Ձեր վստահելի աղբյուրը

Freedom House հեղինակավոր միջազգային իրավապաշտպան կազմակերպության` համացանցի իրավիճակի առնչությամբ տարեկան զեկույցում, աշխարհի 65 երկրներում Ադրբեջանը եղել ու մնում է մասնակիորեն ազատ համացանց մուտքի տեսանկյունից: Զեկույցը հրապարակվել է կազմակերպության կայքում:

Ըստ զեկույցի՝ Ադրբեջանում համացանցի որակը ցածր է մնում, հատկապես՝ մայրաքաղաքի սահմաններից դուրս: Նշված է, որ պետանվտանգության մարմինները վերահսկում են համացանցային պրովայդերներին, երբ ցանկանում են: Կապի նախարարությունն էլ շարունակում է մենաշնորհային դիրքը պահպանել համացանցի առնչությամբ: 2013-ի վերջին Ադրբեջանում մուտքը համացանց 58.7 տոկոսի մակարդակի էր, 2012-ին նույն ցուցանիշը 54.2 տոկոս էր:

«Ադրբեջանի գյուղական բնակավայրերում համացանցի հասանելիությունը ինչպես և նախկինում բարդություններ ունի, կապը միջինից ցածր է: 2013-ի սեպտեմբերին կառավարությունը 131 մլն ԱՄՆ դոլար արժողությամբ ամբիցիոզ ծրագրի մասին էր հայտարարել, որը նպատակ ուներ 2017-ին արդեն երկրում ունենալ ողջ տարածքով մեկ ձգվող լայնածավալ համացանցային ենթակառուցվածքներ: Սակայն այս նախաձեռնությունը փակուղի է մտել»,- գրված է զեկույցում:

Նաև նշվում է, որ նախագահական ընտրությունների նախաշեմին իշխանությունները փակել էին Նախիջևանում մի ինտերնետ-սրճարան: Սրճարանի տերերն ասել էին, որ կապի նախարարությունը փորձում է կանխել առցանց այլախոհությունն ընտրությունների նախօրեին: 2014-ի մայիսի դրությամբ Մամուլի խորհուրդը ոչ մի զեկույց չի ներկայացրել համացանցի դրության մասին, բացի այդ ոչ մի խնդիր չի բարձրացրել Ադրբեջանում մամուլի ազատության հարցի վերաբերյալ:

«Կառավարությունը կիրառում է այնպիսի վերահսկողության միջոցներ, ինչպիսիք են օգտատերերին ահաբեկելն ու ձերբակալությունները: Բացի այդ, կիրառվում է որոշ կայքերի արգելափակումը, որոնք քննադատում են իշխանություններին: Միաժամանակ, իշխանամետ ռեսուրսներում սոցցանցերի դեմ քարոզչություն է ընթանում՝ դրանց բնութագրելով որպես վատ սովորություն, որն ազդում է հոգեբանության վրա: Անկախ ԶԼՄ-ները բախվում են իշխանությունների կրկնակի ճնշման հետ՝ տուգանքների ու դատական հայցերի տեսքով»,- ասված է զեկույցում:

Նաև հիշատակվում է, որ ադրբեջանական ընդդիմադիր «Ազադլիգ» թերթը ենթարկվել է տուգանքի ու ճնշումների իշխանության կողմից: Վերջին մի քանի տարիների ընթացքում ԶԼՄ-ների վրա ճնշումն աճել է: Միաժամանակ, գրանցվել են դատական հայցեր այն օգտատերերի դեմ, որոնք քննադատական նյութեր են հրապարակել: Երկրում կան ավելի քան 150 000 բլոգերներ, որոնցից 1000-ն ունեն անգլալեզու, ռուսալեզու կամ այլ օտար լեզվով բլոգեր:

«Ադրբեջանի իշխանությունները շարունակում են ձերբակալել ու հետապնդել առցանց օգտատերերին, հատկապես՝ երիտասարդ ակտիվիստների ու լրագրողների, որոնք քննադատում են իշխանություններին: Այս ֆոնին կառավարության հրահանգով ձերբակալվել են ու դատապարտվել մեծ թվով բլոգերներ՝ խուլիգանության կամ այլ կեղծված մեղադրանքներով»,- նկատել են զեկույցի հեղինակները:

Նյութեր թեմայի շուրջ՝
«Freedom House»-ը դատապարտել է Ադրբեջանի իշխանություններին` լրագրողի վրա հարձակման հերթական դեպքի համար
«Freedom House». Համացանցի ազատության սանդղակում Հայաստանը`17-րդ տեղն է զբաղեցնում` առաջ անցնելով Ադրբեջանից և Թուրքիայից