Ձեր վստահելի աղբյուրը

Վերջին օրերին թուրք և իրանցի բարձրաստիճան պաշտոնյաների՝ միմյանց հասեցին ուղղված քննադատական հայտարարությունները վկայում են, որ Թեհրանի և Անկարայի միջև առկա փոխադարձ անվստահությունն ավելի է խորանում: Իրանական «Թաբնաք.իռ» կայքի հաղորդմամբ՝ Թուրքիայի նախագահ Ռեջեբ Թայիփ Էրդողանը Մարմարայի համալսարանում ունեցած ելույթի ընթացքում Իրանի հոգևոր առաջնորդ Ալի Խամենեիի հասցեին վիրավորական հայտարարություններ է հնչեցրել: Իսկ Իրանի ԱԳՆ բարձրաստիճան դիվանագետներից մեկն օրերս հայտարարել էր, որ եթե Թուրքիան չմիջամտեր Սիրիայի ներքին գործերին, ապա մարդկային բազմաթիվ կորուստներ չէին լինի և հակամարտությունն էլ լուծված կլիներ:

Եթե Սիրիայի հարցում Իրանը փորձում էր Թուրքիայի հետ ստեղծել համագործակցության ինչ-որ ձևաչափ, ապա Իրաքում «Իսլամական պետության» ի հայտ գալուց հետո Անկարայի գործողություններն անհագստացրին պաշտոնական Թեհրանին, քանի որ այդ պարագայում ուղղակի սպառնալիքի տակ էին հայտնվում իր երկրի սահմանները:

Թուրքիայի վարած երկակի քաղաքականության վերաբերյալ բավական դիպուկ էր արտահայտվել Իրանի ԱԳ նախարարը՝ նշելով, որ չի կարելի Իրաքում պայքարել «Իսլամական պետության» դեմ, իսկ Սիրիայում՝ դրան աջակցել:

Տարածաշրջանային զարգացումների ֆոնին Թուրքիայի վաղեմի մրցակից Իրանը գտնվում է շահեկան դիրքում: Իրանի դաշնակից Սիրիայի նախագահ Բաշար ալ-Ասադը ոչ միայն կարողացավ պահպանել իշխանությունը, այլև Իրաքի շիա ազգաբնակչության և քրդերի շրջանում զգալիորեն մեծացավ իրանցիների հեղինակությունը: Մինչ Միացյալ Նահանգներն ու նրա դաշնակիցները, Իրանին անտեսելով, նախապատրաստվում էին «Իսլամական պետության» դեմ պայքարելու նպատակով դաշինք ձևավորել, Իրանի Իսլամական հեղափոխության պահապանների կորպուսի (ԻՀՊԿ) ենթակայությամբ գործող «Ղոդս» ուժերի հրամանատար, գեներալ Ղասեմ Սոլեյմնանին ակտիվ գործունեություն է ծավալում Իրաքում:

Իրաքի և Սիրիայի հարցում Թուրքիայի ձախողված քաղաքականության հետևանքով այդ երկիրը ողջ աշխարհում ձեռք է բերել ահաբեկչական խմբավորումներին աջակցող երկրի համբավ: Իսկ տարածաշրջանային լիդեր լինելու համար Իրանի հետ մղվող պայքարում իր դիրքերն աստիճանաբար զիջում է:

Հաշվի առնելով իրանաթուրքական հարաբերություններում տեղի ունեցող զարգացումները՝ կարող ենք կանխատեսել, որ առաջիկայում Թուրքիան իր դարավոր մրցակից Իրանին թուլացնելու և այդ երկրում անկայունություն առաջացնելու նպատակով կիրականացնի մի շարք սադրիչ գործողություններ, ինչպիսիք են՝ Ա. Իրանի Արևմտյան Ատրպատական նահանգում ապրող ազարիների և քրդերի շրջանում էթնիկական բախումներ հրահրելը:

Բ. Թուրքիայում և Ադրբեջանում գործող պանթյուրքական խմբավորումների՝ հակաիրանական գործողությունների ակտիվացում:

Արմեն Իսրայելյան, իրանագետ

Նախորդող՝
Իրանին կրկին մասնատման վտանգ է սպառնում. Արևմտյան Ատրպատականը՝ «Անկախ Քուրդիստանի» կազմում
Իրանի նախագահը 18 տարվա ընդմիջումից հետո մեկնում է Թուրքիա. Ի՞նչ խնդիրներ կան օրակարգում