Ձեր վստահելի աղբյուրը

Ադրբեջանի պաշտպանության նախարարության՝ Գեդաբեկում տեղակայված զորամասերից մեկում Աղդաշի շրջանից պարտադիր զինծառայության զորակոչված զինծառայող Նուրլան Ալի օղլու Դադաշովն իրեն ամրակցված ինքնաձիգից արձակված կրակից տեղում մահացել է: Այս մասին որոշ ժամանակ առաջ հայտնել էր ադրբեջանական MeydanTV հեռուստաալիքի կայքը:

Վերջերս էլ MeydanTV-ին իր աղբյուրները տեղեկացրել են, թե զինծառայողներին այս տարի չի տրվելու տարվա վերջում իրենց հասանելիք թվով 13-րդ աշխատավարձը. որպես պատճառ նշվում է բյուջեում միջոցների բացակայությունը: Ըստ աղբյուրի` զինծառայողների շարքերում լուրեր են շրջանառվում այն մասին, որ պաշտպանության նախարար Զաքիր Հասանովը մտադիր է առհասարակ վերացնել 13-րդ աշխատավարձը:

Այս երկու տեղեկություններն էլ ճշտելու նպատակով Meydan TV-ն ՊՆ-ին գրավոր հարցապնդում է ուղարկել, սակայն, արդեն երկրորդ շաբաթն է` որևէ արձագանք չկա: Նախարարության մամուլի խոսնակ Վագիֆ Դերգահլըն հեռուստաալիքի թղթակցին ամեն անգամ պատասխանում է, որ Բաքվում չէ, և թե անհրաժեշտ տեղեկությունները հրապարակվում են ՊՆ պաշտոնական կայքում:

Հիշեցնենք, որ 2013-ի հոկտեմբերին Զաքիր Հասանովի՝ պաշտպանության նախարար նշանակվելուց ի վեր ադրբեջանական մամուլում առավել հաճախ դարձան դժգոհությունները ՊՆ մամուլի ծառայության ոչ արդյունավետ աշխատանքից: Բողոքներն առավել սրվեցին 2014-ի օգոստոսի սկզբին առաջնագծում լարվածության ու ադրբեջանական զինուժի ունեցած մեծ թվով կորուստների հետ մեկտեղ, երբ պաշտպանական գերատեսչության մամուլի ծառայությունը կամ չէր մեկնաբանում կամ էլ հակասական տեղեկություններ էր տալիս դրանց առնչությամբ: Բացի այդ, ՊՆ-ն էլ իր հերթին 2014-ի ընթացքում ժամանակ առ ժամանակ հանդես է եկել հաղորդագրություններով՝ դժգոհելով ԶԼՄ-ների աշխատանքից ու մեղադրելով նրանց «ռազմական գաղտնիքներ» հրապարակելու համար:

Ուշագրավ է, որ օգոստոսյան դեպքերից հետո՝ սեպտեմբերին, նախագահ Իլհամ Ալիևը ստորագրեց մի հրամանագիր, որը միտված էր այդ թվում ԶԼՄ-ների աշխատանքի սահմանափակմանը ռազմական լուրեր և սահմանամերձ շրջանների իրադրությունը լուսաբանելիս:

Նյութեր թեմայի շուրջ՝
Ադրբեջանի ռազմական փորձագետները մերկացրել են «հարձակվող ուղղաթիռի» մասին երկրի պաշտպանության նախարարության կեղծիքը
11 զոհ՝ Ադրբեջանի բանակում. «Դիվերսիա անելիս թող մտածեին, որ կորուստներ են ունենալու»