Ձեր վստահելի աղբյուրը

«Իրանը հրթիռային համակարգերի հարցը երբեք բանակցությունների առարկա չի դարձնի»,-այդ մասին իրանական «ՖԱՐՍ» լրատվական գործակալության հաղորդմամբ՝ հայտարարել է Իրանի իսլամական հեղափոխության պահապանների կորպուսի (ԻՀՊԿ) ռազմաօդային ուժերի հրամանատար, գեներալ Ամիր Ալի Հաջիզադեն:

ԻՀՊԿ ռազմաօդային ուժերի հրամանատարը, լրագրողների հետ հանդիպմանը անդրադառնալով Իսրայելի այն պնդումներին, որ միջուկային խնդրի շուրջ ընթացող բանակցությունների ընթացքում Իրանի հրթիռային համակարգերի հարցը ևս պետք է քննարկվի, մասնավորապես նշել է. «Այն, որ պահանջում են, որպեսզի բանակցությունների ընթացքում քննարկվի նաև հրթիռային համակարգերի հարցը, վկայում է մեր ռազմական կարողության մասին:

Եթե կարողանային, ապա մեր բալիստիկ հրթիռները կխոցեին, այլ ոչ թե բանակցության առաջարկություն կանեին: Մենք հրթիռային համակարգերի վերաբերյալ երբեք բանակցություններ չենք վարի, դրանք մեր ձեռքբերումներն են՝ մեր անվտանգության երաշխավորը»:
Իրանական «Իրդիփլոմասի.իռ» կայքի հաղորդմամբ՝ Իսրայելի վարչապետ Բենիամին Նեթանյահուն, անդրադառնալով Օմանում Իրանի, ԱՄՆ-ի և ԵՄ-ի ներկայացուցիչների մասնակցությամբ միջուկային խնդրի շուրջ ընթացող բանակցություններին, մասնավորապես նշել է. «Միջազգային հանրությունը ներկայում ընտրության առջև է կանգնած. Կամ տեղի է տալու Իրանի ցանկություններին, որը սպառնալիք է ոչ միայն Իսրայելի, այլև ողջ աշխարհի համար, կամ էլ հաստատակամ շարունակելու է իր գործողությունները, մինչև Իրանը կզրկվի միջուկային ռումբ ստեղծելու կարողությունից»:

Հիշեցնենք, որ Իսրայելի պաշտպանության նախարար Մոշե Յալոնը, օրերս «Israel Hayom» պարբերականին տված հարցազրույցում, անդրադառնալով Իրանի միջուկային խնդրի շուրջ տեղի ունեցող զարգացումներին, նշել էր, որ Իսրայելն ու ԱՄՆ-ն Իրանի միջուկային ծրագրի հարցում տարաձայնություններ ունեն: Յալոնը պնդել էր, որ բանակցությունների ընթացքում պետք է քննարկվեն բոլոր հարցերը, այդ թվում՝ հրթիռային համակարգերին ու ցենտրիֆուգներին առնչվող հարցեր: