Ձեր վստահելի աղբյուրը

Շվեյցարիայի Բազել քաղաքում ընթացող ԵԱՀԿ անդամ երկրների արտգործնախարարների կոմիտեի նիստի շրջանակներում Լեռնային Ղարաբաղի հակամարտության կարգավորման գործընթացի մասով համատեղ հայտարարությամբ են հանդես եկել ԵԱՀԿ Մինսկի խմբի համանախագահ երկներ` ԱՄՆ-ի, Ֆրանսիայի և Ռուսաստանի արտաքին գերատեսչությունների ղեկավարաները: Տեղեկանում ենք ԵԱՀԿ պաշտոնական կայքից:

«Մենք` Մինսկի խմբի համանախագահ երկրների արտաքին գործերի նախարարներս, շարունակում ենք հավատարիմ մնալ Լեռնային Ղարաբաղի հակամարտության խաղաղ կարգավորման գործընթացին: Այդ հարցում ռազմական լուծում չի կարող լինել, ուստի մենք կոչ ենք անում կողմերին զերծ մնալ բռնության գործադրումից և ակտիվորեն աշխատել տևական խաղաղության հասնելու համար»,- ասված է հայտարարության մեջ:

Արտգործնախարարները ափսոսանք են հայտնել շփման գծի երկայնքով լարվածության և բռնության աճի, հուլիս և օգոստոս ամիսներին գրանցված ռազմական բախումների հետ կապված, որոնք մարդկային կյանքեր խլելուն զուգընթաց նաև ավելացրեցին կողմերի միջև լարվածությունը և խորացրեցին անվստահության մթնոլորտը:

«Նոյեմբերի 12-ին շփման գծում ուղղաթիռի խոցումը ողբերգություն էր, որից կարելի էր խուսափել: Այն կարևոր դարձրեց կողմերի այնպիսի միջոցառումների անցկացումը, որոնք կոչված են նպաստելու լարվածության նվազեցմանը, վստահության վերականգմանը և ապա միջադեպերից խուսափելուն: Մենք դիմում ենք բոլոր կողմերին` զսպվածություն ցուցաբերել հետագա լարվածությունը կանխարգելելու համար: Մենք նաև կողմերին կոչ ենք անում մարդասիրական հարցերի կարգավորման համար հիմք ընդունել 2010 թվականի հոկտեմբերին Աստրախանում Հայաստանի, Ադրբեջանի և Ռուսաստանի Դաշնության նախագահների հայտարարությունը»,- նշված է հայտարարության մեջ:

Արտգործնախարարները բարձր են գնահատել 2014 թվականին Հայաստանի և Ադրբեջանի նախագահների եռակողմ հանդիպումները Սոչիում, Նյուպորտում և Փարիզում` որպես կողմերի միջև շփումների վերականգնման հարթակ: Արտգործնախարարները նաև ողջունել են նախագաների` Փարիզում ձեռք բերված պայմանավորվածությունը` շարունակել երկխոսությունը գալիք տարում:

«ժամանակն է, որ կողմերը հաղթահարեն տարաձայնությունները, վերականգնեն վստահությունը և հարգեն բանակցային գործընթացի իրենց հանձնառությունները, որն էլ կարող է բերել հակամարտության կարգավորմանը: Կողմերը պետք է ընդունեն, որ համապարփակ կարգավորման հիմքերը այն տարրերն ու սկզբունքներն են, որոնք ընդգծվել են Ռուսաստանի, Միացյալ Նահանգների և Ֆրանսիայի նախագահների համատեղ հայատարարության մեջ, և որոնք քննարկվել են հատկապես Փարիզյան վերջին գագաթաժողովի ընթացքում: Համանախագահ երկրների հովանո ներքո համապարփակ խաղաղության համաձայնագրին ուղղված բանակցությունները պետք է մեկնարկեն որքան հնարավոր է շուտ»,- նշված է հայտարարության մեջ:

Արտգործնախարարները իրենց պատրաստակամությունն են հայտնել աջակցել կողմերին` միաժամանակ շեշտելով, որ «Լեռնային Ղարաբաղի հակամարտությունն ավարտին հասցնելու առաջնային պատասխանատվությունը մնում է Հայաստանի և Ադրբեջանի ղեկավարներին»: