Ձեր վստահելի աղբյուրը

Տավուշի մարզի Նոյեմբերյանի տարածաշրջանի սահմանագոտում վիրավորված պայմանագրային զինծառայող Կարեն Անանյանի առողջական վիճակը ծանրից կայունանում է: Այս մասին Panorama.am-ի հետ զրույցում ասաց ՊՆ մամուլի խոսնակ Արծրուն Հովհաննիսյանը:

«Ձախ ազդրի շրջանում հրազենային վիրավորում ստացած պայմանագրային զինծառայող Կարեն Անանյանն այժմ գտնվում է «Մուրացան» զինվորական հոսպիտալում»,-ասաց Ա. Հովհաննիսյանը:

Հիշեցնենք՝ ՀՀ քննչական կոմիտեի տեղեկատվության և հասարակայնության հետ կապերի բաժնից հայտնել են, որ նախաքննությամբ պարզվել է, որ 02.12.2014թ.՝ ժամը 19:30-ի սահմաններում, ՀՀ ՊՆ N զորամասի մարտական դիրքում վիճաբանություն է առաջացել դիրքի ավագ, ավագ լեյտենանտ Հ.Ղազարյանի և դիրքի ավագի օգնական, պայմանագրային զինծառայող, շարքային Դ.Սարիբեկյանի միջև։ Հ.Ղազարյանն իրեն ամրակցված ինքնաձիգից անկանոն կրակոցներ է արձակել, որի արդյունքում՝ ձախ ազդրի շրջանում հրազենային վիրավորում է ստացել նույն դիրքի պայմանագրային զինծառայող, շարքային Կ.Անանյանը:

Վերջինս տեղափոխվել է ՀՀ ՊՆ կենտրոնական կլինիկական զինվորական հոսպիտալ: Ներկայումս նրա կյանքին վտանգ չի սպառնում:

Դեպքի առթիվ ՀՀ քննչական կոմիտեի ԶՔԳՎ վեցերորդ քննչական բաժնում հարուցվել է քրեական գործ՝ ՀՀ քրեական օրենսգրքի 358.1-րդ հոդվածի 3-րդ մասի 3-րդ կետով (զենքի գործադրմամբ ստորադասի նկատմամբ բռնի գործողություններ կատարելը), կատարվում է նախաքննություն:

Հ.Ղազարյանը ձերբակալվել է:

Նախորդող հրապարակումներ՝
Պարզվել են պայմանագրային զինծառայողին մարմնական վնասվածք պատճառելու դեպքի մանրամասները
Տավուշում զինծառայող է վիրավորվել