Ձեր վստահելի աղբյուրը

«Նոր Հալեպ» թաղամասի կառուցումը ուժի մեջ է, սակայն այս պահին չկան համապատասխան ֆինանսական միջոցներ, այդ պատճառով էլ դեռևս բուն աշխատանքները սկսված չեն: Այս մասին Panorama.am-ի հետ զրույցում հայտնեց ՀՀ սփյուռքի նախարարության աշխատակազմի ղեկավար Ֆիրդուս Զաքարյանը:

Նա տեղեկացրեց, որ ծրագրի ներկայացման ժամանակ աշխատանքների ավարտի որևէ վերջնաժամկետ նշված չի եղել. «Սա բարի ցանկություն էր՝ կախված սիրիահայերի տրամադրությունից: Նրանք էլ սկզբից ասում էին, որ իրենց ֆինանսական միջոցներով կմասնակցեն, հետո եկավ մի շրջան, որ ֆինանսապես բարդացավ իրենց մասնակցությունը»:

Ֆիրդուս Զաքարյանը նաև նշեց, որ սփյուռքի բարերարներին էլ պետք է դիմեին այս հարցով, սակայն Սիրիայում իրավիճակն այնպիսին էր, որ չէին կարող ասել՝ եկեք Հայաստան բնակարան կառուցելու և աչքաթող արեք Հալեպում ռմբակոծությունից տուժածներին:

«Մենք նույնիսկ կանադահայ բարերարների հետ ենք քննարկել ծրագիրը, սակայն նրանք խնդրեցին, որ այն ինչ կարող են անել, անեն Գյումրիի համար, այնտեղի խնդիրները լուծելու և ավարտելու: Մենք դեմ չենք և չենք կարող բարերարներին պարտադրել, այս ծրագրի համար գումարներ ներդնել»,-ավելացրեց Ֆ. Զաքարյանը:

Հիշեցնենք, որ «Նոր Հալեպ» թաղամասը պետք է կառուցվեր Աշտարակում՝ դեպի Էջմիածին գնացող մայրուղու վրա: Ըստ նախագծի, թաղամասն ընդհանուր 488 միավոր բնակելի տարածք է, որտեղ պետք է լինեին մեկից երեք սենյականոց բնակարաններ` մոտ 2000 մարդու համար նախատեսված: Հատկացված 4,8 հեկտար տարածքը նախագծվել էր որպես քաղաքատիպ թաղամաս՝ 4-5 հարկանի շենքերով, կանաչապատված բակային տարածքներով:

Հարդարված և վերջնական տեսքի բերված բնակարանների քառակուսի մետրը, ըստ նախնական հաշվարկների կարժենար 500-550 ԱՄՆ դոլար, իսկ ոչ հարդարված վիճակում՝ 350-400:

Նշենք, որ ավելի վաղ Panorama. am-ի հետ զրույցում շատ սիրիահայեր կարծիք էին հայտնել, որ իրենք ֆինանսապես ի վիճակի չեն վճարումներ անել և որ ավելի լավ կլիներ այդ գումարներով իրենց համար թեկուզ Աշտարակ քաղաքում արդեն պատրաստի բնակարաններ գնեին՝ նշելով, որ իրենք վարձով են ապրում և տան վարձին զուգահեռ նոր բնակարան ձեռք բերելու գումարները չեն կարող վճարել:

Նախորդող հրապարակումներ՝
«Նոր Հալեպը» հասանելի կլինի ոչ բոլոր սիրիահայերին
«Նոր Հալեպ» թաղամասում բնակարան ձեռք բերելու համար նախնական 625 սիրիահայ է գրանցվել
Սիրիահայերին ներկայացվեցին «Նոր Հալեպ» թաղամասի ամբողջականացված հատակագիծն ու պայմանները
«Որքան շատ բարերարներ լինեն, այնքան «Նոր Հալեպ» թաղամասի բնակարանների արժեքը կարող է նվազել»
Ճարտարապետը ներկայացրել է Նոր Հալեպ թաղամասի ամբողջականացված հատակագիծն ու լուծումները
Սկսվել են «Նոր Հալեպ» թաղամասի տեղանքի ուսումնասիրման աշխատանքները
«Նոր Հալեպ» թաղամասի համար հատկացվել է 4.8 հա տարածք. Աշխատանքները պետք է արագացվեն
Շուրջ 300 սիրիահայ ընտանիք ցանկանում են բնակարան ձեռք բերել «Նոր Հալեպ» բնակելի թաղամասում