Ձեր վստահելի աղբյուրը

«Հայաստանի պետական ֆիլհարմոնիկ նվագախումբ» և «Կոմիտասի անվան պետական քառյակ» պետական ոչ առևտրային կազմակերպություններին «ազգային» կարգավիճակ շնորհելու մասին որոշման նախագիծն ընդգրկված է կառավարության նոյեմբերի 27-ին կայանալիք նիստի օրակարգում: Այն ներկայացնելու է մշակույթի նախարար Հասմիկ Պողոսյանը: Այս մասին տեղեկանում ենք կառավարության պաշտոնական կայքից:

Ըստ նախագծի, այս կազմակերպությունների «ազգային» կարգավիճակ շնորհելու մասին կառավարության որոշման նախագծի անհրաժեշտությունը պայմանավորված է «Մշակութային օրենսդրության հիմունքների մասին» Հայաստանի Հանրապետության օրենքի, ՀՀ կառավարության 2012 թվականի փետրվարի 9-ի որոշման պահանջներով և մշակութային ոչ առևտրային կազմակերպություններին «ազգային» կարգավիճակ շնորհելու հարցերով հանձնաժողովի դրական եզրակացությամբ:

Մշակութային ոչ առևտրային կազմակերպություններին «ազգային» կարգավիճակ շնորհելու հարցերով հանձնաժողովն այս տարվա հունիսի 10-ին կայացած նիստում բավարարել է «Հայաստանի պետական ակադեմիական երգչախումբ»-ին և «Կոմիտասի անվան պետական քառյակ»-ին «ազգային» կարգավիճակ շնորհելու հայտերը:

Վաստակավոր կոլեկտիվ, Հայաստանի պետական ֆիլհարմոնիկ նվագախումբը հիմնադրվել է 1925 թ.-ին, որպես Երևանի կոնսերվատորիայի սիմֆոնիկ նվագախումբ: Հայաստանի պատմության մեջ այն առաջին սիմֆոնիկ նվագախումբն էր, որը դարձել է Հայաստանում հետագայում ձևավորվող բոլոր սիմֆոնիկ և օպերային նվագախմբերի հիմքը: Նվագախմբի հիմնադիրներն էին` հայ երաժշտության դասական Ալեքսանդր Սպենդիարյանը և աշխարհահռչակ գեղագետ Արշակ Ադամյանը:

Կոմիտասի անվան քառյակը ստեղծվել է 1924 թ. նոյեմբերին Մոսկվայի կոնսերվատորիայի ուսանողներ Ավետ Գաբրիելյանի, Լևոն Օհանջանյանի, Միքայել Տերյանի և Սարգիս Ասլամազյանի նախաձեռնությամբ: 1925 թ. հունվարի առաջին օրերին սկսել է իր կանոնավոր փորձերն ու պարապմունքները` պրոֆեսոր Ե. Մ. Գուզիկովի ղեկավարությամբ: 1925-1931 թթ. քառյակը համերգներով հանդես է եկել ԽՍՀՄ բազմաթիվ քաղաքներում և Հայաստանում, իսկ 1931 թ-ին արժանացել է Հայկական ՍՍՀ պետական կվարտետի կոչման: 1932 թ. մայիսին Հայկական ԽՍՀ կառավարությունը քառյակին շնորհել է Կոմիտասի անունը՝ դեռևս մեծ երգահանի կենդանության օրոք:

««Հաշվի առնելով Կոմիտասի անվան պետական քառյակի բացառիկ դերը դասական երաժշտության պրոպագանդման և արմատավորման գործում, հայ և օտարերկրյա ունկնդիրներին Հայաստանի մշակույթը լավագույնս ներկայացնելու ասպարեզում, ինչպես և միջազգային հանրության շրջանում վաստակած բարձր վարկանիշը, միջնորդում ենք «Կոմիտասի անվան պետական քառյակ» պետական ոչ առևտրային կազմակերպությանը շնորհել «ազգային» կոչումը:

«Հայաստանի պետական ֆիլհարմոնիկ նվագախումբ» և «Կոմիտասի անվան պետական քառյակ» պետական ոչ առևտրային կազմակերպություններին «ազգային» կարգավիճակ շնորհելու մասին» Հայաստանի Հանրապետության կառավարության որոշման նախագծի նպատակը Հայաստանի Հանրապետության կողմից Հայաստանի պետական ֆիլհարմոնիկ նվագախմբի և Կոմիտասի անվան պետական քառյակի անցած ուղու արժևորումն է` նրանց գործունեության համար բոլոր պայմանների ստեղծմամբ»,- նշված է որոշման նախագծում: