Ձեր վստահելի աղբյուրը

Դեկտեմբերի 5-ի առավոտյան ձերբակալված ադրբեջանցի ճանաչված լրագրող Խադիջա Իսմայիլովայի փաստաբան Էլթոն Գուլիևը հայտարարել է, որ Իսմայիլովային առաջադրված մեղադրանքը բացարձակապես անհեթեթ է: Այս մասին հայտնում է «Кавказский узел»-ը:

«Այն առաջադրվել է անհեթեթ ենթադրությունների հիման վրա: Դատարանի որոշումն ապօրինի է և կապված է Իսմայիլովայի լրագրողական գործունեության հետ»,-ասել է լրագրողի փաստաբանը:

Նրա խոսքերով` իրենք պատրաստվում են վիճարկել դատարանի` ձերբակալության վերաբերյալ որոշումը: Փաստաբանը հրաժարվել է մեղադրանքի մանրամասները մեկնաբանելուց:

Ինչպես նշված է «Кавказский узел»-ի նյութում, Իսմայիլովային աջակցելու նպատակով` դատարանի շենքի մոտ են ժամանել մոտ երկու տասնյակ ակտիվիստներ` փողոցում վանկարկելով «Խադիջա, Խադիջա»: Նրանք շարունակել են բողոքի ակցիան նաև այն ժամանակ, երբ լրագրողին դուրս են բերել շենքից դատավորի որոշումից հետո:

NIDA երիտասարդական շարժման ղեկավար մարմնի անդամ Ուլվի Հասանլին հայտարարել է Իսմայիլովային քրեական հետապնդման քաղաքական բնույթի մասին:

«Սա կեղծված քրեական գործ է: Խադիջային ձերբակալել են իշխող էլիտայում կաշառակերության փաստերի մերկացման պատճառով»,- նկատել է Հասանլին:

Հետաքննող լրագրող Այնուր Իմրանովան ևս վրդովված է Իսմայիլովայի ձերբակալության առնչությամբ:

«Խադիջան Ադրբեջանի համար արել է ավելին, քան ցանկացած կուսակցություն կամ հասարակական կազմակերպություն: Նա վերհանել ու գրել է ճշմարտությունը»,- ասել է նա լրագրողներին:

Նյութում նաև նշվում է, որ Իսմայիլովայի ծանոթների տվյալներով` վերջինիս ձերբակալել են լրագրող Թուրալ Մուսթաֆաևի ինքնասպանության փորձի գործով: Նշվում է, թե իբր Մուսթաֆաևը ցուցմունք է տվել, թե Իսմայիլովան իրեն ազատել է աշխատանքից սկզբում «Ազատություն ռադիոկայանի» ադրբեջանական մասնաճյուղից, այնուհետև` MeydanTV առցանց հեռուստաընկերությունից:

«Այնուհանդերձ, Իսմայիլովան ղեկավարել է «Ազատություն ռադիոկայանի» ադրբեջանական մասնաճյուղի Բաքվի գրասենյակը 2008-2010 թթ., իսկ դրանից հետո եղել է ընդամենը հաղորդավարուհի: Ինչ վերաբերում է MeydanTV-ին, Իսմայիլովան առհասարակ այնտեղ երբևէ չի աշխատել»,- հայտարարել է իր ներկայացուցիչ Նաթիգ Ջավադլին:

Եթե լրագրողի մեղքն ապացուցվի, ապա նրան սպասվում է 3-7 տարի ազատազրկում: Ադրբեջանի գլխավոր դատախազության մամուլի ծառայությունից «Кавказский узел»-ին հայտնել են, թե Իսմայիլովայի ձերբակալության հարցով պաշտոնական հայտարարություն են պատրաստում:

Նյութում ասվում է նաև, որ Ադրբեջանի դատախազությունն արգելք էր սահմանել Իսմայիլովայի` երկրի սահմաններից դուրս գալու վրա դեռևս հոկտեմբերի 12-ին. այդ ժամանակ էլ լրագրողը չի կարողացել Բաքվից հասնել Պրահա` «Ֆորում 2000» միջազգային կոնֆերանսին մասնակցելու: Հաջորդ օրը գլխավոր դատախազության ներկայացուցիչը պատճառաբանել է արգելքը քրեական գործի հետաքննմամբ, որտեղ լրագրողը որպես վկա է լինելու:

Հավելենք, որ Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:

Նյութեր թեմայի շուրջ`
Խադիջա Իսմայիլովա. Յունուսին գումարները փոխանցվել էին ոչ թե Հայաստանից, այլ Եվրամիությունից
«The Washington Post». Ադրբեջանում լրագրող Խադիջա Իսմայիլովայի ինտիմ բնույթի երկրորդ տեսանյութն է հայտնվել
Խադիջա Իսմայիլովա. 5 մլն մանաթ թերթերին իշխանության մեղսակիցը դարձնելու համար