Ձեր վստահելի աղբյուրը

«Մենք խորապես անհանգստացած ենք ինչպես այս երկրում լրագրողների վրա ճնշումների, այնպես էլ ընդհանուր առմամբ քաղաքացիական հասարակության գործունեության սահմանափակումների առնչությամբ: Այս ամենը վկայում է այն մասին, որ Ադրբեջանի կառավարությունը չի կատարում ստանձնած միջազգային պարտավորությունները: Այս ամենը չի կարող չանհանգստացնել մեզ: Մասնագետները բազմիցս են բարձրացրել այս հարցը»,-կարճ ասուլիսի ժամանակ հայտարարել է ԱՄՆ պետքարտուղարության պաշտոնական ներկայացուցիչ Մարի Հարֆը` պատասխանելով «Ազատություն ռադիոկայանի» լրագրող Խադիջա Իսմայիլովայի ձերբակալության մասին հարցին:

Իր հերթին, ամերիկյան The New York Times պարբերականը հայտնում է, որ Իսմայիլովայի ձերբակալությունը քննադատել է «Ազատություն ռադիոկայանի» գլխավոր խմբագիր Նենադ Պեժիչը:

«Խադիջա Իսմայիլովայի ձերբակալությունն ու ազատազրկումը լոկ մի մասն է Ադրբեջանում մարդու իրավունքների խախտումներն ու կոռուպցիան հետաքննող լրագրողին լռեցնելուն ուղղված երկամյա արշավի: Նրան ուղղված մեղադրանքները զայրեցնող են: Խադիջային պատժում են իր գործունեության համար»,- նկատել է նա:

Նյութում նաև նշված է, որ դեկտեմբերի 4-ին Ադրբեջանի նախագահի աշխատակազմի ղեկավար Ռամիզ Մեհտիևը հրապարակել է 60 էջանոց մի հոդված` բողոքելով ԱՄՆ-ի գաղութացման քաղաքականությունից ու մեղադրելով «Ազատություն ռադիոկայանին» դավաճանության ու իրենց արտերկրյա «տերերին» հաճոյանալու համար: Նա մատնանշել է Իսմայիլովային` որպես կառավարության դեմ աշխատող լրագրողի լավագույն օրինակ:

Հոդվածում հիշատակվում է, որ Իսմայիլովան տևական ժամանակ է, ինչ թիրախ է Ադրբեջանի կառավարության համար: Ուստի ինքն ու իր ընկերները սպասում էին այս ձերբակալությանը, չնայած որ զարմացած են նախադատային ձերբակալման նման ժամկետից:

Այս տարի` ավելի վաղ, Իսմայիլովային կանչել էին հարցաքննության` մեղադրելով վերջինիս երկու ամերիկացի պաշտոնյաներին Բաքվում հանդիպելիս պետական գաղտնիք բացելու հարցում: Հոկտեմբերին էլ նրան ձերբակալել էին Բաքվի օդանավակայանում, երբ լրագրողը նոր էր վերադառնում Ստրասբուրգից:

Նաև նշվում է, որ ըստ Իսմայիլովայի հարազատների խոսքերի` իրեն ձերբակալել են ինքնասպանության փորձ կատարած լրագրող Թուրալ Մուսթաֆաևի գործով. Իսմայիլովայի ընկերները կասկածում են, թե իրականում Մուսթաֆաևը պայմանավորվել է Ադրբեջանի կառավարության հետ:

Հոդվածում նաև ներկայացված են ադրբեջանցի լրագրողների ու փաստաբանների տեսակետները, որոնց համաձայն` կառավարությունը հետապնդում է այն անձանց ու կազմակերպություններին, որոնք Արևմուտքի հետ առնչություններ ունեն, քանի որ կասկածում է, թե Ուկրաինայում ընդվզման ու Յանուկովիչին գահընկեց անելու հետևում կանգնած է ԱՄՆ-ն: Ուստի Ադրբեջանի իշխանությունները զգուշանում են նման սյուժեի կրկնվելուց սեփական երկրում:

Ադրբեջանցի ճանաչված լրագրող Խադիջա Իսմայիլովայի ձերբակալությունն այսօր քննադատել է նաև Human Rights House Foundation (HRHF) իրավապաշտպան կազմակերպությունը:

«Այդ վճիռն անսպասելի չէր: Մենք ենթադրում էինք, որ իշխանությունները ցանկանում են լռեցնել Խադիջա Իսմայիլովային»,- ասել է Մարիա Դալեն` HRHF-ի գործադիր տնօրենը: Այս մասին նյութը հրապարակվել է կազմակերպության պաշտոնական կայքում:

«Ձերբակալությունը սառեցնող ազդեցություն ունի. այժմ պետք է հաշվի առնել, որ Ադրբեջանում քաղաքացիական հասարակության յուրաքանչյուր անկախ առաջնորդ կարող է ձերբակալվել ցանկացած պահի` անհեթեթ մեղադրանքների հիման վրա»,- հավելել է նա` կոչ անելով միջազգային հանրությանը, մասնավորապես` Եվրոպայի խորհրդին, միջոցներ ձեռնարկել, որպեսզի դադարեցվեն բռնաճնշումները, ընդհուպ մինչև Ադրբեջանի իշխանությունների հետ հետագա համագործակցության կասեցումը:

Հայտարարության մեջ նշված է, որ Իսմայիլովան ձերբակալվել է հենց հաջորդ օրը այն բանից հետո, երբ Ադրբեջանի նախագահի աշխատակազմի ղեկավար Ռամիզ Մեհտիևը հրապարակել էր ծավալուն հոդված, որտեղ իր տեսակետն էր հայտնել խոսքի ազատության հիմնախնդիրներով զբաղվող կազմակերպությունների, այդ թվում` Meydan TV հեռուստաընկերության մասին, որի հետ էլ համագործակցել է Խադիջա Իսմայիլովան: Իր հոդվածում Ռամիզ Մեհտիևը նկատել էր, որ Իսմայիլովան «ցանկանում է հաճոյանալ իր արտերկրյա շեֆերին»:

Եթե Իսմայիլովային մեղավոր ճանաչեն, ապա նրան սպառնում է մինչև 7 տարի ազատազրկում: Հավելենք, որ Խադիջա Իսմայիլովան բազմիցս եղել է Ադրբեջանի կառավարության թիրախն իր լրագրողական գործունեության պատճառով: Նա մի շարք լրագրողական հետաքննությունների հեղինակ է, որտեղ մերկացրել է Ադրբեջանի իշխանության բարձր օղակներում կաշառակերության մեծ չափերն ապացուցող փաստեր: Վերջին շրջանում նա թոք-շոու էր վարում «Ազատություն ռադիոկայանում»:

Նյութեր թեմայի շուրջ`
Դատարանի որոշումն ապօրինի է և կապված է Իսմայիլովայի լրագրողական գործունեության հետ. Փաստաբան
Խադիջա Իսմայիլովա. Յունուսին գումարները փոխանցվել էին ոչ թե Հայաստանից, այլ Եվրամիությունից
«The Washington Post». Ադրբեջանում լրագրող Խադիջա Իսմայիլովայի ինտիմ բնույթի երկրորդ տեսանյութն է հայտնվել
Խադիջա Իսմայիլովա. 5 մլն մանաթ թերթերին իշխանության մեղսակիցը դարձնելու համար