Ձեր վստահելի աղբյուրը

Նոյեմբերի 19-ից 21-ը Ավստրիայի Գրաց քաղաքում կանցկացվի Երիտասարդական եվրոպական մրցանակաբաշխության (European Youth Award) հաղթողների պարգևատրման արարողությունը: European Youth Award-ի շրջանակում անցկացված Digital Creativity for Social Good մրցույթի հաղթողների թվում է հայկական CityBugs նախագիծը:

Հայկական այս նորարական նախագիծը մրցում էր եվրոպական 49 երկրից 130 մասնակցի հետ: 11 անվանակարգերում հաղթող նախագծերը ընտրվել են մասնագետներից կազմված միջազգային ժյուրիի կողմից։ Նրանք 11 երկրից են` Հայաստանից, Ավստրիայից (2), Չեխիայից, Դանիայից, Ֆրանսիայից, Գերմանիայից (2), Պորտուգալիայից, Սլովակիայից, Շվեդիայից, Շվեցարիայից և Միացյալ Թագավորությունից:

Բացի պարգևատրման արարողությանը եվրոպական այս քաղաքում լինելու է սոցիալական նախագծերի ամենախոշոր ինտերակտիվ կոնֆերանսը, որին կմասնակցեն նաև միջազգային կառույցներից մասնագետներ, ՏՏ փորձագետներ, բիզնեսի հեղինակավոր առաջնորդներ: Նախագծերը ներկայացնելուց հետո, hիմնվելով այդ շնորհանդեսների վրա` EYA-ի գրանդ ժուրին կընտրի մեկ ընդհանուր հաղթողի, որը կստանա խոշոր դրամաշնորհ իր նախագծի համար։

Այս տարվա մրցույթի թեմաներն ու առաջնահերթությունները սահմանվել են Եվրոպայի խորհրդի կողմից ԵՄ 2020-ի ռազմավարությանշրջանակում: Եվրոպայի «թվային հանրության» ներկայացուցիչները ցուցադրել են, թե ինչպես ՏՏ ոլորտի ու բջջային տեխնոլոգիաների կիրառումը կարող է հանգեցնել սոցիալական խնդիրների լուծմանը:

ՏՏ մասնագետ և Citybugs նախագծի համահեղինակ Հովհաննես Աղաջանյանը` մինչ  Ավստրիա մեկնելը, որտեղ պետք է ներկայացվեն հաղթող նախագծերը, Panorama. am-ի հետ զրույցում մանրամասներ ներկայացրեց մրցույթից:

- Մենք հաղթող ենք ճանաչվել Future Living: e-mobility &urban development անվանակարգում, որտեղ որոշիչ դեր էր խաղում մեր բազմաֆուկցոնալությունը, որովհետև մենք օգտագործում ենք, թե՛ Վեբ տեխնոլգիաներ, թե՛ մոբայլ։ Կարծում եմ` մեր հիմնական մրցակցային առավելությունը այն է, որ մենք բացի ինչ որ ստատիկ կայք կամ ծրագիր ստեղծելուց, ակտիվ օգտագործում ենք ՏՏ լուծումներ և միշտ զարգացնում ենք համակարգը` ավելացնելով նոր ֆուկցիաներ։ Մեր նպատակն է եղել ստեղծել հանրային գործիք և հասարակության, և պետական մարմինների համար, որը իր մեջ պետք է ներառի ինովացիոն ՏՏ լուծումներ։ Մեր նախագծի նպատակն է ոչ ավանդական մեթոդներով քաղաքային խնդիրների բարձրաձայնումը և դրանց լուծման համար ուղղված քայլերի համար առաջարկների ներկայացումը:

- Վերջերս CityBugs ներկայացնում էիք Բեռլնում IT4Change միջոցառմանը, ինչ արդյունքներ եղա՞ն :
-Բեռլինը մեր թիմի համար առաջին խոշոր մարտահրավերն էր, քանի որ մասնակցում էինք Սոցիալական Ձեռներեցության գաղափարի հիմնադիր և տվյալ ոլորտում ամենահեղինակավոր Ashoka հիմանադրամի հրավերով: Պետք է Եվրոպայում կիսվեինք մեր փորձով։ 5 օրերի ընթացքում գերմանացի փորձագետների օգնությամբ վերլուծում էինք Սոցիալական ինովացիայի հեռանկարները Եվրոպայում, ներկայացնում էինք մեր նախագծերի տեսլականը և դրանց սոցիալական ազդեցությունը։ Կարող եմ վստահ ասել, որ Բեռլինը վերջին 10 տարվա մեջ դարձել է Սոցիալական Ինովացիայի և Սոցիալական Ձեռներցության եվրոպական մայրաքաղաք։ Ոլորտին աջակցում են թե մասնավոր ընկերություններ, թե առանձին հիմանդրամներ։ Սոցիալական նախագծերի համար ամենակարևոր բանը փորձի փոխանակումն է, և հաջողված նախագծերի փորձի տարածումը (Scaling Social Impact )։ Այդ իսկ պատճառով ներկա պահին մեր թիմը, տարբեր գործընկերների հետ նախատեսում է իրականացնել մի քանի միջոցառում Հայաստանում տվյալ ոլորտով հետաքրքրվող երիտասարդների և ՏՏ մասնագետների համար` իրենց ներկայացնելով միջազգային լավագույն փորձը :

