Ձեր վստահելի աղբյուրը

Համաձայն ԱՄՆ պետքարտուղարության տարեկան զեկույցի` ԱՄՆ բարձրագույն պաշտոնատար անձինք, այդ թվում` Բարաք Օբաման ու Առաջին տիկինը, 2013 թվականին թանկարժեք նվերներ են ստացել ադրբեջանցի պաշտոնյաներից: Այս մասին տեղեկացնում է ադրբեջանական «Թուրան» լրատվական գործակալությունը:

Նյութում նշված է, որ խոսքը մասնավորապես ԱՄՆ-ում Ադրբեջանի դեսպան Էլին Սուլեյմանովի մասին է, որը 2013 թ. դեկտեմբերի 5-ին ԱՄՆ նախագահ Բարաք Օբամային նվիրել է ադրբեջանական գորգ` կարմիր, սպիտակ ու կապույտ երկրաչափական նախշերով: Գորգի արժեքը, ըստ աղբյուրի, 6560 ԱՄՆ դոլար էր: Միևնույն ժամանակ, Միշել Օբաման ստացել է ադրբեջանական ավանդական կարմիր գլխաշոր` 435 ԱՄՆ դոլար արժողությամբ:

Անցած տարվա դեկտեմբերին Վաշինգթոնում պետքարտուղար Ջոն Քերիին ևս ընծայվել է ձեռագործ մետաքսե գորգ` 760 ԱՄՆ դոլար արժողությամբ: Բացի այդ, նոյեմբերին Բաքվում դեսպան Ռիչարդ Մորնինգսթարին նվիրել են 625 դոլարի մետաքսե գորգ: Ադրբեջանի պաշտպանության նախկին նախարար Սաֆար Աբիևը, լինելով Վաշինգթոնում օգոստոս ամսին, նվիրել է իր ամերիկացի պաշտոնակից Չաք Հեյգելին 600 ԱՄՆ դոլարի արժեք ունեցող գինիների կոմպլեկտ:

Բացի նվերներից, ադրբեջանցի պաշտոնյաները նաև հոգացել են անցած տարվա օգոստոսին ԱՄՆ բարձրաստիճան պետական պաշտոնյաների` Բաքվից Փարիզ բիզնես-կլաս չվերթի ծախսերը, ասված է պաշտոնական զեկույցում:

«Հատկանշական է, որ այդ փաստաթուղթն ասպարեզ է իջել ժամեր առաջ այն բանից, երբ մի քանի ամերիկացի ընտրական առաջատար պաշտոնատար անձինք պետք է նոյեմբերի 12-ի երեկոյան ներկայանան դեսպան Սուլեյմանովի ու ադրբեջանցի նախարարի որդու հետ շքեղ գալա ընթրիքին»,- գրում է «Թուրանը»:

Ինչպես հիշատակված է հոդվածում, հրավիրվածների շարքում են ԱՄՆ նախագահի աշխատակազմից, Կոնգրեսից, դիվանագիտական կորպուսից ու վերլուծական կենտրոններից տասնյակ անձինք: Պատվավոր հյուրերի շարքում են տասնյակ օրենսդիրներ, այդ թվում` կոնգրեսմեններ Քորրին Բրաունը, սենատոր Ռիչարդ Բերրը, կոնգրեսմեններ Մարսիա Ֆուջը, Մայքլ Ֆիցպատրիկը, Սթիվ Քոենը, Քորի Գարդները, Ջին Գրինը, Բիլլի Լոնգն ու շատ ուրիշներ: Այնուամենայնիվ, ինչպես նշված է հոդվածում, այս անձանցից և ոչ մեկը չի ցանկացել մեկնաբանել իր ներկայությունն ընթրիքին:

Համաձայն աղբյուրի` միջոցառման պաշտոնական կազմակերպիչն Ադրբեջանաամերիկյան դաշինքն է, որը ղեկավարում է Ադրբեջանի տրանսպորտի նախարարի որդին` Անար Մամեդովը:

Գործակալությունը հիշեցնում է, որ Foreign Policy ամսագրի տվյալներով` 2012-ին Մամեդովը վճարել է ոչ պակաս, քան 2 մլն ԱՄՆ դոլար նման գալա ընթրիքի համար: Ըստ նույն աղբյուրի` 2013-ին Մամեդովի կազմակերպությունը վճարել է 5 մլն դոլար Fabiani & Co լոբբիստական խմբին` ԱՄՆ-ի պաշտոնատար անձանց հետ կապերն ամրապնդելու նպատակով:

Նախորդիվ`
Ադրբեջանը փող է ծախսել, որ Օբամային տեղեկացնեն
Օբամայի կողմից ընդունելության արժանանալու Ալիևի ջանքերը կրկին ապարդյուն են անցել