Ձեր վստահելի աղբյուրը

«Ղարաբաղի պաշտոնական տեսակետը չի կարող ուրիշ լինել, քան մենք դա ասում ենք` Ղարաբաղը ձգտում է միջազգային ճանաչման: Այդ թիրախը ոչ միայն Ղարաբաղի, այլև Հայաստանի համար է կարևոր»,-ԱԺ-ում լրագրողների հետ հանդիպմանը հայտարարեց ԼՂՀ ԱԺ նախագահ Աշոտ Ղուլյանը` ի պատասխան այն հարցի, թե ինչպես է վերաբերում , որ տևական ժամանակ է «Ժառանգությունը» օրակարգ է բերում ԼՂՀ-ն ճանաչելու մասին նախագիծ, որը մերժվում է և արդյոք իրենք ուզում են, որ Հայաստանը ճանաչի Լեռնային Ղարաբաղի անկախությունը:

Նա նաև ասաց, որ Ղարաբաղում ոչ մեկ չի կարող ասել, թե դեմ է, որպեսզի Հայաստանը ճանաչի ու առհասարակ` ճանաչմանը դեմ է:

«Տեսակետ կա, - նշեց նա,- որ դա կարող է լինել Հայաստանի կողմից, հետո նոր միջազգային հանրության կամ միջազգային ճանաչում լինի, նոր վերջում ճանաչի Հայաստանը»:

«Կարևորն այն է, որ Ղարաբաղի միջազգային ճանաչման գործընթացը սկսված է»,- շեշտեց նա:

Տեղեկացրեց նաև, որ վերջերս այս հարցը քննարկել է նաև «Ժառանգության» հետ, բայց ինքն այն կարծիքին է, որ անընդունելի է այն տարբերակը, որով այդ հարցը փորձ է արևվում մտցնել ՀՀ ԱԺ օրակարգ:

«Մեզ համար ընդունելի է, եթե բոլոր խմբակցությունները կենսենսուսով բերեն այդ հարցը քննարկման»,- ընդգծեց նա:

ԼՂՀ ԱԺ նախագահի խոսքով, իրենց մտահոգում է, որ Ադրբեջանը տարիներ շարունակ միջազգային հարթակներում խեղաթյուրում է իրականությունը:

Նրա խոսքով, դա ողբերգություն է Ադրբեջանի համար, որ շարունակ չի հաջողում` անգամ իր խավիարային դիվանագիտության միջոցով.
«Մենք պետք է ակտիվ համագործակցենք այս ուղղությամբ: Ես կարծում եմ, որ Ղարաբաղի համար հիմնական միջոց շարունակում է մնալ պատմական արդարությունը և այն բոլոր պատմական ու քաղաքական փաստարկները, որոնք 90-ականներին ներկայացրել ենք Ղարաբաղի ինքնորոշման համար»:

Նա նաև ընդգծեց, թե միանշանակ է, որ Ադրբեջանն այսօր ժամանակ է ձգում, պարբերաբար փոխում իր տեսակետը` բանակցային գործընթացի վրա ազդելու համար: