Ձեր վստահելի աղբյուրը

Վերջին օրերին Ադրբեջանում կրկին ակտիվացել են ծայրահեղական խմբավորումները: Կան նաև նրանց զինված լինելու մասին տեղեկություններ: Սպասվում է, որ մոտակա ամիսներին ընդլայնվելու է ծայրահեղական կրոնական խմբավորումների դեմ գործողությունների շրջանակը: Այս մասին հաղորդում է ադրբեջանական «Մինվալ.ազ» լրատվական պորտալը:

Ինչպես նշվում է նյութում, անցած շաբաթ Չեչնիայում իրականացված ահաբեկչական գործողությունները ցույց տվեցին, որ այսպիսի ծայրահեղական խմբավորումները ցանկացած պահի պատրաստ են դիմել ռեալ գործողության: Համապատասխան վտանգն ամբողջովին իրական է նաև Ադրբեջանի և Կովկասի բոլոր շրջանների համար:

«Եվ չպետք է մոռանալ, որ ԻԼԻՊ-ի ստեղծման օրից մեր երկիրը դիտարկվում է վերջինիս գործողության թատերաբեմերի շրջանակներում»,- գրում է կայքը:

Համաձայն աղբյուրի տվյալների՝ վերջին օրերին Ադրբեջանում կրկին ակտիվացել են ծայրահեղական խմբավորումները: Այսպես, նրանց կողմնակիցները սկսել են կազմակերպվել Սումգայիթում, որտեղ ի հայտ են եկել Իսլամական պետության խորհրդանիշները՝ մեքենաների պատուհանների վրա իրենց դրոշի գույնը հիշեցնող սև կպչուն պիտակների տեսքով: Նոյեմբերի 12-ին Սումգայիթում ձերբակալվել է սալաֆիականների առաջնորդ Զոհրաբ Շիհալիևը:

Համաձայն «Ենի Մուսավաթ» թերթի տեղեկությունների՝ Սումգայիթում հիմնված ծայրահեղականների մեծ ցանցն անցել է զենք ձեռք բերելու գործողություններին: «Այս փաստը հայտնի է իրավապահ մարմիններին և լրջորեն վերահսկվում է: Բացառված չէ, որ մոտ օրերին կարող են մեծամասշտաբ գործողություններ իրականացվել»,- նշում է կայքը:

«Մինվալ.ազ»-ը գրում է, որ Սումգայիթում ծայրահեղական կրոնական խմբավորումների «միջուկի» գոյության մասին տեղեկությունները նոր չեն, և իշխանությունները լավ տեղեկացված են քաղաքում առկա իրավիճակի մասին: Կայքը հավելում է, որ անցած տարի դեկտեմբերին Սումգայիթում սալաֆիականների և խավարիջների ներկայացուցիչների միջև փոխհրաձգություն է եղել, իսկ մեկ ամիս հետո գլխատվել են մի քանի զինված ծայրահեղականներ:

Անվտանգության փորձագետի խոսքերով՝ մոտակա ամիսներին Բաքվում և երկրի այլ քաղաքներում կիրագործվեն մեծամասշտաբ գործողություններ` ուղղված ծայրահեղականների դեմ: Կայքը նշում է նաև, որ դա կապված է նաև 2015-ին անցկացվելիք ամառային Եվրոպական խաղերի հետ:

Հիշեցնենք, որ ադրբեջանցի սալաֆիականները կամ վահաբականներն առաջին տարին չէ, որ մարտնչում են Սիրիայում, Աֆղանստանում ու Պակիստանում տարբեր ահաբեկչական խմբավորումների կազմում: Ադրբեջանական Vesti.az տեղեկատվական գործակալությունը գրում է, որ նշված երկրներում ադրբեջանցի ահաբեկիչների թիվը մոտ 300 է, իսկ ահա ադրբեջանական Faktxeber պորտալը հայտնում է՝ Սիրիայում վերջին 3 տարիներին սպանվել են շուրջ 200 ադրբեջանցի ահաբեկիչներ: ԶԼՄ-ները բազմիցս տեղեկացրել են նաև ահաբեկիչների ադրբեջանցի հրամանատարների չեզոքացման մասին:

Հավելենք նաև, որ Ադրբեջանի և միջազգային ահաբեկչական խմբավորումների առնչությունները սկիզբ են առել դեռևս 1990-ականներին՝ Արցախյան պատերազմի տարիներին: Այդ ժամանակ էլ Հեյդար Ալիևի գլխավորությամբ երկրի ղեկավարությունն Արցախի հայ բնակչության դեմ պատերազմում դիմել է Աֆղանստանից, Թուրքիայից, Չեչնիայից իսլամիստական խմբավորումների օգնությանը: Այս խմբավորումների անդամ ահաբեկիչներին հաջողվել է անհրաժեշտ կապեր հաստատել Ադրբեջանում՝ սկսելով Ադրբեջանի քաղաքացիների հավաքագրումը, որոնց ուղարկում էին կռվելու Աֆղանստան ու Հյուսիսային Կովկաս: Այստեղ նրանք մարտնչում էին միջազգային կոալիցիոն ուժերի ու ռուսական կառույցների դեմ: Վերջին տարիներին Ադրբեջանի քաղաքացիներն ակտիվորեն մասնակցում են ՌԴ-ում, Աֆղանստանում, Սիրիայում և Իրաքում ծայրահեղական խմբավորումների վարած մարտերին:

Նախորդիվ`
Ադրբեջանի հատուկ ծառայությունները չեն խոչընդոտի ծայրահեղականների՝ Սիրիա մեկնելուն
Ադրբեջանում արմատականներին ֆինանսավորող «Ջիհադի հիմնադրամ» է գործում. ադրբեջանական մամուլ