Ձեր վստահելի աղբյուրը

«Առողջապահության նախարարության գերակա խնդիրներից մեկը մանկական մահացության ցուցանիշի իջեցում է: Վերջին տարիներին մենք մեծ հաջողություններ ենք գրանցել: Մասնավորապես 1990 թվականից մինչև 2013 թվականը մանկական մահացությունը նվազել է 47 տոկոսով»,- «Փրկենք հարյուրավոր կյանքեր» նախագծի շրջանակում անցկացված «Վաղածին երեխաների մոտ շնչառական դիսթրես համախտանիշի բուժման և կանխարգելման սկզբունքները» թեմայով խորհրդաժողովում` նվիրված վաղածին երեխաների համաշխարհային օրվան, ասել է ՀՀ առողջապահության նախարարի տեղակալ Սերգեյ Խաչատրյանը: Այս մասին հայտնում են առողջապահության նախարարությունից: 

Նրա խոսքով, չնայած գրանցած հաջողություններին, վիճակագրական տվյալների վերլուծության դեպքում մահացության իջեցմանը զուգահեռ նեոնատալ մահացությունը նորից կայուն աճի միտում է արձանագրել:

Սերգեյ Խաչատրյանի գնահատմամբ` վաղածնության խնդրի լուծման հարցում անհրաժեշտ է գիտելիքների, մարդկային և կազմակերպչական ռեսուրսների համախմբում: Նա ՀՀ առողջապահության նախարարության անունից շնորհակալություն է հայտնել բոլոր այն անհատներին ու կազմակերպություններին, մասնավորապես «Նվիրիր կյանք» հիմնադրամին, որոնց ջանքերի շնորհիվ փրկվել և փրկվում են վաղածին երեխաների կյանքեր, բարձրացվում է նաև հանրության իրազեկվածության աստիճանը:

Հանրապետությունում 2013թ. ապրիլից մինչև 2014թ. նոյեմբեր «Սուրվանտա» դեղի կիրառման շնորհիվ փրկվել է վաղածին 135 երեխայի կյանք:

«Սուրվանտայի օգտագործումը մեկն է այն լուրջ գործիքներից, որոնք նվազեցնում են մանկական մահացության ցուցանիշը, դրա արդյունավետությունն ապացուցված է ամբողջ աշխարհում»,- հավելել է ՀՀ առողջապահության նախարարի տեղակալը:

«Փրկենք հարյուրավոր կյանքեր» նախագիծը մեկնարկել էր 2012 թվականին «Ֆարմ Թրասթ» բժշկադեղագործական ընկերության կողմից Նեոնստալ բժշկության հայկական ասոցիացիայի և ՀՀ առողջապահության նախարարության հետ համատեղ: Նախարարությունը սուրֆակտանտը ներառել է «Հիմնական դեղերի ցանկում» և ձեռնսմուխ է եղել Հայաստանի ծննադատներն այս դեղամիջոցով ապահովման պետական ծրագրի իրականացմանը: Նախագծի առաջին փուլի իրականացումը հնարավոր է դարձել «Նվիրիր կյանք» բարեգործական հիմնադրամի ֆինանսական աջակցության շնորհիվ, որի պատվավոր նախագահն է ՀՀ նախագահի  տիկին Ռիտա Սարգսյանը:

Խորհրդաժողովին ներկա են եղել Բելառուսի գլխավոր մանկական անեսթեզիոլոգ-ռեանիմատոլոգ Օկսանա Սֆիրսկայան, ով հայաստանյան գործընկերներին ներկայացրել է իրենց երկրի փորձը, անդրադարձավ հաջողություններին ու ծրագրերին:

Նշենք, որ սուրֆակտանտ-«Սուրվանտան» դեղը հեղուկի մակերևութային լարվածության փոքրացման շնորհիվ խոչընդոտում է նորածինների թոքերում ալվեոլների կպումներին:

Պաշտոնական տվյալներով` մեր երկրում տարեկան ծնվում է 450 վաղածին երեխա, որից 250-`ը ծայրահեղ ցածր քաշով և շնչառական դիսթրես համախտանիշով:

Ընդհանուր առմամբ, վերջին 20 տարում աշխարհում դիտվում է վաղածին երեխաների ծնելիության ցուցանիշների աճ, իսկ վաղածին հղիությունը գերակշռում է նորածինների մահացության պատճառների թվում` հանգեցնելով տարեկան ավելի քան 1մլն դեպքի կամ աշխարհում մանուկների մահերի 35 տոկոսը: