Ձեր վստահելի աղբյուրը

«Եթե ներկայումս Ադրբեջանում մոտ 600 հազար հաշմանդամներ կան, ապա նրանց 10 տոկոսը երեխաներ են: Այս հարցի հիմքում ընկած է տգիտությունը»: Այս մասին ադրբեջանական ԱՊԱ լրատվական գործակալությանն ասել է Ադրբեջանի խորհրդարանի՝ սոցիալական քաղաքականության գծով հանձնաժողովի նախագահ Հադի Ռաջաբլին:

Նրա խոսքերով, երբ զույգերն ամուսնանում են, չեն իմանում իրենց ունեցած հիվանդությունների մասին, ուստի լույս աշխարհ են բերում հիվանդ երեխաների: Եթե զույգերը հանդիսանում են հիվանդության կրողը, ապա նրանց երեխաները ևս առողջական խնդիրներով են ծնվում: Այս հարցում դժվարություններ է ստեղծում այն, որ որոշ երկրներում տղայի կամ աղջկա առողջականին վերաբերող տեղեկությունը փակ է, չի տարածվում:

Ռաջաբլի շոշափել է նաև Ադրբեջանում ծննդաբերության ժամանակ կանանց ու երեխաների մահվան հարցը: Նա շեշտել է, որ երեխաները ծնվում են տալասսեմիայով ու հեմոֆիլիայով:

«Ամեն տարի Ադրբեջանում ծնվում են տալասսեմիայով հիվանդ 200, հոմոֆիլիայով հիվանդ՝ 300 երեխաներ: Դրանց հետևանքները շատ ծանր են, քանի որ հանգեցնում են հաշմանդամության»,-նկատել է Ռաջաբլին:

Նշենք, որ նշված արյան հիվանդությունները հանդիսանում են Ադրբեջանում բավականին տարածված արյունակիցների միջև ամուսնությունների բացասական հետևանքներից մեկը: Այդպիսի ընտանիքներում ծնված երեխաների մոտ 70 տոկոսը տառապում են տարբեր անբուժելի հիվանդություններով: Ըստ համաշխարհային վիճակագրության՝ 100 հոգուց միայն մեկն է հեմոֆիլիայով հիվանդ, մինչդեռ Ադրբեջանի մի շարք բնակեցված վայրերում դրանով տառապող հիվանդների թիվը հասնում է 100-ի, նրանց մեծ մասն էլ երեխաներ են: Վերջին 30 տարիների ընթացքում Ադրբեջանում հեմոֆիլիայով հիվանդների թիվն աճել է 5 անգամ: Ներկայումս Ադրբեջանում այդ հիվանդության կրողներն են ավելի քան 3 հազար քաղաքացիներ, և նրանց թիվը շարունակում է աճել: