Ձեր վստահելի աղբյուրը

Տարիներ շարունակ Ադրբեջանի իշխանությունները միլիոններ են ծախսում Վաշինգթոնի հետ հարաբերությունների բարելավման վրա, սակայն ի պատասխան չեն ստանում գեթ մեկ դրական հայտարարություն: Այս մասին հաղորդում է ադրբեջանական Minval.az տեղեկատվական պորտալը:

Ինչպես նշված է նյութում, Ադրբեջանի իշխանությունների ու ԱՄՆ-ի միջև լարվածությունն իրականում չի սահմանափակվում միայն երկու երկրների միջև խնդիրներով, այլ տարածվում է այդ թվում իշխանության ներսում: «Ենի Մուսավաթ» թերթի տեղեկություններով` ԱՄՆ-ի` վերջին շրջանի բազմաթիվ կոշտ հայտարարությունները, այդ թվում ԱՄՆ պետքարտուղարության` դեռևս չտարածված տարեկան զեկույցի կոշտությունը խիստ զայրացրել են Ադրբեջանի իշխանություններին:

Պորտալը գրում է, որ տարիներ շարունակ մի քանի անձանց օգնությամբ երկրի իշխանությունները միլիոնավոր դոլարներ են վատնում ԱՄՆ-ի հետ ոչ պաշտոնական հարաբերությունները զարգացնելու համար: Այս միջոցները ծախսվում են սենատորների, կոնգրեսականների ու ԱՄՆ-ի տարբեր պետական կառույցների բարձրաստիճան ներկայացուցիչների հետ համագործակցության քողի ներքո: «Դրա վրա մեծ գումարներ են ծախսվել, սակայն կոշտ հայտարարություններից զատ` ներկա դրությամբ չկա իշխանություններին աջակցող թեկուզ մի տեքստ` չնայած նրան, որ նախարար Զիա Մամեդովի կլանը, որն էլ պատասխանատու է ԱՄՆ-ում լոբբիստական գործունեության համար, համառորեն աջակցություն է պահանջում ԱՄՆ-ից»,- նկատում է պորտալը:

Ինչպես նշված է նյութում, Ադրբեջանի դեսպանությունն ԱՄՆ-ում, Ադրբեջան-Ամերիկա դաշինքի ղեկավար Անար Մամեդովը, արտաքին քաղաքականության ասպրեզում նշանակալից դեմքեր, պատգամավորներ Սամեդ Սեիդովն ու Էլխան Սուլեյմանովը և խորհրդական կուսակցություններից մեկի անդամը խստորեն քննադատվել են, քանի որ հենց այս մարդիկ են մեծամասամբ հավաստիացրել իրենց զեկույցներում, թե ԱՄՆ-ի հետ պահանջվող աշխատանքը տարվում է, և համապատասխան շրջանակները «վնասազերծված են», թե իբր բոլոր ամերիկյան բողոքներին հակափաստարկներ կհնչեն հենց նույն Ամերիկայից:

«Երկար տարիներ նախընտրում էին հարաբերությունները ոչ պաշտոնական հարթակներում կարգավորել, սակայն այսօր արդեն տեսանելի է, որ իշխանություններն ԱՄՆ-ից չեն ստանում ռեալ աջակցություն անգամ ոչ պաշտոնական հարաբերությունների ոլորտում: Նույնիսկ այն շրջանակները, որոնք ժամանակին իշխանություններին ներկայացվել են որպես իրենց կողմնակիցներ, երես են թեքել իրենցից, որևէ շոշափելի աջակցություն չկա»,- հավաստիացնում է պորտալը` հավելելով, թե լուրջ քննարկումներից հետո որոշում է կայացվել պատժել այն անձանց, որոնք ստել են երկրի իշխանություններին ԱՄՆ-ի աջակցության հարցում:

Minval.az-ի` ներիշխանական աղբյուրներից ստացած տեղեկությունների համաձայն` ստեղծված իրավիճակում պատասխանատու անձանց լրջորեն պատժելու են. նրանց ոչ միայն հեռացնելու են իրենց զբաղեցրած պաշտոններից, այլև նրանք զրկվելու են այդ թվում ներքին կառավարման լծակներից: «Պատկերավոր ասած` հիմա իշխանության օղակներում փչում է ամերիկյան քամին, որն իր հետ կտանի մի քանի հայտնի անձանց»,- եզրափակում է պորտալը: