Ձեր վստահելի աղբյուրը

ՀՀ ազգային վիճակագրական ծառայությունը հրապարակել է «Հայաստանի սոցիալական պատկերը և աղքատությունը» զեկույցը, որն անդրադառնում է 2008-2013թթ. ժամանակահատվածում Հայաստանի սոցիալական վիճակի և կենսամակարդակի փոփոխություններին: Զեկույցը կազմվել է Համաշխարհային բանկի վերլուծական և տեխնիկական աջակցությամբ:

Աղքատության մակարդակը գնահատելու համար սույն զեկույցում որպես բարեկեցության ցուցանիշ օգտագործվել է սպառումը: Տնտեսագետների կարծիքով, սպառմանն ուղղված ծախսերն ավելի ճշգրիտ տեղեկատվություն են ներկայացնում բարեկեցության մասին, քանի որ եկամուտների բացակայությունը դեռևս չի նշանակում բարեկեցության զրոյական մակարդակ այն դեպքերում, երբ տնային տնտեսություններն իրենց ապրուստը հոգում են սեփական արտադրության սննդամթերքի սպառման կամ վարկային շուկայից միջոցների ներգրավման եղանակով:

Զեկույցում ներկայացված է 2008-2013 թթ . ժամանակահատվածում Հայաստանի Աղքատության պատկերը :

Աղքատության չափման և վերլուծության մեթոդաբանությունը (հիմնված 2009 թվականի տվյալների վրա ) վերանայվել է Համաշխարհային բանկի տեխնիկական աջակցությամբ: 2013 թվականին աղքատության գիծը հաշվարկվել է՝ վերանայելով
2009 թվականի նվազագույն պարենային զամբյուղը և ոչ պարենային ապրանքների գնահատված մասնաբաժինը:

Աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության վերին ընդհանուր գծից, շատ աղքատ գնահատվել  են նրանք, ում սպառումը մեկ չափահաս անձի հաշվով ցածր է եղել աղքատության ստորին ընդհանուր գծից, իսկ ծայրահեղ աղքատ գնահատվել են նրանք, ում սպառումը մեկ չափահաս անձի հաշվով ցածր է եղել աղքատության պարենային գծից :

2013 թվականին աղքատության ընդհանուր՝ վերին և ստորին, ինչպես նաև ծայրահեղ աղքատության գծերը, արտահայտված մեկ չափահաս անձի հաշվով,  մեկ ամսվա համար գնահատվել են համապատասխանաբար 39193 դրամ ( կամ 95.7 ԱՄՆ դոլար ), 32318 դրամ ( կամ 78.9 ԱՄՆ դոլար ) և 22993 դրամ ( կամ 56.1 ԱՄՆ  դոլար):

Զեկույցն անդրադառնում է Հայաստանի տնտեսության վրա համաշխարհային ֆինանսատնտեսական, պարտքային, իրացվելիության և վստահության ճգնաժամերի բացասական ազդեցություններին՝ սկսած 2008 թվականի չորրորդ եռամսյակից:

Ըստ զեկույցի` 2008-2013 թթ . ժամանակահատվածում Հայաստանում աղքատության մակարդակի աճը պայմանավորող առավել կարևոր գործոնը 2009 թվականին տնտեսության խոր անկումն էր 14.1 տոկոսի չափով : Հայաստանի տնտեսությունը 2010 թվականին նախորդ տարվա նկատմամբ մի փոքր աճեց, սակայն աճը կազմեց ընդամենը 2.2 տոկոս, իսկ 2011 թվականին 2010 թվականի նկատմամբ աճը կազմեց 4.7 տոկոս :

Հաջորդ տարում՝ 2012 թվականին տնտեսական աճը բավականին զգալի էր՝ 7.2 տոկոսի չափով, սակայն դեռ բավարար չէր 2008 թվականի մակարդակին հասնելու համար, իսկ 2013 թվականին տնտեսության տարեկան աճը կազմեց 3.5 տոկոս :

Ինչպես բացահայտում են 2013 թվականի ՏՏԿԱՀ տվյալները , ողջ բնակչության միջին ամսական իրական սպառումը 2008 թվականի համեմատ աճել է 4.4 տոկոսով, սակայն աճը նկատվել է սպառման միայն երրորդ , չորրորդ և հինգերորդ քվինտիլներում:

2013 թվականին արձանագրվեց նախորդ տարվա համեմատ աղքատության մակարդակի աննշան նվազում, ինչը վիճակագրորեն նշանակալի չէ : 2013 թվականին աղքատության մակարդակը կազմել է 32.0 տոկոս , որն ընդամենը 0.4  տոկոսային կետով ցածր է նախորդ տարվա ցուցանիշից ( 32.4 տոկոս ):

2013 թվականին բնակչության գրեթե ամեն երրորդը ` 32.0 տոկոսը, եղել է աղքատ, որոնցից 13.3 տոկոսը ` շատ աղքատ, իսկ 2.7 տոկոսը` ծայրահեղ աղքատ:  Չնայած որ 2011 թվականից աղքատության մակարդակն անընդմեջ նվազել է , սակայն դրա խորությունն ու սրությունը դեռևս գե րազանցում են 2008 թվականի մակարդակը:

2013 թվականին աղքատների թվաքանակը կազմել է մոտ 967 հազար (մշտական բնակչության ցուցանիշի հաշվով ), որոնց թվում շատ աղքատների թվաքանակը կազմել է 402 հազար , իսկվերջինների թվում ծայրահեղ աղքատների թվաքանակը կազմել է մոտ 82 հազար մարդ: