Ձեր վստահելի աղբյուրը

Թուրքիայի «Ժողովուրդների դեմոկրատական կուսակցության» պատգամավոր Սեբահաթ Թունջելի կողմից Թուրքիայի խորհրդարան ներակայացված Թուրքիայում մարդկության դեմ իրագործած հանցագործությունների համար ներողություն խնդրելու և պատմության հետ առերեսվելու օրինագիծը չի մտնի Մեջլիսի օրակարգ: Լրագրողների հետ հանդիպման ժամանակ նման կարծիք հայտնեց թուրքագետ Հակոբ Չաքրյանը:

Խորհրդարանական այս կուսակցությունը պատգամավորների թվով չորրորդ հորիզոնականում է: Թուրքիայի «Ժողովուրդների դեմոկրատական կուսակցության» կին պատգամավոր Սեբահաթ Թունջելը ծնվել է Մալաթիայում:

«Չեմ կարծում, որ քուրդ է, թեև մեզ մոտ ներկայացնում են որպես քուրդ: Առոգանությունը քրդի չէ, այդ կուսակցությունն էլ քրդական չէ: Կուսակցության կազմում կան առաջադեմ մտավորականներ, արվեստի գործիչներ: Պարզապես պատգամավորների մեծ մասն են քուրդ»,- ասաց թուրքագետը:

Հ. Չաքրյանի խոսքով, այդ օրինագծով Թունջելը պահանջում է, որ Թուրքիայի նախագահ Էրդողանն ազգային մեծ ժողովում պաշտոնապես ներողություն խնդրի մարդկության դեմ իրագործած բոլոր հանցագործությունների համար՝ պետության անունից, մեկ տարում ստեղծել ճշմարտությունների հետազոտման խորհրդարանական հանձնաժողով և բացել Թուրքիայում բոլոր արխիվները, նաև բարոյական և նյութական փոխհատուցում վճարել բոլոր տուծաժներին, երկրում ազգային սուգ հայտարարել իրադարձությունների օրերին:

Նա նշեց, որ այս օրինագիծը որևէ կապ չի կարող ունենալ Թուրքիայի իշխանությունների հետ, քանի որ հենց իշխանությունները չեն ուզում լսել Թունջելի անունը: Ըստ Հ. Չաքրյանի, այս կուսակցությունը պայքարում է ժողովրդավարության հաստատման համար:

Թուրքագետի կարծիքով, այս օրինագիծը թեև կմարժվի, բայց արդեն Հայոց ցեղասպանության հարցը կմնա Թուրքիայի օրակագում, կնպաստի նաև Հայոց ցեղասպանության հարցի վերարծարծումների ակտիվացմանը, ավելի հանդուգն կլինեն այն մարդիկ, ովքեր կցանկանան արտահայտվել Հայոց ցեղասպանության ճանաչման օգտին, քանի որ Թուրքիայի խորհրդարանն այդ հարցը քննարկել է: Անտրամաբանական կլինի այն մարդկանց, մասնավորապես մտավորականների ձերբակալությունները, ովքեր կխոսեն Հայոց ցեղասպանության օգտին, քանի որ կա նախադեպ՝ պատգամավորն է բարձրացրել նման հարց:

Ինչ վերաբերում է Հայոց ցեղասպանության 100-րդ տարելիցին ընդառաջ Թուրքիայի կողմից իրականացվելիք քայլերին, արդյո՞ք հնարավոր է սահմանը բացել, թուրքագետն ասաց, որ Թուրքիան ավելի շուտ կսպասի 100-րդ տարելիցի կապակցությամբ անցկացվելիք միջոցառումների արդյունքին, այնուհետև նոր որոշում կկայացնեն որևէ քայլ կատարել:

«Առանց դիվանագիտական հարաբերությունների հաստատման բացված սահմանը նույն արագությամբ էլ կարող է փակվել: Նախ և առաջ անհրաժեշտ է միջպետական հարաբերությունների հաստատումը, նման պարագայում սահմանն ինքնըստինքյան բացվում է»,- ասաց Հ. Չաքրյանը:

Նախորդող հրապարակում՝
Քրդական ծագումով թուրք պատգամավորը Հայոց ցեղասպանությունը ճանաչելու օրինագիծ է ներկայացրել խորհրդարան