Արդյո՞ք դա նշանակում է, որ Բաքուն պատրաստ է սկսել պատերազմը հենց առաջիկայում. Ա.Կրիլով
«Անշուշտ խոցված ուղղաթիռը խորհրդանշական իրադարձություն է, որը կարող է բերել հեռուն գնացող զարգացումների»,- Panorama.am-ի հետ զրույցում ասաց Ռուսաստանի գիտությունների ակադեմիայի համաշխարհային տնտեսության և միջազգային հարաբերություների ինստիտուտի ավագ գիտաշխատող, Կովկասագետների գիտական միավորման նախագահ Ալեքսանդր Կրիլովը՝ անդրադառնալով նախօրեին Ադրբեջանի կողմից ուսումնավարժական թռիչք իրականացնող ԼՂՀ ՊԲ ուղղաթիռի խոցմանը, որի հետևանքով երեք զինծառայող էր զոհվել:
Ռուս քաղաքագետի խոսքով՝ մինչ այժմ ինչպես ուղղաթիռներն էին թռիչքներ կատարում Լեռնային Ղարաբաղի վրա, այնպես էլ պարբերաբար քննարկվում էր Ստեփանակերտի օդանավակայանի աշխատանքների վերականգնման հավանականությունը:
«Ուղղաթիռը խոցվել է շփման գոտում, բայց Ադրբեջանի իշխանությունները հայտարարել են այն մասին, թե այսուհետ ԼՂՀ օդային ամբողջ տարածքը փակ է թռիչքների համար: Անկասկած այս ամենը տանում է հակամարտության գոտում իրավիճակի սրմանը»,-ասաց Ա.Կրիլովը՝ հարցադրում հնչեցնելով՝ սակայն արդյո՞ք դա նշանակում է, որ մեծ պատերազմն անպայման կսկսվի:
Իր կարծիքով՝ պնդել այդ մասին միանշանակ պետք չէ, քանի որ Ադրբեջանի գործողությունները կարող են Բաքվի այն քաղաքականության տրամաբանության կոնտեքստում լինել, որը արդեն երկար տարիներ տարվում է և միտված է հայկական կողմի վրա մշտապես ճնշում գործադրելուն ու ըստ այդմ նաև հոգնեցնելուն:
«Այդ քաղաքականության նպատակն է ստիպել Երևանին ընդունել խաղաղության այն պայմանները, որը թելադրում է Բաքուն: Վերջին ժամանակներս այդ քաղաքականության ռազմական էությունն ավելանում է, բայց արդյո՞ք դա նշանակում է, որ Բաքուն պատրաստ է սկսել պատերազմը հենց առաջիկայում: Ըստ իս՝ այդ պատերազմը Բաքվի հրահանգով կարող է սկսվել միայն այն ժամանակ, երբ դրա արագ ու հաղթական ելքը երաշխավորված կլինի Բաքվի համար, այսինքն՝ ադրբեջանական բանակը ակնհայտ առավելություն կունենա հայկականի համեմատ, Ադրբեջանը կստանա միջազգային աջակցություն կամ նվազագույնը համաշխարհային խաղացողների կողմից նեյտրալիտետ, հարևան Թուրքիայի աջակցություն, Ռուսաստանի և ՀԱՊԿ-ի կողմից չմիջամտելու երաշխիքներ: Ակնհայտ է, որ այս ամենը Բաքուն չունի, իսկ այս իրավիճակում ադրբեջանական բանակին հրահանգել հարձակման մասին թե՛ Իլհամ Ալիևի, թե՛ քաղաքական էլիտայի համար չափազանց մեծ ավանտյուրա կլինի»,- ընդգծեց մեր զրուցակիցը:
