Ձեր վստահելի աղբյուրը

Այսուհետ Երևանյան մշակութային և ժամանցային իրադարձություններով հետաքրքրվողների համար կգործի նոր ուղեցույց՝ Yerevan Events բջջային հավելվածը iOS և Android համակարգերով աշխատող սմարթֆոնների և պլանշետների համար, որը մշակվել է 2014 թվականին երիտասարդ հայ ՏՏ մասնագետների կողմից: Այս մասին հայտնում է «Սփրինգ PR» ընկերության մամուլի ծառայությունը:

Վերոնշյալ համակարգերի յուրաքանչյուր օգտատեր անվճար ներբեռնելով Yerevan Events հավելվածը հնարավորություն կունենա տեղեկանալ Երևանի մշակութային և ժամանցային անցուդարձի, կինոցուցադրությունների, տարատեսակ բիզնես իրադարձությունների և երեկույթների մասին, ծանոթանալ ինչպես առանձին հաստատության սպասվելիք կամ արդեն տեղի ունեցած, այնպես էլ տարբեր հաստատությունների կողմից կոնկրետ օրը նախատեսվող բոլոր միջոցառումներին:

Հավելվածը նաև խնայում է օգտատերերի ժամանակը նախապես կարճ հաղորդագրությունների միջոցով տեղեկացնելով միջոցառումների մասին:
Yerevan Events-ը ՏՏ նախագիծ է , որի նպատակն է տեղեկատվության տարածման ժամանակակից գործիքների միջոցով ակտիվացնել Երևանյան մշակութային և ժամանցային կյանքը, ինչպես քաղաքի բնակիչների այնպես էլ Երևանի այցելուների և հյուրերի համար:

Yerevan Events հավելվածին արդեն միացել են այնպիսի մշակութային հաստատություններ ինչպիսիք են՝ Ա.Սպենդիարյանի անվան օպերայի և բալետի ազգային ակադեմիական թատրոնը, Երևանի պետական կամերային թատրոնը, Հ. Ղափլանյանի անվան դրամատիկական թատրոնը, Պետական համազգային թատրոնը, Երևանի մնջախաղի պետական թատրոնը, Խամաճիկների պետական թատրոնը, Երևանի Հովհաննես Թումանյանի անվան պետական տիկնիկային թատրոնը, Հենրիկ Մալյանի անվան թատրոնը: