Ձեր վստահելի աղբյուրը

«Հայաստանում շատ խնդիրներում և քաղաքականապես, և գիտական տեսակետից պասիվ ենք: Մենք պասիվ են, միայն փստագրողներ ենք, արձանագրողներ»,- լրագրողների հետ հանդիպման ժամանակ ասաց հայագետ-նախիջևանագետ, ՀՀ մշակույթի վաստակավոր գործիչ Արգամ Այվազյանը՝ կապված Ջուղայի, Նախիջևանի հայկական հուշարձանների վերացման հետ:

Նրա խոսքով, թե Հայաստանի արտաքին գործերի նախարարությունը, տարբեր հասարակական կազմակերպությունները այդ խնդիրների մասին բարձրաձայնել են ՅՈՒՆԵՍԿՕ-ում, բայց մինչև վերջ չեն գնացել. «Չենք կարողացել առ այսօր գոնե ՅՈՒՆԵՍԿՕ-ի մակարդակով պատասխանատվության ենթարկել Ադրբեջանին»:

Ա. Այվազյանի խոսքով, առանձին անհատներ անդրադառնում են այդ խնդիրներին, բարձաձայնում են հնարավոր բոլոր ատյաններում, սակայն միայն պետական մակարդակով խնդրի բարձրացման պարագայում հնարավոր է հասնել հաջողության:

«Գիտնականները կարող են գրել, իսկ բարձրաձայնելն արդեն պետական մարմինների գործն է»,- ասաց նա:

Ա. Այվազյանին զարմացրել է այն հանգամանքը, որ նույնիսկ ՀՀ Գիտությունների ազգային ակադեմիան որևէ հայտարարությամբ հանդես չի եկել Ադրբեջանի կողմից հայկական հուշարձանների կործանման խնդրի վերաբերյալ:

Հայագետի խոսքով, նույնիսկ հենց Հայաստանում գտնվող մշակութային արժեքների գիտական հետազոտման համար պետականորեն մշակված ծրագիր չկա: