Ձեր վստահելի աղբյուրը

Ադրբեջանի իշխանությունների բռնաճնշումները քաղաքացիական հասարակության և ընդդիմության դեմ զգալիորեն նվազեցնում են 2015-ի խորհրդարանական ընտրությունների նախօրեին հակակառավարական ցույցերի հավանակությունը, հաղորդում է բրիտանական «Ջեյնս» ռազմական վերլուծական կայքը:

Համաձայն աղբյուրի՝ հոկտեմբերի 6-ին Նորվեգիայի Հելսինկյան կոմիտեի որոշմամբ՝ Անդրեյ Սախարովի անվան Անկախության մրցանակը շնորհվել է Ադրբեջանի 98 քաղբանտարկյալներին: Ընթացիկ տարվա սկզբից ի վեր Ադրբեջանի իշխանություններն աննախադեպ հետապնդումներ են սկսել ընդդիմության ու քաղաքացիական հասարակության դեմ՝ ձերբակալելով հայտնի ակտիվիստների ու իրավապաշտպանների: Սեպտեմբերին Ադրբեջանի գլխավոր դատախազության ներկայացուցիչները խուզարկում են կատարել Միջազգային հետազոտությունների ու փոխանակման ամերիկյան ինստիտուտի (IREX) գրասենյակում: Ադրբեջանի կառավարությունը սառեցրել է IREX-ի ու Transparency International կազմակերպության բանկային հաշիվները:

«Ջեյնսի» հետազոտությունների տվյալներով՝ Ադրբեջանում քաղաքացիական հասարակության դեմ բռնաճնշումները կազմակերպել է երկրի նախագահի աշխատակազմի ղեկավար ու ներքաղաքական հարցերում Իլհամ Ալիևի գլխավոր խորհրդական Ռամիզ Մեհթիևը՝ ի պատասխան Ուկրաինայում նախագահ Վիկտոր Յանուկովիչին գահընկեց անելուն:  Յանուկովիչի հեռացումը սրել էր կասկածները, որ արտասահմանից ֆինանսավորվող ՀԿ-ները կիրառվելու են Ադրբեջանում քաղաքացիական հուզումներ արթնացնելու համար:

Թուլացնելով քաղաքացիական հասարակությունն ու ընդդիմությունը՝ նախագահ Իլհամ Աիևը հույս ունի խուսափել ցույցերից 2015-ի խորհրդարանական ընտրությունների նախօրեին: Ամենայն հավանականությամբ բռնաճնշումները կարող են հանգեցնել ընտրություններում իշխանության հավանությանն արժանացած արդյունքների:

Արցախի և Ադրբեջանի շփման գծում հրադադարի ռեժիմի խախտումներն օգոստոսի 1-ին հանգեցրել էին առաջնագծում լարվածության սրմանը: Այնուհետև ՌԴ նախագահ Վլադիմիր Պուտինը կազմակերպել էր Հայաստանի և Ադրբեջանի նախագահների հանդիպումը Սոչիում: Ադրբեջանի մի շարք ռազմական փորձագետների կարծիքով՝ Ալիևին ասել էին, որ նա պետք է հրաժարվի Արցախյան հակամարտության լուծման բոլոր ռազմական ճանապարհներից:

Փորձելով նվազեցնել սպառնալիքը հայկական բալիստիկ հրթիռներից՝ Ադրբեջանը զարգացնում է իր հակաօդային պաշտպանությունը (ՀՕՊ): Այն թերևս ստեղծվել է իսրայելական «Երկաթե գմբեթ» ՀՕՊ համակարգի սկզբունքներով և կատարում է Ադրբեջանի հիմնական պետական կառույցները, ռազմական օբյեկտները, էներգետիկ ենթակառուցվածքները (այդ թվում Սանգաչալի տերմինալը) հայկական կողմի հավանական հարձակումներից պաշտպանելու գործառույթ: Ըստ աղբյուրի՝ Հայաստանը կարող է կիրառել Սկադ-Բ բալիստիկ հրթիռներ և Տոչկա-Ու մարտավարական հրթիռային համալիր, որոնք տրամադրել է Ռուսաստանը:

Ուկրաինայում ներկայիս իրավիճակը ստեղծում է ռազմավարական անորոշություն՝ ավելացնելով հավանակությունը, որ Ադրբեջանի կառավարությունը կզգուշանա սադրանքներից՝ հենվելով հաշվարկներում սխալվելու բարձր հնարավորության վրա: Վերջապես, Ադրբեջանում են անցկացվելու 2015-ի միջազգային սպորտային խոշորագույն իրադարձությունները՝ Առաջին եվրոպական խաղերը, իսկ 2016-ին՝ 42-րդ շախմատային օլիմպիադան ու Ֆորմուլա-1-ի Եվրոպայի Գրան-պրին: Այս ամենը նվազեցնում է պատերազմի սպառնալիքն առաջիկա 3 տարիների ընթացքում:

Հենվելով ադրբեջանական աղբյուրների վրա՝ կարելի է ենթադրել, որ Սիրիայում կռվում են 100-400 ադրբեջանցի զինյալներ, և ավելի քան 100-ը սպանվել են մարտական գործողություններում: Ընդ որում, նրանց մեծ մասը Սումգայիթ քաղաքից է, որը երրորդ խոշորագույն քաղաքն է Ադրբեջանում: Ադրբեջանցի գրոհայիններն օգտագործում են Թուրքիայի հետ առանց վիզայի մուտքի ռեժիմի հանգամանքը՝ Սիրիա հասնելու նպատակով: Մի քանի գործոններ են բերել նրան, որ Սումգայիթը դարձել է սուննիական ծայրահեղականության թեժ օջախ. Սումգայիթում և երկրի հյուսիսային շրջանների այլ թեժ կետերում, որոնք բնակեցված են էթնիկ փոքրամասնություններով (Գուսարի և Գախի շրջաններ), ոստիկանությունը պարբերաբար ռեյդեր է կազմակերպում, նշում է «Ջեյնսը»: