Ձեր վստահելի աղբյուրը

ՀՀ կառավարության այսօրվա նիստի սկզբում վարչապետ Հովիկ Աբրահամյանն անդրադառնալով դրամի արժեզրկմանը և գնաճին՝ ՀՀ կենտրոնական բանկի նախագահի տեղակալ Ներսես Երիցյանին առաջարկեց պարզաբանումներ ներկայացնել, թե ինչպիսին է իրավիճակն այս պահի դրությամբ:

Ն. Երիցյանի խոսքերով՝ վերջին շրջանում միջազգային շուկաներում և տարածաշրջանում տեղի ունեցած զարգացումները, այդ թվում` արժութային շուկայի մեծ տատանումները նպաստել են ներքին արժութային շուկայում դրամի արժեզրկմանը և ձևավորված որոշակի սպասումների ներքո հանգեցրել նաև փոխարժեքի տատանողականության աճին. «Ցավոք սրտի, ձևավորված սպասումները այսօր հեռու են մեր տնտեսության հիմնարարներից, և որոշակի մտավախությունների տեղիք են տվել, քանի որ նաև ճշգրտվում է փոխարժեքը»:

Անդրադառնալով ԿԲ հայտարարությանը, նա նշեց, որ այդ հայտարարություններն ուղղված էին սպեկուլացիաներից և անհարկի փոխարկումներից զերծ պահելուն, քանի որ փոխարժեքի նման տատանողականության վարքագծի պայմաններում, դրանք իրենց մեջ կրում են բարձր ռիսկեր, և չմասնագիտացված անձանց մոտ ակնկալվող օգտի փոխարեն կարող են հանգեցնել նաև զգալի վնասների. «ԿԲ-ն հաստատում է իր պատրաստակամությունը և ամենայն պատասխանատվությամբ է մոտենում իր գործառույթներին, որպեսզի կայունացնենք շուկայում իրավիճակը և գործի ենք դրել մեր տրամադրության տակ գտնվող բոլոր հնարավոր միջոցները և գործիքները, այդ թվում շուկայում իրացվելիության, լոմբարդային գործիքների միջոցով, և արժութային շուկայում տարբեր միջամտություներ անելու, որպեսզի կարողանանք տատանողականությունը հաղթահարենք: Բայց այն, ինչը դրսի շուկայով է պայմանավորված, այդ ճշգրտումները բնականաբար պետք է իրենց տեղը գտնեն»:

Վերջինս հավաստիացրեց, որ ԿԲ պահուստները լիովին բավարար են կանխելու փոխարժեքի արհեստական տատանումները և ապահովել ֆինանսական կայունությունը. «Համեմատությամբ ասեմ, որ մեր պահուստային ֆոնդերը համարժեք են շրջանառության մեջ գտնվող կանխիկ դրամին, այդ իմաստով որևիցե խնդիր չենք տեսնում: Բացի այդ նաև ուզում ենք հավաստիացնել, որ բանկային համակարգի կայունությունը նույնպես ապահովված է, երաշխավորված է կապիտալի բարձր մակարդակով, բանկերն իրենք էլ ունեն շատ մեծ դոլարային իրացվելիություն և կանխիկ և անկանխիկ, որը նույնպես համարժեք է շրջանառության մեջ գտնվող կանխիկին, և այդ իմաստով բանկերը կարող են սպասարկել մեր քաղաքացիների պահանջները»:

Անդրադառնալով գնային փոփոխություններին նա ասաց, թե ԿԲ-ի գնահատմամբ՝ գների կայունացման իմաստով նույնպես ռիսկային զարգացումներ իրենք չեն տեսնում, և այս ու հաջորդ տարի գնաճը կգտնվի թույլատրելի սահմաններում՝ 4 տոկոսի միջակայքում:

Այնուհետև Հովիկ Աբրահամյանը ՏՄՊՊ հանձնաժողովի նախագահ Արտակ Շաբոյանին հանձնարարեց նախապատրաստել և կառավարության հաջորդ նիստում ներկայացնել շուկայում ընթացող ապրանքների գնաճը. «Դուք ներկայացրել եք մեկ անգամ, ես դրան ծանոթ եմ, մոտ 5 տոկոսի շրջակայքում գնաճ կա, բայց նաև հասարակության մեջ կարծիք կա, որ դա 10-15 տոկոս է: Որպեսզի փարատենք այդ կասկածները, խնդրում եմ կառավարության հաջորդ նիստում ներկայացնել այս 10 օրվա ապրանքների գների աճը»: