Ձեր վստահելի աղբյուրը

«Իսլամական պետության» կողմից գլխատվեց հերթական ամերիկացի պատանդը՝ Պետեր Կասիգը: Այդ մասին իսլամականները հայտնեցին նոյեմբերի 16-ին ԶԼՄ-ներում տարածված 15 րոպեանոց տեսագրությունում:

«Նման տեսագրությունները սկսեցին հաճախակի ի հայտ գալ այն ժամանակ, երբ «Իսլամական պետության» դեմ սկսվեցին կոալիցիոն ուժերի ռազմական գործողություններ և օդային հարվածներ: Իսլամականները պատրաստվել էին դեպքերի նման զարգացմանը, ավելին՝ սիրիական հակամարտության ողջ ընթացքում «Իսլամական պետության» զինյալների ակտիվ միջնորդությամբ ամերիկացի, բրիտանացի և այլ պատանդների գնման, կամ փոխանակման հաճախակի հանդիպող դեպքերը խոսում են այն մասին, որ իսլամականները նպատակադրված պատանդներ էին հավաքում: Կոալիցիոն ուժերի ցամաքային ռազմական գործողությունները ուշանում են, իսկ օդային հարվածները զգալի վնասներ են հասցնում «Իսլամական պետությանը»:

Զարգացումների նման սցենարը ձեռք չի տալիս իսլամականներին, որոնք փորձում են իրենց ձախողումները կոմպենսացնել քարոզչական ճակատում: Իսկ նման տեսանյութերի տարածումը հենց այդ նպատակներն է հետապնդում:

Կիրակի օրը տարածված տեսանյութում մի քանի ուշագրավ հատվածներ կան, որոնցից կարելի է որոշակի եզրահանգումների գալ:

Ամերիկացի պատանդից զատ տարածված տեսանյութում գլխատվում են սիրիական կառավարական ուժերի 14 զինվորներ: Սա կարելի է դիտարկել օրեր առաջ «Իսլամական պետության» առաջնորդ Աբու Բաքր ալ-Բաղդադիի կողմից տարածված ձայնագրության համատեքստում, որտեղ նորահռչակ խալիֆը կոչ էր անում իսլամականներին ջիհադ իրակակացնել «Մերձավոր թշնամու» դեմ՝ առավելապես կենտրոնանալով «անհավատ» մուսուլմանական վարչակարգերի ու դրանց զինուժի դեմ պայքարի վրա: Իսկ տեսանյութում սիրիական զինվորների գլխատման փաստը հենց դա կարող է նշանակել:

Բացի այդ, դա կարելի է դիտարկել նաև վերջին շրջանում ընդդեմ իսլամականների սիրիական կառավարական ուժերի ակտիվությամբ, որին հակառակ, ցույց է տրվում իսլամականների արդյունավետ պայքարը Բաշար ալ-Ասադի սիրիական բանակի դեմ:

Տեսանյութում ամերիկացի Պետեր Կասիգի գլխատման կոնկրետ վայրն է նշվում՝ դա Սիրիայի հյուսիսում գտնվող Դաբիկ բնակավայրն է: Կանխատեսվում էր, որ Սիրիայի հյուսիսը վերածվելու է «Իսլամական պետության» զինուժի ակտիվության թատերաբեմի՝ հաշվի առնելով վերջին շրջանի իսլամականների կողմից հյուսիսային քրդաբնակ Քոբանին նվաճելու անհաջող փորձերն ու դրանից բխող իսլամականների դեպի սիրիական հյուսիսային այլ բնակավայրեր տարածումը: Հետևաբար կարելի է սպասել իսլամական ծայրահեղ արմատականների կողմից նոր «անակնկալների» Սիրիայի այս հատվածում:

Իսլամականների պայքարի թիրախ հերթական անգամ հայտարարվում է Արևմուտքը, հատկապես՝ ԱՄՆ-ն: Վերոհիշյալ տեսանյութում իսլամականները սպառնում են ջիհադական պայքարը տեղափոխել ամերիկյան քաղաքների փողոցներ: Սա նույնպես կարելի է դիտարկել քարոզչական պայքարի համատեքստում: Դրանով իսլամականները հոգեբանական ազդեցություն են գործադրում և վախի մթնոլորտ են ձևավորում արևմտյան հասարակություններում:

Սակայն, չպետք է բացառել, որ նման կառույցի կողմից կլինեն նաև ջիհադական պայքարի առարկայական դրսևորումներ հենց արևմտյան բնակավայրերում ծայրահեղ արմատական գաղափարները կիսող և իսլամ դավանող հենց արևմտյան քաղաքացիների կողմից»:

Սարգիս Գրիգորյան, Արաբագետ