Ձեր վստահելի աղբյուրը

Համաշխարհային բանկի գործադիր տնօրենների խորհուրդը քննարկել և հաստատել է 75 մլն ԱՄՆ դոլար արժողությամբ վարկի տրամադրումը Հայաստանին` Զարգացման քաղաքականության երկրորդ գործառնության (ԶՔԳ) ներքո:

«Սա այնպիսի գործառնություն է, որն օժանդակում է քաղաքականության իրականացմանը կամ փոփոխությունների, որոնք բարելավում են ժողովրդի կյանքը կամ ապրուստի միջոցները»,- լրագրողների հետ հանդիպման ժամանակ ասաց ՀԲ Երևանի գրասենյակի տնօրեն Լորա Բեյլը:

Նրա խոսքով, ՀԲ-ն ինչպես Հայաստանում, այնպես էլ միջին եկամտով երկրներում, կառավարության հետ համատեղ մշակում է ռազմավարական տեսլական, որն ընդգրկում է մի քանի տարիներ:

Լորա Բեյլը նշեց, որ իրենք իրենց հերթին իրականացնում են մշտադիտարկում, ըստ անհրաժեշտության՝ ճշգրտումներ, հաշվի առնելով զարգացումները, փոփոխությունները, որ տեղի են ունենում երկրում:

«Մենք աշխատում ենք կառավարության հետ, օժանդակում ենք, որ իրատեսական, խորն ու օգտակար լինեն բարեփոխումները»,- ասաց ՀԲ Երևանի գրասենյակի տնօրենը:

Նա հայտնեց, որ սա երեք ծրագրի շարքում երկրորդն է, ռազմավարական նպատակն է` աշխատատեղերի ստեղծումը:

«Մեր կարծիքով, հայ ժողովրդի համար ամենամեծ փոփոխությունը և քաղաքներում, և գյուղերում կառաջացնի հենց աշխատատեղերի ստեղծումը»,- նշեց ՀԲ ներկայացուցիչը՝ ընդգծելով, որ հաշվի առնելով տարածաշրջանային ներկա միջավայրը, Հայաստանը պետք է իր սահմանների ներսում հնարավորինս շատ քայլեր իրականացնի աշխատատեղերի ստեղծման համար:

Հայաստանին Զարգացման քաղաքականության երկրորդ գործառնության ներքո աջակցություն կցուցաբերվի այն բարեփոխումներին, որոնք կառավարության կողմից իրականացվում են հինգ հիմնական նպատակների ուղղությամբ.

1) Գործարար միջավայրի ամրապնդում տնտեսվարողների համար տեսչական ստուգումների բեռը նվազեցնելու, ինչպես նաև ապրանքների մաքսային ձևակերպումների համար մեկ պատուհանի մոտեցման կիրառման և ավիացիայի ոլորտում վերահսկողության նոր ինստիտուցիոնալ կառուցվածք ձևավորելու միջոցով, որը կմեծացնի թափանցիկությունը և կբարելավի հաշվետվողականությունը քաղաքացիական ավիացիայի ոլորտում.

2) Վարկային ռեսուրսների հասանելիության բարելավում ստեղծելով ժամանակակից դաշտ գրավով ապահովված գործառնությունների համար, որը թույլ կտա շարժական գույքն օգտագործել որպես գրավ` դրանով իսկ մեծացնելով վարկային ռեսուրսների հասանելիությունը.

3) Քաղաքացիական ծառայության նպատակային արդյունավետության ու թափանցիկության բարելավում կատարողական գործունեության գնահատման համակարգի ամրապնդման և էլեկտրրոնային կառավարման համակարգերի օգտագործման ընդլայնման միջոցով.

4) Սոցիալական պաշտպանության ընդլայնում բժշկական հաստատություններում համավճարի պահանջի չկիրառումը տարածելով Ընտանեկան նպաստի համակարգում ներառված տնային տնտեսությունների վրա.

5) Հարկաբյուջետային տիրույթի, հանրային ենթակառուցվածքների և բնական ռեսուրսների կառավարման բարելավում հիմնական հարկային ծախսերի վրա հարկային մուտքերի ազդեցության նախնական հաշվետվությունների ներկայացման, խմելու ջրի հետ կապված ոլորտային բարեփոխումների գործողությունների ծրագրի իրականացման, այդ թվում` նոր համապետական վարձակալության պայմանագրի, շրջակա միջավայի վրա ազդեցության գնահատման օրենքի ընդունման ու ընդերքի օգտագործման իրավունքների մասով բնապահպանական ու սոցիալական ուղենիշներին համահունչ «մեկ պատուհանի» մոտեցման կիրառման միջոցով:

Երկրորդ ԶՔԳ ներառում է 75 մլն ԱՄՆ դոլարին համարժեք վարկ ՎԶՄԲ-ից` փոփոխական տոկոսադրույքով, 14,5 տարվա արտոնյալ ժամանակաշրջանով և մարման 25 տարվա ժամկետով:

1992թ. Համաշխարհային բանկին, իսկ 1993թ. ՄԶԸ-ին միանալուց ի վեր այդ երկու կառույցների կողմից Հայաստանին ընդհանուր հաշվով տրամադրվել է 2.036.73 մլն ԱՄՆ դոլար գումար: