Ձեր վստահելի աղբյուրը

Ադրբեջանի Իսմայիլլի շրջանի Գուբախալիլլի գյուղի միջնակարգ դպրոցի պատմության ուսուցիչ Վյոգար Վագիֆօղլուն երկրի նախագահ Իլհամ Ալիևին բաց նամակ է ուղարկել` բողոքելով ցածր աշխատավարձի պատճառով իրեն ինքնասպանության աստիճանի հասցնելու համար: Նամակը հրապարակել է ադրբեջանական «Ազադլիգ» թերթը:

Ուսուցիչը նամակում գրում է, որ 19 տարի է, ինչ աշխատում է գյուղի միջնակարգ դպրոցում` ծայրահեղ աղքատության պայմաններում մեծացնելով 3 դպրոցահասակ երեխայի:

«Մենք 5 հոգանոց ընտանիքով ձեր վճարած 200 մանաթ աշխատավարձով չենք կարողանում ապրել: Դիմացը ձմեռ է, իսկ խիստ կարիքավոր լինելու պատճառով չեմ կարողանում վերանորոգել տունս: Վարկի ու պարտքերի հետևանքով հասել եմ ինքնասպանության աստիճանի»,- նշում է ուսուցիչը:

Ինչպես գրում է «Ազադլիգը», ուսուցիչը նամակում հարկ է համարել Ադրբեջանի Միլլի մեջլիսին մի քանի առաջարկներ անել, որոնք ուղղված են երկրի սոցիալ-տնտեսական բարելավմանը:

«Պետք չէ միայն 5-6 երեխա ունեցող ընտանիքներին ամսական 30 մանաթ երեխայի նպաստ տալ, այլ պետք է նվազագույնը 50 մանաթ տալ նաև 1-3 երեխա ունեցող ընտանիքներին, որպեսզի այս աղքատ ու գործազուրկ ժողովուրդը կարողանա վճարել լույսի, գազի, այլ կոմունալ ծախսերը»,- առաջարկում է ուսուցիչը:

Նամակում շեշտված է, որ Ադրբեջանի Արցախյան պատերազմի վետերաններին տրվող «ստորացուցիչ» 45 մանաթը պետք է գոնե 100 մանաթ դառնա:

«Չգիտե՞ք, որ աշխարհի ոչ մի պետություն իր վետերանին մեզ չափ չի էժանացնում ու նվաստացնում: 45 մանաթ ստացող մեր վետերաններն ինչպե՞ս պետք է գոյատևեն»,- գրում է ուսուցիչը:

Ըստ աղբյուրի` նա իր նամակում կոչ է անում Միլլի մեջլիսին նաև ուշադրությունը սևեռել ոչ թե հարկահավաքության, այլ հողի արդյունավետ մշակմանը նպաստելու վրա:

«Ամեն տեղ սպորտային համալիրներ են կառուցվում: Հարց է ծագում` արդյոք առանց փողի, սոված ստամոքսով սպորտով զբաղվել կլինի»,- եզրափակում է նամակի հեղինակը:

Նյութեր թեմայի շուրջ`
Ադրբեջան. ի՞նչն է ուսուցչուհուն դրդել ինքնասպանության
Ադրբեջան. Երեխաների ինքնասպանության դեպքերը էականորեն աճել են
IWPR. Ադրբեջանում ներկայումս ղարաբաղյան պատերազմի 20 վետերան ինքնասպանության եզրին են