- Որո՞նք են հասարակական օգուտին միտված նախագծերի ստեղծման այսպես կոչված «բանալիները»:
-Կարծում եմ` հասարակական օգուտի համար նախ և առաջ պետք է ապրել ակտիվ հասարակական կյանքով և զգալ ինչ-որ պատասխանատվություն հասարակության առջև։ Ձեր հարցի համար կա ստանդարտ պատասխան, որը լսել եմ տարբեր մարդկանից. այն է` մարդը պետք ինչ-որ խնդրի առաջ կանգնի, հետո օգտագործելով իր տվյալ խնդիրը լուծելու փորձը առաջարկի նորարական լուծում։ Այսինքն` նախ և առաջ պետք է տեսնել խնդիրը, հետո առաջարկել լուծում, որը լավագույն դեպքում պետք դառնա նախագիծ։ Կիսում եմ տվյալ տարբերակը, բայց հիմա ես առաջնորդվում եմ մեկ այլ տարբերակով, այն է` փորձում եմ գտնել համախոհներ, մարդկանց, որոնք պատրաստ են փոխել մարդկանց կյանքը և նրանց ապրելու պայմանները դարձնել ավելի լավը։

- Ո՞րն է CityBugs-ի սոցիալական ազդեցությունը:
-Մեր հիմնական սոցիալական ազդեցությունն է ստեղծել ակտիվ քաղաքացիական հասարակություն, որը պատրաստ կլինի նոր տեխնելոգիաների և սոցիալական ցանցերի միջոցով դարձնել մեր քաղաքը ավելի լավ տեղ ապրելու համար։ Նաև շատ ենք կարևորում պետական մարմինների մասնակցությունը ակտիվ թվային հասարակության ձևավորման գործում։

- Ինչքա՞ն ժամանակ պահանջվեց, որպեսզի նախագիծը գաղափարից դառնա սոցիալական գործիք:
-Նախագծի վրա աշխատում ենք 2012 թվականից։ Ներկա պահին պատրաստվում ենք նախագծի զարգացման և տարածման 3–րդ փուլին։Կարծում եմ` 2015 թվականին կկարողանանք նոր շունչ տալ և ներդնել նոր տեխնոլոգիական լուծումներ։ Ներկա պահին չունենք ֆինանսական որևէ օգնություն, իսկ նախագիծը ամբողջությամաբ ոչ կոմերցիոն է։ Հիմա նախագիծի կայունությունը և հետագա զարգացումը ապահովում է մեր համահիմնադիր Արման Աթոյանի հիմանդրած X-TECH ընկերությունը։

- Որպես հաղթող նախագիծ` ի՞նչ եք ակնկալում Երիտասարդական եվրոպական մրցանակաբաշխությունից։ Կա՞ն արդեն ծրագրեր, թե ինչպես կտնօրինվի դրամաշնարհը, եթե, իհարկե, տրամադրվի CityBugs-ին:
-Երիտասարդական եվրոպական մրցանակաբաշխությունից ակնկալում ենք ևս մեկ հաղթանակ, քանի որ դա կլինի հայկական ստարտափ համայնքի համար նախադեպ և մոտիվացիա։ Ներկա պահին աշխատում ենք 10 րոպեանոց ներկայացման վրա, որով պետք է ցույց տանք մեր նախագծի 2 տարվա և ապագա 5 տարվա անելիքները։ Ունենք բազմաթիվ գաղափարներ, որոնք անպայաման կիրագործենք անկախ նրանից` կհաղթենք, թե ոչ: Պատկերացրեք, երբ երկու տառի առաջ մենք դեռ նոր էինք աշխատում այս նախագխի վրա, քչերն էին հավատում, որ այն հաջողության կհասնի, բայց այսօր այն մեկը մյուսի հետևից հաղթանակներ է գրանցում: Վերջին հաղթանակի մասին տեղեկացանք երեկ. World Summit Youth Award-ի 2000 նախագծից` 140 մասնակից երկրից, ընտրվել է 18 հաղթող, որից մեկը CityBugs-ն է: