Ձեր վստահելի աղբյուրը

Դերասան Վարդան Պետրոսյանի մասնակցությամբ ավտովթարի գործով դատական այսօրվա նիստի ընթացքում տուժող կողմի ներկայացուցիչ Ռուբեն Բալոյանը հանդես եկավ երկրորդ միջնորդությամբ, այս անգամ՝ մեղադրող Սարգսյանին բացարկ հայտնելու վերաբերյալ:

«Սույն գործով վերահսկող դատախազը ոչ միայն չի ձեռնարկել հնարավոր բոլոր միջոցները գործի քննության բազմակողմանիությունը, լրիվությունն ապահովելու համար, այսօր էլ առարկում է օրենքով սահմանված կարգով գործում առկա բացերը վերացելու, թերություններն ուղղելու ուղղությամբ տուժող կողմի բոլոր քայլերը: Մեղադրողի քայլերն ողջամիտ կասկած են հարուցում սույն գործով նրա անկողմնակալության մեջ, ուստի այլևս չի կարող մասնակցել սույն քրեական գործով վարույթին: Մեղադրող Սարգսյանի դեմ հայտնում եմ բացարկ»,- իր միջնորդությունը հիմնավորեց Ռ. Բալոյանը:

Մեղադրող Սարգսյանը նշեց, որ միջնորդությունը վերաբերում է նախաքննության ընթացքին իբր իր կողմից թույլ տված բացթողումներին, բայց թե ինչու է ներկայացվում նախաքննությունից 7-8 ամիս անց, չի հասկանում. «Եթե ես Բալոյանի ներկայացրած միջնորդությունը չառարկեի, այս միջնորդությունը չէր լինի»:

Վ. Պետրոսյանի փաստաբան Նիկոլա Բաղդասարյանը կարծիք հայտնեց, որ նախապես մշակված սցենար է. «Նախորդ նիստի ժամանակ դուք մերժեցիք իմ կողմից ներկայացված այնպիսի միջնորդությունը, որը ենթակա չէր մերժման: Ուզում էիք հակակշիռ ստեղծել. Բալոյանը ներկայացնի, դատախազը մերժի, Բալոյանն էլ բացարկ հայտնի»:

Վարդան Պետրոսյանն էլ ասաց, որ զավեշտալի վիճակ է ստեղծվել, երբ ամբաստանյալը պաշտպանում է իրեն մեղադրողին. «Ես պաշտպանում եմ մեղադրողին: Իրավունք չունեմ մտածելու անգամ, որ ինչ որ նախնական պայմանավորվածություններ են եղել: Հանձինս մեղադրողի՝ տեսնում եմ պրոֆեսիոնալ, զուսպ մարդու: Ինքս կանգնում են պաշտպան ինձ մեղադրողին»:

Խորհրդակցական սենյակից դուրս գալուց հետո դատավոր Վաղինակ Մկրտչյանն ասաց, որ Ռ. Բալոյանի կողմից դատախազին բացարկ հայտնելու մասին միջնորդությունը մերժում են:

Դատական հաջորդ նիստը նշանակվել է նոյեմբերի 26-ին:

Նախորդող հրապարակումներ՝
Վարդան Պետրոսյան. Մեկ տարի է նստած եմ լուռումունջ, անխոնջ, կնստեմ ավելին
«Ձևական պատճառաբանություններով Վարդան Պետրոսյանը կխուսափի պատժից». Միջնորդության վերաբերյալ
Վարդան Պետրոսյանի գործով դատական նիստը սկսվելուց անմիջապես հետո հետաձգվեց
Վարդան Պետրոսյանի գործով վկան մոռացել է ստորագրել դեպքի վայրի զննության արձանագրությունը
Վարդան Պետրոսյանի պաշտպանները դատական նիստին չներկայացան
Վարդան Պետրոսյանի գործով նոր պաշտպան է ներգրավվել
Վարդան Պետրոսյանի գործով հարցաքննվեց ավտոտեխնիկական փորձաքննությունը կատարած մասնագետը