Եվրոպայի խորհրդի հանձնակատար. Ադրբեջանում ԵԽ բոլոր գործընկերները բանտարկվում են
Եվրոպայի խորհրդի Մարդու իրավունքների հարցերով հանձնակատար Նիլս Մույժնիկսը (Nils Muižnieks) գրառում է կատարել ֆեյսբուքյան իր էջում վերջերս Ադրբեջան կատարած պաշտոնական այցի վերաբերյալ:
«Ես վերջերս եմ վերադարձել ներկայիս պաշտոնում՝ իբրև Եվրոպայի խորհրդի Մարդու իրավունքների հարցերով հանձնակատարի իմ երկու և կես տարվա աշխատանքի ամենածանր առաքելությունից: Հոկտեմբեր ամսվա վերջին այցելել էի Ադրբեջան, որը նոր է ավարտել իր նախագահությունը 47 անդամ-երկիր ունեցող Եվրոպայի Խորհրդում: Մեր մայրցամաքում մարդու իրավունքների պաշտպանության պահապան հանդիսացող մեր Կազմակերպությունը նախագահող երկրների մեծամասնությունը իր ժամանակը օգտագործում է ժողովրդավարական արժեքներին իրենց նվիրվածությունը վերահաստատելու համար:
Ադրբեջանը կմնա պատմության մեջ իր նախագահության շրջանում մարդու իրավունքների նկատմամբ աննախադեպ բռնաճնշումների նոր ալիք իրականացնելու համար: Ադրբեջանում իմ բոլոր գործընկերները բանտարկված են:
Սիրտս կոտրվեց, երբ բանտում այցելեցի Լեյլա Յունուսին: Նա լալիս էր մեր կես ժամանոց հանդիմպան ողջ ընթացքում: Նա հատկապես ճնշված է արդեն երեք ամիս իր ամուսնուն հանդիպելու հնարավորություն չունենալու համար, ով նույնպես գտնվում է նախակալանքային ազատազրկման մեջ, չնայած ձերբակալությունից առաջ սրտի կաթված էր տարել:
Յունուս ամուսինները տարածաշրջանում ամենախիզախ մարդկանցից են, ովքեր փորձել են Հայաստանում գտնվող իրենց գործընկերների հետ երկխոսություն ծավալել, մի երկրի, որի հետ Ադրբեջանը արդեն 25 տարի պատերազմում է.... Արիֆը ու Լեյլան երկուսն էլ մեղադրվում են պետական դավաճանության մեջ»:
ԵԽ Մարդու իրավունքների հանձնակատարը նաև այլ հանդիպումներ է ունեցել Ադրբեջանում բանտարկված կամ անհիմն բանտարկության վտանգի պատճառով փախուստի մեջ գտնվող մարդու իրավունքների այլ պաշտպանների հետ:
«Սրանք լրագրողների և ակտիվիստների միայն մի մասն են այն շատերից, ովքեր Ադրբեջանում գտնվում են ճնշումների ներքո կամ արդեն բանտարկվել են: Եվրոպայի Խորհրդի գրեթե բոլոր գործընկերները թիրախավորվել են Ադրբեջանի իշխանությունների կողմից: Սա ծայրահեղ դժվար է դարձնում Ադրբեջանի և ԵԽ համագործակցությունը: Հաշվեհարդարները պետք է դադարեցվեն: Հենց հիմա», - գրել է ԵԽ հանձնակատարը իր էջում:
Լրահոս
Տեսանյութեր
Քեզ ըտենց Դո՞գն է ասել. Լարված վիճակ Երևանի ավագանիում
