Ձեր վստահելի աղբյուրը

Նոյեմբերի 29-ին «Aze.az» համացանցային ռեսուրսը, հղում անելով «APA.az» գործակալությանը, հրապարակել է «Կովկասի մուսուլմանների վարչության» առաջնորդ Ալլահշյուքուր Փաշազադեի  «Ալլահշյուքուր Փաշազադե, ԻՇԻՊ-ը առաջացել է ԱՄՆ-ի և Արևմուտքի այլ երկրների անմիջական մասնակցությամբ» վերտառությամբ հարցազրույցը, որի մեկնաբանության համար «Panorama.am»-ի թղթակիցը դիմեց արաբագետ Սարգիս Գրիգորյանին:

Ըստ հրապարակման` Փաշազադեն Իրանի Իսլամական Հանրապետություն կատարած այցելության շրջանակներում մասնակցել է միջազգային գիտաժողովի, որտեղ ԿՄՎ-ի առաջնորդը ելույթ է ունեցել իսլամական արմատականության վերաբերյալ:

Ըստ արաբագետի` հարցազրույցը վերաբերում է վերոհիշյալ գիտաժողովի ընթացքում Ալլահշյուքուր Փաշազադեի ելույթին, որի ժամանակ արտահայտվել են մի շարք հետաքրքիր մտքեր, որոնց կարելի է անդրադարձ կատարել, առավել ևս, որ, հաշվի առնելով գիտաժողովի անցկացման վայրը` ԻԻՀ-ը, դրանք ակնհայտ հակաամերիկյան և հակաարևմտյան են:

Մասնավորապես ԿՄՎ-ի առաջնորդն անդրադառնալով «Իսլամական պետությանը» նշել է, որ այդ կառույցը, ինչպես նաև իսլամական այլ արմատական խմբավորումներ ստեղծվել են ԱՄՆ-ի և արևմտյան այլ երկրների անմիջական մասնակցությամբ, այն ժամանակ, երբ խորհրդային զորքերը մտան Աֆղանստան, որի նպատակը ԽՍՀՄ-ի փլուզումն էր:

Ըստ Գրիգորյանի` Փաշազադեն տեղեկացված չի ԻՊ-ի պատմությանը, և չգիտի, որ կառույցը ձևավորվել է 1990-ական թթ. վերջին Հորդանանում: Արևմուտքին պետք չէր ստեղծել իսլամական ծայրահեղ արմատական մի կառույց, որի անվանումն («Իրաքում և Շամում (Սիրիայում) իսլամական պետություն») արդեն խոսում է այն մասին, որ նրանց ջիհադական պայքարի թիրախը չի լինելու Աֆղանստանում հայտնված խորհրդային զինվորը:

«Հրապարակման մեջ Ալլահշյուքուր Փաշազադեն հարց է տալիս. «Ինչու՞ «Իսլամական պետություն» անունը կրող կառույցը ոչ մի անգամ չի հիշատակել Պաղեստինի մասին»: ԿՄՎ-ի առաջնորդին հավանաբար պետք է հիշեցնել այն բոլոր հրապարակումները, որտեղ ԻՊ-ը, առավել ևս նրա առաջնորդ Աբու Բաքր ալ-Բաղդադին անդրադառնում է Պաղեստինին ու պաղեստինցիներին: Ցավալի է, որ Կովկասի մուսուլմանների հոգևոր առաջնորդը չի հետևում Մերձավոր Արևելքի, և ընդհանրապես ամբողջ աշխարհի համար սպառնալիքի վերածված կառույցի և դրա առաջնորդի ուղերձներին, որտեղ բավական ուշագրավ տեղեկություններ կան նաև հարավկովկասյան իսլամական արմատականության վերաբերյալ»,- հավելեց նա:

Ըստ Գրիգորյանի` հրապարակման մեջ հակասություններ կան Ալլահշյուքուր Փաշազադեի արտահայտած մտքերում. «Մի կողմից ԿՄՎ-ի առաջնորդը աճող իսլամական ծայրահեղ արմատական տրամադրությունների, լայն թափ ստացած ահաբեկչական բռնարարքների մեջ տեսնում է նաև իր մեղավորությունը, իսկ մյուս կողմից` Փաշազադեն այդ ամենի համար մեղադրում է արևմտյան երկրներին: Փաշազադեն նշում է, որ, այլ երկրների համեմատ, Ադրբեջանում իսլամական ծայրահեղ արմատականության սպառնալիքը նվազագույն է, սակայն, դրա հետ մեկտեղ, նշվում է, որ Ադրբեջանում իսլամական ծայրահեղ արմատական գաղափարախոսության դեմ նետված է զգալի ներուժ, և ադրբեջանական քաղաքական-կրոնական կառույցների, իրավապահ մարմինների անմիջական մասնակցությամբ ակտիվ միջոցառումներ են իրականացվում վտանգը կանխելու համար: Նման ռեսուրսների կուտակումն ու միջոցառումների իրականացումը չի խոսում Ադրբեջանում առկա իսլամական ծայրահեղ արմատականության նվազագույն վտանգի մասին»: