Ձեր վստահելի աղբյուրը

Ազգային ժողովի կողմից նախօրեին ընդունված «Ժամանակավոր անաշխատունակության նպաստների մասին» օրենքի նախագիծը բարենպաստ է բոլոր կանանց համար: Լրագրողների հետ հանդիպման ժամանակ նման կարծիք հայտնեց ԱԺ ՀՀԿ խմբակցության անդամ Կարինե Աճեմյանը: Նրա խոսքով, երբ կառավարությունը ԱԺ է ներկայացնում օրենքի նախագիծ, այն քննարկվում է բազմաթիվ իրավաբանների հետ, այսինքն չի կարող լինել սահմանադրական իրավունքի խախտում:

Կ. Աճեմյանը նշեց, որ օրինագծի առաջին տարբերակի քննարկումների ժամանակ հենց ՀՀԿ խմբակցության անդամներն են մտահոգություններ, դժգոհություններ հայտնել, սակայն վերափոխված տարբերակում բոլոր խնդիրները լուծված են. «Չկա կին, որի իրավունքը խախտվել է այս օրենքով: Նաև այն կնպաստի, որ չարաշահումների դեմն առնենք»:

Նրա խոսքով, օրենքի ընդունումը պայմանավորված է այն խնդրով, որ չարաշահումներ էին առաջ եկել. ծնելիությունը չի ավելանում, բայց բյուջեից գումարներ է գնում ժամանակավոր անաշխատունակ կանանց նպաստ տալու պատճառաբանությամբ. «Թող այս օրենքը մեկ տարի աշխատի, տեսնենք, եթե խնդիր կա, օրենքը կարող ենք լրամշակել: Տեսնենք, ո՞վ կտուժի այս մեկ տարվա ընթացքում, ովքե՞ր կբողոքեն, բյուջեն կտուժի՞, ծնելիությունը կավելանա՞»:

Հիշեցնենք, որ նախօրեին Ազգային ժողովը 68 կողմ, 1 դեմ և 0 ձեռնպահ ձայների հարաբերակցությամբ երկրորդ ընթերցմամբ և ամբողջությամբ ընդունեց «Ժամանակավոր անաշխատունակության նպաստների մասին» ՀՀ օրենքում լրացումներ և փոփոխություններ կատարելու մասին ՀՀ օրենքի նախագիծը: «Ժամանակավորապես անաշխատունակ ճանաչված անձանց իրավունքների պաշտպանության» քաղաքացիական նախաձեռնությունն արդեն տևական ժամանակ է իր դժգոհությունն է հայտնում այս նախագծի դեմ: Նրանց դժգոթյունների արդյունքում նախագիծը որոշակի փոփոխությունների ենթարկվեց, սակայն նախաձեռնության անդամները նաև վերափոխված տարբերական են անընդունելի համար: Ըստ օրենքի, 2015թ-ի հունվարից նախատեսվում է կրճատել աշխատող հղի կանանց մայրության նպաստը, իսկ 2016թ-ի հունվարից նպաստ վճարել չաշխատող կանանց:

Ասուլիսին ներկա «Ժամանակավորապես անաշխատունակ ճանաչված անձանց իրավունքների պաշտպանություն» քաղաքացիական նախաձեռնության անդամ Շողեր Բաբայանն էլ նախ ասաց, որ վերափոփված նախագիծով որևէ հանրային քննարկում տեղի չի ունեցել. «Վերափոխված նախագիծն արագ որոշվեց, մեկ շաբաթից ավելի փակ էր հանրության համար, չէինք կարողանում գտնել»:

Շ. Բաբայանը խնդրահարույց կետերից է համարում օրենքով վերին շեմ նշանակելու դրույթը. 1 մլն դրամից ավելի աշխատավարձ ստացող հղի կանանց նպաստները վճարվելու են գործատուների կողմից: Նա մտավախություն ունի, որ հնարավոր է մեկ տարի անց այդ 1 միլիոն դրամի շեմը կարող են իջեցնել: Նա նաև նշեց, որ չարաշահումներ լինում են պետական ընկերություններում է, ոչ թե մասնավոր:

Նախորդող հրապարակումներ՝
«Ժամանակավոր անաշխատունակության նպաստների մասին» նախագիծն ընդունվեց
«Անթույլատրելի է նման օրենքի ընդունումը». Կանայք՝ ընդդեմ «նպաստների մասին» օրենքի