Ձեր վստահելի աղբյուրը

2015 թվականի մարտի վերջին հանրությանն է ներկայացվելու «Հին Երևան» նախագծի մակետը: Լրագրողների հետ հանդիպման ժամանակ ասաց «Հին Երևան» նախագծի հեղինակ, ճարտարապետ Լևոն Վարդանյանը: Նա նշեց, որ մակետի ներկայացումից հետո արդեն պետք է նախագիծը համաձայնեցվի մշակույթի նախարարության, Երևանի քաղաքապետարանի հետ:

Հիշեցնենք , որ դեկտեմբերի 2-ին Հայաստանի կառավարությունն ի դեմս ՀՀ քաղաքաշինության նախարար Նարեկ Սարգսյանի, «Մուլտիկոնտինենտալ Դիստրիբյուշն» ՍՊԸ-ն՝ ի դեմս շվեյցարաբնակ ներդրող Վարտան Սիրմակեսի լիազորված անձ Գևորգ Մաչանյանի, համաձայնագիր է ստորագրվել «Հին Երևան» կառուցապատման ներդրումային ծրագրի վերաբերյալ: ՀՀ կառավարության 2014թ. նոյեմբերի 6-ի 1227-Ա որոշման (Երևան քաղաքի Գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված և Երևան քաղաքի Կոնդ թաղամասում գերակա հանրային շահ ճանաչված տարածքներում կառուցապատման նախապատրաստական միջոցառումների մասին) 3-րդ կետով Հայաստանի Հանրապետության քաղաքաշինության նախարարին պատվիրակվել էր՝ ապահովել Երևան քաղաքի Գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված տարածքներում, «Հին Երևան» համալիրի կառուցապատման նախագծի մշակումը: Ծրագրի շինարարական աշխատանքները կսկսվեն 2015 թվականին:

«Հանդիպել եմ շատ ներդրողների հետ: Նայում էին ծրագիրը, ամեն մեկն իր ուզածն էր թելադրում: Իմ խնդիրն էր վերականգնել Երևանի մի կտորը, վերականգնել միջավայր: Առաջին ներդրողն է, որ անմիջապես ընկալել է նախագիծը: Հարցադրումներից հասկացա, որ կարող ենք աշխատել»,- ասաց ճարտարապետը:

Նախնական հաշվարկներով, ըստ Լ. Վարդանյանի, խոսքը 120-150 միլիոն դոլարի մասին է: Ծրագրի ավարտի վերջնաժամկետն է՝ 5 տարի: Ճարտարապետը նշեց, որ ամեն ինչ արվում է ըստ Երևանի գլխավոր հատակագծի:

Լևոն Վարդանյանը հավաստիացրեց, որ Աֆրիկյանների տունն իր տեղն անպայման ունենալու է այդ նախագծում. «Աֆրիկյանների տունն, իրոք, ապամոնտաժվել է պրոֆեսինալ շինարարների կողմից, քարերը բոլորը կան: Աֆրիկյանների տունն ունիկալ հուշարձան է: Ես ինքս էի պնդում, որ ապամոնտաժվեր: Մինչև այս վերջին աղմուկը նույնիսկ իմ կոլեգարների մեծ մասը չէին տեսել այդ շենքը: Հայտնվել էր այնպիսի քաղաքաշինական միջավայրում, որ չէր ընկալվում»:

Նա նշեց, որ նախատեսված հատվածում արդեն 14 շինություն կա, հավաքվելու է մոտ 16 շենք, այսինքն Երևան քաղաքի Գլխավոր պողոտայի՝ Աբովյան, Փավստոս Բուզանդի, Եզնիկ Կողբացու և Արամի փողոցներ հատվածում կլինի 30 շենք:

«Հին Երևանի» գործառույթի մասին խոսելիս, ճարտարապետն ասաց, որ իր երազանքն է այդ հատվածը վերածել հասարակական, մշակութային կենտրոնի, որտեղ լինեն գորգերի, արծաթագործության, ասեղնագործության, խեցեգործության կենտրոններ, դրանց զուգահեռ՝ ցուցասրահներ, թանգարանային կենտրոններ: Բնակելի հատված չի լինելու: