Ձեր վստահելի աղբյուրը

Հայաստանում, Արամ Խաչատրյանի տուն-թանգարանում, բացվեց Թանգարանային կրթության կենտրոն: Թանգարանների կրթական ծրագրերի զարգացման կնետրոնը հիմնվել է Դի-Վի-Վի Ինթերնեյշնալ (Գերմանիայի ժողովրդական բարձրագույն դպրոցների միության միջազգային համագործակցության ինստիտուտ) կազմակերպության, «Թանգարանների աշխատողների և բարեկամների ասոցիացիայի» և Արամ Խաչատրյանի տուն-թանգարանի միջև սույն թվականի հոկտեմբերի 2-ին կնքված հուշագրի արդյունքում:

Կենտրոնի բացման արարողության ժամանակ Արամ Խաչատրյանի տուն-թանգարանի տնօրեն Արմինե Գրիգորյանն ասաց. «Պատահական չէ, որ հենց մեր թանգարանն է ընտրվել, քանի որ մենք մշտապես մասնակցություն ունենք տարբեր կրթական ծրագրերում: Մեր թանգարանի կարևորագույն մասն է կազմում կրթական ծրագրերը»:

Թանգարանային կրթության կենտրոնի համակարգող Հայկ Մկրտչյանը Panorama.am-ի հետ զրույցում ասաց, որ կենտրոնը նպաստելու է թանգարաններում կրթական ծրագրերի մշակմանն ու ներդրմանը, այլընտրանքային կրթության զարգացմանը, մեթոդական ձեռնարկների ու խորհրդատվության տրամադրմանը, թանգարանային աշխատողների հմտություներին ուղղված մասնագիտական դասընթացների, սեմինարների կազմակերպմանը:

«Եռամյա ծրագիրը նպաստելու է կադրերի վերապատրաստմանը: Մեզ անհրաժեշտ են թանգարանի աշխատողներ, ովքեր կկարողանան ճիշտ կազմակերպել թանգարաններում կրթական ծրագրեր, որոնք կհամապատասխանեն նաև եվրոպական չափանիշներին: Մենք, ըստ էության, որդեգրելու ենք հիմնական եվրոպական ուղղությունը»,- ասաց նա:

ՀՀ-ում Գերմանիայի արտակարգ և լիազոր դեսպան Ռայներ Մորելն ասաց, որ ծրագրի շրջանակներում տրամադրվելու են նաև դրամաշնորհներ, որպեսզի տեղի մասնագետներն իրենք կարողանան կազմել իրենց սեփական կրթական ծրագրերը, ինչպես նաև ցուցաբերվելու է տեխնիկական օժանդակություն, մեթոդաբանական խորհրդատվություն:

«Ծրագրի նպատակն է սատարել և օգնել կրթական ծրագրերի նախագծմանն ու ներդրմանը հայաստանյան թանգարաններում: Այն կնպաստի թանգարանային միջազգային փորձը տեղայնացնել Հայաստանում»,- ասաց դեսպանը:

Կենտրոնի գործունեությունը ֆինանսավորվում է Դի-Վի-Վի Ինթերնեյշնալի կողմից՝ Գերմանիայի Տնտեսական համագործակցության և զարգացման նախարարության միջոցներից (BMZ):

Դի-Վի-Վի Ինթերնեյշնալի հայաստանյան ներկայացուցչության տնօրեն Լուսինե Խառատյանն ասաց. «Այս կենտրոնն օգնելու է թանգարանները վերածել կրթական միջավայրի: Թանգարանը պետք է դառնա մի վայր, որտեղ տարբեր խավերի, խմբերի ներկայացուցիչներ հաճույքով գան ու նաև սովորելու բան ունենան»:

Արամ Խաչատրյանի տուն-թանգարանը Կենտրոնի գործունեության համար անվարձահատույց կերպով տրամադրում է տարածք թանգարանի շենքում, իսկ «Թանգարանների աշխատողների և բարեկամների ասոցիացիան» պարտավորվում է օժանդակել մասնագիտական խորհրդատվության, մեթոդական ձեռնարկների մշակման, սեմինարների, վարժանքների, գիտաժողովների կազմակերպման հարցում:

Կենտրոնի բացման շրջանակներում տեղի ունեցավ նաև «Շարունակական կրթությունը թանգարաններում» Եվրոպական ուղեցույցի շնորհանդեսը, որի հայերեն թարգմանությունն ու տպագրությունը ֆինանսավորվել է Դի-Վի-Վի Ինթերնեյշնալի կողմից: Գիրքը կներկայացնի ձեռնարկի համահեղինակ, Բոլոնիայի Մշակութային ժառանգության ինստիտուտի ներկայացուցիչ Մարգհերիտա Սանին:

Թանգարանային կրթության կենտրոնի բացման հանդիսավոր արարողությանը կհաջորդեն թանգարանային կրթության օրերը: Դեկտեմբերի 6-10-ը մայրաքաղաքի տարբեր թանգարաններում տեղի կունենան վարպետաց դասեր, կրթական ծրագրերի շնորհանդեսներ, մասնագիտական քննարկումներ և դասախոսություններ թանգարանային աշխատողների և հանրակրթական դպրոցների ուսուցիչների համար: