Հայկական գինիների համտես-շնորհանդես Բրյուսելում

Տնտեսություն 11:23 08/12/2014

Հայկական գինիների համտես-շնորհանդես Բրյուսելում

Այսօր Բելգիայի Թագավորության մայրաքաղաք Բրյուսելում տեղի կունենա հայկական գինիների համտես-շնորհանդես:

Զարգացման հայկական գործակալությունից տեղեկացնում են, որ համտեսը տեղի կունենա Բրյուսելի հանրաճանաչ և շքեղ «Solvay» գրադարանում, որի համապատասխան տարածքը կհամապատասխանեցվի միջոցառման անցկացման ձևաչափին:

Միջոցառման իրականացմանը աջակցում է բելգիական համապատասխան մասնագիտացված կազմակերպությունը:

Համտեսին հրավիրված են խոշոր առևտրային ցանցերի, գինու ներմուծմամբ և վաճառքով զբաղվող կազմակերպությունների, ռեստորանային բիզնեսի, դիվանագիտական կորպուսի և այլ շահագրգիռ կազմակերպությունների բազմաթիվ ներկայացուցիչներ, սոմելիեներ, ինչպես նաև տվյալ ոլորտում հայտնի լրագրողներ:

Համտեսը կնպաստի հայկական գինեգործության վերաբերյալ եվրոպական շուկայում իրազեկվածության բարձրացմանը, ինչպես նաև գինիների արտահանման համար նոր շուկաների և գործընկերների բացահայտմանը։

Համտեսը կիրականացվի արհեստավարժ սոմելիեների կողմից: Միջոցառմանը մասնակցում են հայկական գինեգործական 14 ընկերություն՝ իրենց սպիտակ և կարմիր անապակ գինիներով:

Համտես-շնորհանդեսին նախատեսվում է ՀՀ էկոնոմիկայի նախարար Կ․ Ճշմարիտյանի, Բելգիայի Թագավորությունում ՀՀ արտակարգ և լիազոր դեսպան Թ. Մարգարյանի, ԵՄ-ում ՀՀ առևտրական ներկայացուցիչ Վ. Սիմոնյանի և այլ բարձրաստիճան պաշտոնյաների մասնակցությունը։

Միջոցառումը կազմակերպվում է ՀՀ էկոնոմիկայի նախարարության, Բելգիայի Թագավորությունում ՀՀ դեսպանության, Եվրոպական Միությունում ՀՀ առևտրային ներկայացուցչության, Արդյունաբերության զարգացման հիմնադրամի և Զարգացման հայկական գործակալության հետ համատեղ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: