Ձեր վստահելի աղբյուրը

ՀՀ դրամի ճշգրտումը պայմանավորված է օբյեկտիվորեն գոյություն ունեցող և արժութային շուկայի վրա ազդող մի շարք գործոններով: Այս մասին այսօր լրագրողների հետ հանդիպման ժամանակ հայտարարեց ՀՀ Կենտրոնական բանկի խորհրդի անդամ Արմենակ Դարբինյանը:

Մասնավորապես, ըստ նրա, դրամի փոխարժեքի ճշգրտմանը նպաստեցին արտաքին գործոնները, վերջին ժամանակահատվածում տարածաշրջանում և միջազգային ֆինանսական շուկաներում տեղի ունեցած զարգացումները` տնտեսական աճի անկում, ազգային արժույթի արժեզրկում և այլն:

«Մեր տնտեսությունը մեծապես կախված է Ռուսաստանից, ուստի ՌԴ տնտեսությունում տեղի ունեցող զարգացումները չէին կարող իրենց ազդեցությունը չունենալ մեր տնտեսության վրա: Խոսքը վերաբերում է թե ներդրումներին, թե տրանսֆերտներին»,- նշեց Ա.Դարբինյանը:

Հաջորդ արտաքին գործոնը, ըստ նրա, պայմանավորված է միջազգային ապրանքահումքային շուկաներում տեղի ունեցող զարգացումներով, ինչպես նաև` զարգացած և զարգացող երկրների տնտեսական աճի տեմպերի անկման հետ: Այսինքն, ըստ նրա, համաշխարհային շուկայում տարբեր ապրանքային շուկաներում նկատվող գնանկումային միտումները, բնականաբար, անդրադառնում են Հայաստանի վրա: Ա.Դարբինյանի խոսքերով` մեզ հիմնականում առնչվում են հանքաքարերի շուկաները, որտեղ նկատվող գնանկումը նույնպես բերում է արժութային հոսքերի ծավալների կրճատման:

«Բնականաբար, այս ամենը իր ազդեցությունը կունենար: Վերջին երկու շաբաթներում այդ ճնշումն արժութային շուկաների վրա ուժեղացել էր և դրանով պայմանավորված` անհրաժեշտություն կար ճշգրտել դրամի փոխարժեքը, քանի որ հակառակ պարագայում մենք ունենում էինք տարբեր բացասական ազդեցություններ: Մասնավորապես, արժեզրկումը տեղի էր ունենում մեր հիմնական առևտրային գործընկեր երկրներում, դրա հետևանքով տեղի էր ունենում արտահանման մրցունակության նվազում: Իսկ դա հանգեցնում է արտահանման ծավալների կրճատման, զբաղվածության և եկամուտների կրճատման: Բնականաբար, սա զգայուն խնդիր էր, որը արժութային շուկայում արձագանք կունենար»,- ընդգծեց Ա.Դարբինյանը:

Նա նաև նշեց, որ ԱՄՆ դոլարը արժեվորվել է մի շարք երկրների արժույթների նկատմամբ: Ըստ նրա` դոլարն իր դիրքերն ամրապնդում է ԵՄ երկրներում. օրինակ` Լեհաստանում, Չեխիայում, Հունգարիայում ազգային արժույթի տարեկան արժեզրկումը հասել է 8-11 տոկոսի:

Ինչ վերաբերում է ազգային արժույթի պահպանմանը, Ա.Դարբինյանն ասաց, որ արժութային շուկայում արժեզրկման ճնշումների առկայության պարագայում, եթե արհեստականորեն փորձում ես պահպանել ազգային արժույթի փոխարժեքը, ապա դա տեղի է ունենում արժութային ռեզերվների հաշվին:

Նրա խոսքերով` ՀՀ կենտրոնական բանկի պահուստները լիովին բավարար են կանխելու փոխարժեքի բոլոր տեսակի արհեստական տատանումները և ապահովելու ֆինանսական կայունությունը:

Իսկ թե այդ ճշգրտումը ինչ հետևանքներ կարող է ունենալ գնաճի վրա, Ա.Դարբինյանը նշեց, որ ճշգրտման արդյունքում գնաճային մեծ ռիսկեր իրենք չեն տեսնում:

«Մեր գնաճը ներկայումս գտնվում է տատանումների թույլատրելի միջակայքում՝ 4 ±1,5%: Տարեվերջին ակնկալում ենք, որ գնաճը գտնվելու է այդ թույլատրելի միջակայքում»,- ասաց նա:

Ւնչ վերաբերում է ֆինանսական կայունությանը, Ա. Դարբինյանը նշեց, որ այստեղ նույնպես էական ռիսկեր չեն նկատում: «Մեր բոլոր սթրես-թեստերը վկայում են այն մասին, որ նման ճշգրտումը մեծ ռիսկեր, նույնիսկ էական որևէ ռիսկ ֆինանսական կայունության ապահովման տեսանկյունից իր մեջ չի պարունակում: «Ուզում եմ մեր հանրությանը հավաստիացնել, որ ամբողջ գործընթացը գտնվում է Կենտրոնական բանկի հսկողության ներքո և մեր քաղաքականությամբ անում ենք ամեն ինչ, որպեսզի բացառվեն սպեկուլյատիվ դրսևորումները շուկայում և պահպանվի արժութային շուկայի կայունությունը»,- հայտարարեց ԿԲ խորհրդի անդամը:

Նախորդիվ`
ՀՀ ԿԲ. Պահուստները լիովին բավարար են կանխելու փոխարժեքի արհեստական տատանումները