Ձեր վստահելի աղբյուրը

Ավելի քան տասը տարի է, ինչ Եվրոպան պայքարում է հակաբիոտիկների կայունության դեմ: Մի շարք երկրներ, որոնց թվում նաև Միացյալ Նահանգները, արգելում են մանկահասակ երեխաներին բուժել հակաբիոտիկներով: Այս մասին այսօր Հակաբիոտիկների մասին իրազեկման համաեվրոպական օրվան նվիրված ասուլիսում ասաց Դեղերի և բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը:

Նշենք, որ ԱՀԿ-ն կոչ է անում հանրությանը հակաբիոտիկները կիրառել միայն բժշկի նշանակմամբ և միայն բժշկի կողմից սահմանված ձևով:

Հ.Թոփչյանի խոսքերով՝ Առողջապահության համաշխարհային կազմակերպության վերջին ուսումնասիրությունները ցույց են տվել, որ հակամանրէային դեղերի նշանակումների ավելի քան 40 տոկոսը հիմնավորված չէ:

«Խոսքը հատկապես վերաբերում է թույլ մրսածության, հարբուխի կամ անգինայի դեպքում հակաբիոտիկներով բուժմանը: Նման դեղորայքից խուսափում են նաև մեզ մոտ»,- ասաց Հ.Թոփչյանը:

Հարցին, թե ջերմության դեպքում ինչ միջոցների պետք է դիմել, նշեց, որ պարտադիր չէ փոքր ջերմության դեպքում անմիջապես անտիբիոտիկներ կամ այլ դեղեր խմել. «Ի վերջո տատիկների մեթոդները կան, որոնք ավելի լավ արդյունք են ապահովում: Պետք չէ միանգամից դեղորայքային բուժում սկսել»:

Հ.Թոփչյանը հավելեց, որ միայն այն դեպքում, երբ օրգանիզմը չի կարողանում պայքարել վարակի դեմ, բժշկի ցուցումով հարկավոր է դիմել նմանատիպ դեղորայքի:

Իսկ դրանց օգտագործումը, ինչպես նա նշեց, դեղորայքային կայունության են հանգեցնում:

Հ.Թոփչյանը հայտնեց, որ հակաբիոտիկային կայունությունը մեր երկրում նվազեցնելու համար ՀՀ առողջապահության նախարարությունը ռազմավարություն է մշակում: Կստեղծվեն ստանդարտ սխեմաներ, որից բուժման ընթացքում կօգտվի բժիշկը:

«Մի շարք երկրներում հակաբիոտիների դեմ պայքարում են օրենքի ուժով: Հայաստանում կա համապատասխան օրենք ու առողջապահության նախարարի հրաման, սակայն երբ հերթը հասնում է դեղատներից դեղի վաճառքին, մոռացվում է թե օրենքը, թե հրամանը: Իրավիճակը շտկելու համար, նախարարություն նախաձեռնելու է էլեկտրոնային առողջապահության գործընթացը, ըստ որի դեղատոմսն էլեկտրոնային ուղեկցող պարտադիր փաստաթուղթ կդառնա»,- ասաց նա:

Նա նաև նշեց, որ մենք հակաբիոտիկներ են ստանում ոչ միայն դեղորայքի, այլև ուտելիքի միջոցով. «Մենք պետք է ինչպես տեղական արտադրության, այնպես էլ ներկրվածի սնունդի ոլորտը վերահսկենք, որ սպառենք այնպիսի սնունդ, որը զերծ է անտիբիոտիկից»: