Ձեր վստահելի աղբյուրը

Աշխատանքի և սոցիալական հարցերի նախարարությունը «Հաշմանդամներին աջակցության ծրագրի» համար 2015 թվականի պետական բյուջեից հատկացրել է 1 միլիարդ 173 միլիոն 920.1 դրամ: Ծրագրով նախատեսվում է հաշմանդամներին բժշկասոցիալական վերականգնման, պրոթեզաօրթոպեդիկ և վերականգնողական պարագաների տրամադրման և հաշմանդամների վերականգնմանն ուղղված ծառայություններ: Բացի այս, 18 միլին 385.8 դրամ էլ հատկացվել է աշխատանք փնտրող հաշմանդամների աշխատանքային վերականգնման, մասնագիտական վերապատրաստման և խորհրդատվության ծառայությունների համար: Ծրագրի մանրամասները Panorama.am-ին հայտնեցին նախարարության Հաշմանդամների և տարեցների հիմնահարցերի վարչությունից:

Ըստ տեղեկատվության, այս միջոցառումները նախատեված են հաշմանդամներին աջակցության 2014-2016թթ. ծրագրով: 2015 թվականին, ի տարբերություն այս տարվա, լսողական խնդիրներ ունեցող մինչև 30 տարեկան անձանց տրամադրվելու է հավաստագրեր՝ եվրոպական արտադրության լսողական սարքեր ձեռքբերելու համար: Նշենք, որ մինչև 30 տարեկան անձանց տրվում է եվրոպական արտադրության լսողական սարքեր, 30-ից բարձր՝ ԱՊՀ երկրների արտադրության: Որոշում է կայացվել, որ եվրոպական արտադրության սարք ձեռքբերելու համար անձին տրվի հավաստագիր, որպեսզի ինքը գնա ու ստանա: Նախարարությունը պայմանագիր է կնքել չորս կազմակերպության հետ:

«Ունիսոն» ՀԿ նախագահ Արմեն Ալավերդյանը Panorama.am-ի հետ զրույցում ասաց, որ նախարարության աջակցության ծրագրերը պետք է կոնկրետ հարցեր լուծեն, ոչ մեկը չպետք է անտեսված լինի. «Ծրագրերը պետք է լինեն ավելի նպատակաուղղված, մարդակենտրոն, որպեսզի մարդը հասկանա, թե մեկ տարվա ընթացքում ինչ է փոխվել: Իհարկե, որոշ խնդիրների անդրադառնում են, բայց ոչ բավարար կերպով»:

Նա նշեց, որ ամեն տարի երկար քննարկում են սայլաների որակի, չափանիշների, ժամանակին ստանալու հետ կապված հարցեր, բայց մշտապես խնդիրներ են առաջանում: Ա. Ալավերդյանի կարծիքով, այս դեպքում էլ պետք է անցում կատարեն հավաստագրերի համակարգին, ինչպես լսողական սարքերի դեպքում. «Մարդ կարող է ընտրություն կատարել: Մրցակցության դեպքում որակը կբարձրանա»:

«Մեծ խնդիր է նաև հենակ, սայլակ ստանալը հատկապես նրանց համար, ովքեր վերջերս են ստացել հաշմանդամություն: Ժամանակի առումով ձգձգում են, պահանջում են տարբեր փաստաթղթեր: Հաշմանդամություն կարգ ստանալն է ժամանակի հետ է կապված: Ո՞վ պետք է օգնի այդ մարդկանց»,- ասաց նա:

Ա. Ալավերդյանը դրական առաջընթաց է համարում, որ հունվարի 1-ից ուժի մեջ է մտնելու նոր օրենքը, ըստ որի՝ պետական սեկտորում 100 և ավելի աշխատող ունեցող կազմակերպությունների աշխատողների 3 տոկոսը պետք է հաշմանդամություն ունեցող մարդիկ լինեն:

«Մենք մեր բազայում ունենք 500 աշխատանք փնտրող: Նրանց մեջ ունենք տարբեր հմտություններ, շատ լավ կրթություն ունեցող մարդիկ: Տեսնենք, ինչպես կիրագործվի»,- ասաց ՀԿ-ի նախագահը: