Առողջապահության նախարարը մեկնել է Հռոմ

Առողջություն 12:11 19/11/2014

Առողջապահության նախարարը մեկնել է Հռոմ

ՀՀ առողջապահության նախարար Արմեն Մուրադյանը մեկնել է Հռոմ՝ մասնակցելու աշխարհի տարբեր երկրներում մանկական ամոքիչ (պալիատիվ) օգնության զարգացման ժամանակակից հիմնահարցերին նվիրված 2-րդ Եվրոպական եռօրյա համաժողովին: Այս մասին հայտնում է ԱՆ մամուլի ծառայությունը:

ՀՀ առողջապահության նախարարությունը կարևորում է ամոքիչ խնամքի դերը, ուշադրության կենտրոնում պահում, ծանր, անբուժելի հիվանդություններով տառապող կամ անդամալույծ հիվանդների խնամքն իրականացնող ծառայության զարգացմանն ուղղված քայլերը: Այս հիվանդներն առավել քան կարիք ունեն արհեստավարժ բուժօգնության և հոգածության:

Այս միջոցառումը հնարավորություն է ընձեռում ծանոթանալու միջազգային փորձի հետ, ուսումնասիրելու բուժօգնության այս տեսակի կազմակերպման նրբությունները և ժամանակակից միտումները տարբեր երկրներում, որոնք հետագայում հնարավոր կլինի քննարկել` Հայաստանում կառավարման արդյունավետ մեխանիզմ ներդնելու նպատակով:

Համաժողովի շրջանակում քննարկվելու են նաև այս ոլորտում շարունակական կրթական ծրագրերի մշակման հարցերը:

Միջոցառումը կազմակերպվել է ՀՀ առողջապահության նախարարության միջազգային գործընկերներ «Բաց հասարակության հիմնադրամներ» կազմակերպության ջանքերով: Վերջինս ակտիվ գործունեություն է ծավալում աշխարհի ավելի քան 70 երկրում, օժանդակում մեր պետությանը բազմաթիվ, այդ թվում` հանրային առողջապահության և կրթության հասանելիության բնագավառներում:

Համաժողովին մասնակցում են աշխարհի բազմաթիվ երկրների առողջապահության բարձրաստիճան հեղինակավոր կազմակերպիչներ, մասնագետներ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: