Ձեր վստահելի աղբյուրը

«Կառավարության կողմից ցանկացած օգնություն, աջակցություն սահմանամերձ համայնքների բնակիչներին միանշանակ ողջունելի է, քանի որ այն հեշտացնում է մեր բնակիչների հոգսերը: Միայն գոհունակություն կարող ենք հայտնել այդ որոշումից»,- Panorama.am-ի հետ զրույցում ասաց սահմանամերձ Մովսես համայնքի ղեկավար Արարատ Ավալյանը` մեկնաբանելով «Սահմանամերձ համայնքներին սոցիալական աջակցության մասին» օրենքի նախագիծը միաձայն առաջին ընթերցմամբ ընդունելու Ազգային Ժողովի պատրաստակամությունը:

Նրա խոսքով` նախագիծը շատ խնդիրներ կլուծի, այդ թվում և արտագաղթի տեմպերի նվազմանը կարող է նպաստել, քանի որ, եթե մարդիկ վիճակի չեն սպառած գազի և էլեկտրաէներգիայի համար վճարել, ապա շատ դեպքերում որոշում են հեռանալ համայնքից: Իսկ եթե դրանց վճարումները զեղչվեն, ապա գուցե միայն հող մշակելով կարողանան ապրեն մարդիկ:

Մովսես համայնքը 75-80 տոկոսով գազաֆիկացված է, այնպես որ` կարելի է ասել, որ համայնքի բնակիչների մեծամասնությունը կօգտվի այս փոխհատուցումից: Ա.Ավալյանի խոսքով` այն կտարածվի շուրջ 450-460 տնտեսության վրա, իսկ դա զգալի ցուցանիշ է:

«Մենք շատ գոհ ենք կառավարությունից, խորհրդարանից, որ նման նախաձեռնությունը առաջ քաշվեց ու այն ընդունվեց»,- ասաց նա ու հավելեց, որ հաջորդ տարվա համար պատրաստվում են մի շարք ծրագրեր ներկայացնել` Մովսես-Նորաշեն ճանապարհահատվածի ասֆալտապատման, ջրագծի և այլնի հետ կապված և հույս ունեն, որ այդ հարցերում ևս կառավարությունը նրանց միայնակ չի թողնի:

Սահմանամերձ Այգեպար համայնքի ղեկավար Անդրանիկ Այդինյանը նույնպես նշեց, որ նման նախագիծը չի կարող չողջունվել, այն սպասված էր ու դժվարին այս պայմաններում լավ ավետիս է բնակիչների համար:

«Իսկապես ուրախ եմ, որ նման նախաձեռնություն եղավ, որովհետև միշտ այն կարծիքին եմ եղել, որ սահմանամերձ համայնքների բնակիչների, համայնքների նկատմամբ վերաբերմունքը պետք է փոքր-ինչ տարբերվի»,- նշեց համայնքապետը:

Միևնույն ժամանակ նա չի կիսում Մովսեսի գործընկերոջ տեսակետը, թե դա կարող է նվազեցնել արտագաղթի միտումները, քանի որ սահմանամերձ համայնքների բնակիչները ավելի շատ անվտանգության նկատառումներից դրդված են արտագաղթում, քան սոցիալական պայմաններից ելնելով:

«Իհարկե շատ կարևոր է սոցիալական նորմալ պայմաններում ապրելը, բայց երբ մարդ առավոտյան տանից դուրս է գալիս, ու չգիտի ի՞նչ կլինի, կկրակեն թե չէ` դա արդեն այլ հարթությունում է: Մարդիկ ուզում են անվտանգ տեղ ապրեն, հանգիստ ապրեն, որ կրակոց չլսեն, ոնց որ մեր հարևան գյուղերում կամ քաղաքում, որտեղ մարդիկ չգիտեն, թե կրակոցը որն ա, վտանգը որն ա, պախկվելը որն ա…. ինչի ամեն կրակոցի ժամանակ մենք պիտի մտածենք` երեխաները անվտանգ տարածքո՞ւմ են, թե՞ չէ»,- ասաց նա, այնուհետ նկատելով, որ դրանք ավելի գլոբալ խնդիրներ են, վերադարձավ սոցիալական հարթությանն ու ևս մեկ անգամ շեշտեց` նման որոշումը, կառավարության նման մոտեցումը անշուշտ դրական ազդեցություն կունենա համայնքի բնակիչների ապրուստի վրա, ցույց տալով, որ նրանք միայնակ չեն երկրի սահմանին:

«Սահմանամերձ համայնքների սոցիալական աջակցության մասին» ՀՀ օրենքի նախագիծը վերջին շրջանում թերևս միակն էր, որ միաձայն ընդունվեց ու ողջունվեց ԱԺ բոլոր խմբակցությունների կողմից: Ըստ այդմ` սահմանամերձ համայնքների բնակիչների հարկերը կվճարվեն համայնքային բյուջե, գազի ու էլեկտրաէներգիայի վճարների դեպքում դրանք կփոխհատուցվեն ծառայությունները մատուցողներին համամասնաբար և միայն մի դեպքում քաղաքացուն կտրվի գումարը՝ խոսքն այն անձանց մասին է, ովքեր բնական գազի սպառող չեն: Կառավարությունը որոշում է կայացրել նրանց տալ փոխհատուցում՝ այլընտրանքային ջեռուցում իրականացնելու համար: Ի դեպ, կառավարությունը դեմ է, որ գումար տրվի սահմանամերձ համայնքների բնակիչներին, քանի որ այդ դեպքում վստահ չէին կարող լինել, որ այն հասցեական օգտագործում կունենա: Իսկ գործադիրի նպատակն է լուծել կենսակերպի որոշակի բարելավման խնդիրը:

Ինչ վերաբերում է ոռոգման ջրի դիմաց փոխհատուցմանը, ապա այն կկազմի 50 տոկոս:

Նախորդող`
Սահմանամերձ համայնքների բնակիչները փոխհատուցումը գումարի տեսքով չեն ստանա
Պատգամավորները` «ժողովրդի մատից փուշ հանելիս»