Իլհամ Ալիևն ընտրություններից 4 տարի առաջ կեղծ սոցհարցումներով փորձում է բարձրացնել իր վարկանիշը. «Ազադլիգ»
Ադրբեջանի իշխաննություններից սնվող «Ռեյ» մոնիթորինգային կենտրոնը Բաքվում սոցհարցում է անցկացրել, որի արդյունքները ցույց են տվել՝ եթե նախագահական ընտրություններն անցկացվեին գալիք կիրակի, ապա սոցհարցման մասնակիցների 83 տոկոսն իր ձայնը կտար ներկայիս նախագահ Իլհամ Ալիևին, 82 տոկոսը դրական պատասխան է տվել «Իլհամ Ալիևը բավարարո՞ւմ է ձեր շահերին» հարցին, 65 տոկոսն էլ նախագահի պաշտոնում Ալիևին այլընտրանք չի տեսնում: Ադրբեջանական «Ազադլիգ» թերթը պնդում է, որ այս կեղծ հարցումները միտված են Ալիևի վարկանիշն արհեստականորեն բարձրացնելուն:
«Ազադլիգ»-ը գրում է, որ հարցումներն Ադրբեջանում ընտրությունների նկատմամբ մարդկանց հավատի անկման պայմաններում գնահատվում են որպես իշխանության՝ ավանդույթի վերածված քարոզչություն, այլապես անհասկանալի է նախագահական ընտրություններից 4 տարի առաջ անցկացվող նման սոցհարցումը:
Թերթի կարծիքով` վերջին շրջանում Արևմուտքը բազմիցս շեշտել է Ադրբեջանում ավտորիտար վարչակարգի առկայության մասին, և հնարավոր է` Ադրբեջանի հասարակության մեջ այդ մտքի ամրապնդումից խուսափելու համար իշխանությունը կեղծ ճանապարհով վարկանիշ է ստեղծում: Մյուս պատճառն էլ թերևս վերջին օրերին նախագահի աշխատակազմի ղեկավար Ռամիզ Մեհտիևի` իշխանության ձախողման մասին խոստովանությունն է, որից պարզ դարձավ, թե բոլոր բնագավառներում իրավիճակն աղետալի է, ուստի հարցումն անցկացվում է ցանկացած վիճակում Իլհամ Ալիևին այլընտրանք չլինելը ցույց տալու համար:
«Ազադլիգ»-ը նաև հավաստիացում է՝ այս հարցումն անվստահելի է, քանի որ եթե Ալիևի վարկանիշն իրականում բարձր լիներ, ապա ընտրությունների կեղծման ու քաղաքական ակտիվիստներ ձերբակալելու կարիք չէր լինի:
«Եթե Իլհամ Ալիևը վարկանիշի խնդիր չունենար, երկրում ընդդիմադիր կուսակցության գրասենյակը չէր պայթեցվի, ընդդիմության առաջնորդի նկատմամբ արգելքներ չէին դրվի և նրա դեմ երկրի մամուլում բամբասանքների արշավի պատվեր չէր տրվի: Այս իշխանության իրական վարկանիշը հայտնի է և՛երկրի ներսում, և՛ դրա սահմաններից դուրս», -եզրափակում է թերթը:
Նյութեր թեմայի շուրջ`
Նույնիսկ Ադրբեջանի նախագահի աշխատակազմում աշխատանքի համար անհնար է որակյալ կադրեր գտնել. Քաղաքագետ
Telegraph. Ալիևի վարկանիշը բարելավելու ջանքերը հակառակ էֆեկտի են հանգեցրել
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
