Ձեր վստահելի աղբյուրը

«Մենք հավատում ենք, որ 12-ից ունենք կետեր, որոնք առանց ճանապարհային քարտեզի, ինչ-որ ֆինանսական միջոցների հնարավոր է իրականացնել: Օրինակ` Ընտրական օրենսգրքի փոփոխությունները: Այնպես որ, եթե իսկապես կա ցանկություն, ապա իրենք կարող են միանգամից այս առաջարկով հանդես գա»,- եռյակի հերթական նիստի ավարտին լրագրողների հետ ճեպազրույցում ասաց «Ժառանգություն» խմբակցության ղեկավար Ռուբեն Հակոբյանը` անդրադառնալով ՀՀ նախագահ Սերժ Սարգսյանի հարցարզույցին, որում ասված էր, որ հնարավոր է վերանայել քառյակի 12 կետերը:

Նա ևս մեկ անգամ կրկնեց.« Եթե իսկապես կա ցանկություն և Սերժ Սարգսյանն ու իշխանությունները անկեղծ են, ապա սրանով կարող են սկսել: Հիմա մնում է սպասել, թե ինչքանով են անկեղծ նրանք իրենց ուղերձներում»:

«Ես առայժմ առանձնացնում եմ մի դեպք, որը մեկ-մեկուկես ժամում կարող են ԱԺ արտահերթ նիստում այդ փոփոխություները կատարել ԸՕ-ում: Եթե նրանք այդպիսի քայլ կատարեն, ապա դրանից հետո կտեսնենք, որ իսկապես կա ցանկություն համատեղ աշխատել այս իրավիճակից դուրս գալու համար»,- նշեց Ռ.Հակոբյանը:

Նա նշեց, որ եռյակը չի ասում, թե պատրաստ է գնալ, նստել ու քննարկել իշխանությունների հետ, այլ ասում է, որ առաջին քայլը նրանք պետք է անեն` սկսելով իրենց 12 կետերից 10-րդից:

«Սա այն կետն է, որ նախագիծը պատրաստ է և ոչ ժամանակ է պահանջում, ոչ էլ ֆինանսներ, միայն ցանկություն: Առավել ևս, որ նախագիծը պատրաստ է, կա նաև տրամադրություն: Ոչ թե անպայման սրա մասին է խոսքը, այլ այս կետը արագ իրականացվող է, դրա համար ենք նշում հենց այն»,- ասաց ընդդիմադիր պատգամավորը:

Արդյո՞ք կապ կա Սերժ Սարգսյանի վերջին հարցազրույցի ու այդ շեշտադրումների և նրա ու Գագիկ Ծառուկյանի հանդիպման միջև հարցին Ռ.Հակոբյանը հրաժարվեց պատասխանել, փոխարենն ասաց. «Հայաստանում համաժողովրդական շարժում է ձևավորվել, հրապարակային դաշտով ընդդիմությունը ներկայացրել է իր մոտեցումները, ժողովրդի մեծ մասն էլ կանգնել մեր կողքին: Այնպես որ տրամաբանական էր, որ նման առաջարկ պետք է հնչեր, բայց արդյո՞ք դա ցանկություն է, թե իմիտացիոն ֆոն են ստեղծում` սա է հարցը: Ի դեպ, եթե սա իսկապես իմիտացիոն գործընթաց է, ապա նրանց արձագանքից դա անմիջապես կերևա»:

Նրա խոսքով, մինչ այս պահը ԲՀԿ-ից պաշտոնապես չի էլ հաստատվել, որ նման հանդիպում եղել է:

Ռ.Հակոբյանը շեշտեց` որևէ բանակցություն իշխանությունների հետ, մինչև իր ասածը չլինի ու որևէ քննարկում իշխանությունների հետ չի լինելու: Ի դեպ, նա հավելեց, որ առայժմ չի տեսնում այն հարթությունը, որում հնարավոր է կոնսենսուսի հասնել իշխանությունների հետ: