Գործ ունենք ընդգծված սոցիալական ուղղվածության բյուջեի հետ. Գ.Մինասյան
«Մենք պետք է հասկանանք, որ այս բյուջեն իրականացվելու է մի ժամանակահատվածում, երբ տնտեսական որոշակիությունը տարածաշրջանում բավականին նվազ է: Եվ հաշվի առնելով բոլոր ռիսկային գործոնները հաջորդ տարվա բյուջեի գործոններից մեկը իրատեսության բարձր մակարդակն է»,-Panorama.am-ի հետ զրույցում ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը՝ գնահատելով 2015թ-ի պետական բյուջեի նախագիծը և անդրադառնալով ընդդիմադիրների քննադատությանը, թե բյուջեն ոչ թե զարգացման փաստաթուղթ է, այլ յոլլա գնալու:
Գ.Մինասյանը նշեց, որ որքան էլ դա չցանկանան տեսնել իր ընդդիմադիր գործընկերները, բայց փաստ է, որ գործ ունենք ընդգծված սոցիալական ուղղվածության բյուջեի հետ ու այդ իմաստով սոցիալական ծրագրերը բավականին ցայտուն են արտահայտված՝ 14 տոկոսով ավելանում են թոշակներն ու նպաստները, ավելանալուն է նվազագույն աշխատավարձը և այլն:
Հաջորդ կարևոր ուղղվածությունը, որ առկա է բյուջեի նախագծում վերաբերում է պաշտպանության բնագավառին, և պաշտպանական ծախսերի առումով ևս 2015թ-ի բյուջեն ապահովում է այնպիսի վիճակ, երբ պետությունը պատրաստ կլինի ցանկացած զարգացումների:
Անշուշտ, ցանկացած բյուջեի նախագծում առանձնահատուկ տեղ են զբաղեցնում տնտեսական զարգացմանն ուղղված ծախսերը: Գ.Մինասյանը նշեց, որ բյուջեի նախագծին զուգահեռ ընդունվել են մի շարք օրենքներ, որոնք նպաստում են տնտեսական բարենպաստ պայմանների ստեղծմանն ու փոքր ու միջին բիզնեսի համար արտոնյալ պայմանների ձևավորմանը և դրանք բոլոր բերում են նրան, որ ապահովվեն նպաստավոր պայմաններ տնտեսական աճի ու զարգացման համար:
«Եվս մեկ կարևոր հանգամանք. մենք նոր, մեծ հնարավորություններ ենք ստանում տնտեսական նոր զարգացումների համար և դա պայմանավորված է նրանով, որ ԵՏՄ անդամ-երկրների մեջ Հայաստանը կլինի միակը՝ արտոնյալ երկրի կարգավիճակով, որը լուրջ ներդրումների հնարավորություն կարող է առաջացնել Հայաստանում ինչպես ՌԴ-ի ձեռնարկատերերի և արդյունաբերողների կողմից, այնպես էլ ԵՄ արդյունաբերողների համար: Սա հասկանալի է, քանի որ Ռուսաստանը գտնվում է պատժամիջոցների տակ և դա թույլ չի տալիս, որ ինքը իր ապրանքը ողջ ծավալով իրացնի Եվրոպայում: Եվ ռուսական այն ձեռնարկությունները, որոնք ընկնում են պատժամիջոցների տակ, կարող են ներդրումներ իրականացնել Հայաստանում՝ ապահովելով մի կողմից իրենց համար չափազանց արտոնյալ պայմաններ իրենց իսկ ապրանքների իրացման և շարժի համար, իսկ մյուս կողմից նաև Հայաստանում ներդրումներ կատարելով, աշխատատեղեր ստեղծելով համալրել մեր բյուջեն»,- թվարկեց Գագիկ Մինասյանը:
Վերջինս նկատեց, որ նույնը կարելի է ասել նաև ԵՄ երկրների համար, որոնք նույնպես նույն այդ պատժամիջոցների պատճառով չեն կարողանում իրենց ավանդական շուկայում՝ ՌԴ-ում, իրացնել այդ ապրանքը և նրանց նույնպես ձեռք է տալիս արտադրությունը հիմնել Հայաստանում, որն էլ այդ ձեռնարկատիրության ու արդյունաբերության արդյունքները կիրացնի Ռուսաստանում:
«Սա նոր հնարավորություն է երկիրը զարգացնելու համար, որովհետև միայն բյուջեով չի, որ տնտեսությունը պետք է զարգանա, այլ բյուջեն պետք է ստեղծի հնարավորություններ, որոնք ոչ բյուջետային ֆինանսական հատկացումների միջոցով կզարգացնեն տնտեսությունը»,- հավելեց նա:
Ի դեպ, ՀՀԿ-ական պատգամավորից հետաքրքրվեցինք, թե ինչպես է վերաբերում կառավարության այսօրվա արտահերթ նիստում ընդունված որոշմանը՝ սահմանամերձ համայնքներին գազի, էլեկտրաէներգիայի և մի շարք այլ վճարների պետության կողմից փոխհատուցելուն: Գ.Մինասյանը նշեց, որ դեռևս չի կարդացել օրենքի նախագիծը, որն ընդունվել է կառավարության նիստում, այնպես որ մանրամասնորեն դեռ չի կարող իր գնահատականը ներկայացնել, բայց ընդհանուր առմամբ հստակ է մեկ բան՝ այն տեղավորվում է կառավարության կողմից իրականացվող քաղաքականության մեջ:
«Համայնքների համաչափ զարգացումը մեր պետության ամենակարևորագույն գործառույթներից մեկն է և այդ առումով սահմանամերձ տարածքների զարգացումը առաջնահերթության ամենակարևոր դրվածքներից մեկն է: Այս քայլով ոչ միայն բարենպաստ պայմաններ կստեղծվեն սահմանամերձ համայնքների տնտեսական զարգացման համար, այլև մյուս կողմից այդ համայնքներում կթեթևանա կյանքը, ինչն էլ որպես հետևանք կնվազեցնի արտագաղթի տեմպերը, նոր աշխատատեղեր կստեղծվեն և ինչու չէ՝ հեռանկարում նաև ներգաղթի պայմաններ ստեղծելու համար»,- ասաց նա ՝ ավելացնելով, որ խնդրի հաջող իրականացումը արդյունավետորեն կբերի իր կողմից նախանշված բոլոր խնդիրների լուծմանը:
Հիշեցնենք, կառավարությունն իր այսօրվա արտահերթ նիստում հավանության է արժանացրել «Սահմանամերձ համայնքների սոցիալական աջակցության մասին» ՀՀ օրենքի նախագիծը, որը կարգավորում է ՀՀ կառավարության հաստատած ցանկ ներառված 31 սահմանամերձ համայնքներին աջակցություն ցուցաբերելու գործընթացը: Օրենքի նախագծով սահմանվում է, որ սահմանամերձ համայնքի բնակչության ռեգիստրում հաշվառված և սահմանամերձ համայնքում մշտական բնակություն ունեցող անձանց սպառած բնական գազի, էլեկտրական էներգիայի և ոռոգման ջրի վարձավճարները մասամբ փոխհատուցվում են ՀՀ պետբյուջեի միջոցներից:
Հարակից հրապարակում՝
Ադրբեջանական զինված գործողությունների արդյունքում բնակարանններից զրկվածները նորերը կստանան
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
