Ռուբեն Մելքոնյան. Հրանտ Դինք հիմնադրամը վերածվել է թուրքական քարոզչամեքենայի
«Թուրքիան 1915թ.-ին ընդառաջ իր քարոզչության մեջ նոր տարրեր է մտցրել: Թուրքիան փորձում է ձևավորել, այսպես ասած, ազատ մտավորականների կերպարներ, որոնք հանդես են գալիս ընդդիմադիր դիրքերից»,-այսօր լրագրողների հետ հանդիպմանն անդրադառնալով Հայոց ցեղասպանությունը իրականացրած Ջեմալ փաշայի թոռան` թուրք գրող Հասան Ջեմալի երևանյան այցին, ասաց թուրքագետ Ռուբեն Մելքոնյանը:
Նա նշեց, որ այդ ընդդիմադիր գործիչների գործունեությունը չի վնասում Թուրքիային, այլ հակառակը, նպաստում է Անկարայի քաղաքականությանը:
«Այդ գործիչները ընդունում են Հայոց ցեղասպանությունը, սակայն երբ հարցը հասնում է փոխհատուցման թեմային նրանք սկսում են խուսափել այդ թեմաներից»,-նշեց Ռ.Մելքոնյանը:
Ռ.Մելքոնյանը նշեց, որ եվրոպական տարբեր գրանտների միջոցով փորձ է արվում ձևավորել հայ-թուրքական հաշտեցման միջավայր:
«Արհեստականորեն մեր մեջ ձևավորվել է այն դիսկուրսը, թե պետք է տարբեր գործիչներ արտասանեն ցեղասպանություն բառը: Ցեղասպանությունը, սակայն, պետք է առաջին հերթին ստանա իրավական գնահատական, հատուցում, ինչից հետո նոր միայն կարող է սկսվել հայ և թուրք գործիչների միջև երկխոսություն»,-նշեց թուրքագետը:
Նրա խոսքով, Ջեմալ փաշայի թոռը պալատական թուրք մտավորականների շարքից և նա հրատարակել է Հայոց ցեղասպանության մասին գիրքը:
«Այդ գիրքը ցույց է տալիս Թուրքիայում հետաքրքիր սոցիալական զարգացում, թե ինչպես է թուրք գրողը ժխտողից դառնում Հայոց ցեղասպանությունը ընդունող: Հասան Ջեմալի այդ գրքի միջոցով հայ հասարակությունը պետք է տեսներ, թե նա ինչ է գրում և ինչ է մտածում և հայ հասարակությունը պետք է ճանաչեր նրան: Այդ գրքի թարգմանությունը նախաձեռնել եմ ես»,-նշեց Ռ.Մելքոնյանը:
Նրա խոսքով, Հրանտ Դինք հիմնադրամը վերածվեց թուրքական քարոզչամեքենային տարրի և այն ինչ անում է այդ հիմնադրամը չի կարելի գնահատել որպես հայանպաստ գործունեություն:
«Հասան Ջեմալի գիրքը տպագրել է Հրանտ Դինքի հիմնադրամը: Գրքում պետք է լինեին իմ բացատրական բացատրությունները, մեկնաբանությունները: Սակայն Հրանտ Դինքի հիմնադրամը հրաժարվեց գրքի մեջ տեղակայել իմ նախաբանը: Գրքում տեղի են ունեցել փոփոխություններ, որի մասին ես տեղյակ չեմ եղել»,-նշեց Ռ.Մելքոնյանը:
Նա նշեց, որ իր մի շարք մեկնաբանություններ հանվել են կամ կրճատվել:
«Հասան Ջեմալը ԵՊՀ-ում պատասխանելով հայ ուսանողների հարցերին հայտարեց, որ կողմ չէ Թուրքիայի սահմանների փոփոխությանը և հողային փոխհատուցմներին հօգուտ Հայաստանի»,-հավելեց Ռ.Մելքոնյանը:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
