես ձեր կողքին եմ մինչև վերջ, մինչև մեր խնդիրների լուծումը»,- շեշտեց նա, իսկ հետո ընթերցեց որոշ դիտարկումներ:

«Ձեզ հետ միասին մենք իրացնելու ենք հանրային պահանջը, այն է` անհարժեշտ են նոր որակի իշխանություն և նոր քաղաքականություն: Կյանքը պարտադրում է գնալ արմատական փոփոխությունների, որոնք Հայաստանում անխուսափելի են: Մենք կողմ ենք իշխանությունների խաղաղ անցմանը: Մենք Մայդանի կոչ չենք անում, բայց դրա այլընտրանքը չպետք է լինի լճացումը: Ոչ ոք Հայաստանում չպետք է մնա դիտորդի դերում»,- նշեց նա:

Հաջողության համար, ըստ Գ.Ծառուկյանի, չափազանց կարևոր է ներքին մթնոլորտը: Նա հատուկ ընդգծեց, որ ԲՀԿ-ն չունի թշնամի և առհասարակ ` երկրին պետք չեն ներքին թշնամիներ.

«Որևէ մեկի մոտ կասկած չպեքտ է լինի, որ շարժման այս ալիքով մենք հասնելու ենք մեր նպատակների իրականացմանը: Բայց առանց ժողովրդի համաձայնության ոչինչ չի արվելու: Այսօրվանից սկսած ողջ ՀՀ-ում սկսում ենք համաժողովրդական շարժման շտաբների ձևավորում, ցանկացած պահին ժողովրդին մոբիլիզացնելու համար դուք դառնալու եք մշտական գործող համակարգողներ բոլոր բնակավայրերում: Ես կարևորում եմ յուրաքանչյուր քաղաքացու ակտիվ մասնակցությունն ու դերակատարումը»,- հայտարարեց նա:
Գ.Ծառուկյանը շեշտեց, որ իրենք շատ ժամանակ չունեն, բայց ինչ էլ անեն, անելու են խուսափելով մայդաններից ու ցնցումներից: Գոյություն ունեցող լրջագույն խնդիրները հստակ ժամանակացույցով լուծվելու են և եթե իշխանությունը շարունակի անտեսել այս շարժման պահանջը.

«Ապա մենք երեք ուժերով ու համախոհներով փողոցում և հրապարակներում կանգնած հարյուր հազարներով կպարտադրենք իշխանափոխություն, նոր իշխանություն: Մեր գործն արդար է»,- ընդգծեց նա:

Իսկ վերջում հայտարարեց մի բան, ինչը հաստատ «Ժառանգություն» կուսակցության առաջնորդի սրտով չի կարող լինել.
«Ոչ մի նստացույց չի լինելու`մինչև մենք եռյակով ընդհանուր հայտարարի չգանք: Եթե հարկ լինի` հաջորդ հանրահավաքում դա կանենք»,- հավելեց իր խոսքը Գ.Ծառուկյանը, իսկ հավաքվածները առաջնորդների գլխավորությամբ բռնեցին խաղաղ երթի ճանապարհը:

Հիշեցնենք, Ր.Հովհաննիսյանն իր բոցաշունչ ելույթում հայտարարեց, թե ազատամարտիկների կողմից առաջարկություն կա՝ այսօրվանց Ազատության հրապարակում նստել նստացույցի:

«Թողնում եմ, որ Ծառուկյանն ասի: Ես որպես քաղաքացի կողմ եմ այդ առաջարկությանը»,- նշել էր նա:

Հարակից հրապարակում`
Րաֆֆի Հովհաննիսյան. Մեզ պետք է հեղափոխություն