Միևնույն ժամանակ Ա.Կրիլովը նշեց, որ նոր պատերազմն իսկապես կարող է սկսվել, քանի որ լարվածության աճն ու զինված սադրանքները կարող են բերել Հայաստանի և Ադրբեջանի իշխանությունների կողմից իրավիճակը վերահսկողությունից դուրս թողնելուն: Այս պայմաններում ավելանում է իրավիճակի աղետալի զարգացումների հավանականությունը, որն էլ կարող է հերթական ռազմական միջադեպի հանգել: Եվ այս իմաստով, ըստ ռուս քաղաքագետի, լավ առիթ կարող է հանդիսանալ հենց այն հանգամանքը, որ Ադրբեջանի կողմից հայտարարվել է՝ ամբողջությամբ փակել ԼՂՀ օդային տարածքը թռիչքների համար, ինչը նշանակում է խոցել բոլոր ուղղաթիռներն ու ինքնաթիռները Ղարաբաղի վրա:
«Իհարկե հասկանալի է, որ նման գործողությունները հայկական կողմի պատասխան գործողություններին կհանգեցնեն: Եվ հենց սա է, որ տարածաշրջանը դրել է նոր պատերազմի վտանգի առաջ և դրանով են բացատրվում այն գնահատականները, որ այս ամենը կարող է պատերազմով ավարտվել: Բայց դեռ հույս կա, որ այդ շեմը չի հատվի»,- հավելեց Ա.Կրիլովը:
Հիշեցնենք, որ Արցախի Պաշտպանության բանակի մամուլի ծառայության փոխանցմամբ` նոյեմբերի 12-ին` տեղական ժամանակով ժամը 13:45-ի սահմաններում, շփման գծի արևելյան հատվածի օդային տարածքում Ադրբեջանի ԶՈւ-ի կողմից հրադադարի ռեժիմի խախտման պատճառով խոցվել է Արցախի ՌՕՈւ Մի-24 ուղղաթիռ, որն ուսումնամարզական թռիչք էր կատարում: Այն տարածքը, որտեղ արձանագրվել է միջադեպը, շփման գծին բավականին մոտ է: Հակառակորդը միջադեպից հետո շարունակել է տարբեր տրամաչափերի զենքերից ինտենսիվ կերպով կրակ բացել միջադեպի վայրի ուղղությամբ:
Միևնույն ժամանակ, ՀՀ ՊՆ մամուլի քարտուղար Արծրուն Հովհաննիսյանն իր ֆեյսբուքյան էջում գրել է, որ Արցախի հետ սահմանային հատվածում Ադրբեջանի ԶՈւ-ն աննախադեպ սադրանք իրականացրեց, որը հանգեցրել է նաև իրավիճակի սրմանը, իսկ ադրբեջանական կողմի հնարանքները, թե իբր հայկական ուղղաթիռներն իրենց դիրքերի ուղղությամբ հարձակման փորձեր են արել, ու իբրև թե իրենք էլ միայն պատասխանել են այս քայլին, անհեթեթ են:
«Ուղղաթիռի բեկորների ուսունասիրությունը թույլ կտա հաստատել, որ ուղղաթիռը զինված չի եղել: Իրավիճակի այս լարումը ադրբեջանական կողմից շարունակվում էր, երբ ուղղաթիռը արդեն ընկած էր: Ավելին, ադրբեջանական կողմի կրակահերթը նաև թույլ չէր տալիս, որ անգամ օդաչուներին մոտենան: Այս աննախադեպ լարման հետևանքներն ադրբեջանական կողմի համար շատ ցավոտ կլինեն և կմնան Ադրբեջանի ռազմաքաղաքական ղեկավարության խղճին: Ուղղաթիռի հրամանատարն էր մայոր Սերգեյ Սահակյանը: Անձնակազմի հետագա ճակատագրի մասին տեղեկություններ կհայտնենք»,- նշել է Արծրուն Հովհաննիսյանը:
Հարակից հրապարակում՝
Ատրճանակը գնված է, ժամանակն է ինքնասպան լինել. Ռուս քաղաքագետը` Ալիևին
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
